Search form

Login - Register | FOLLOW US ON

Logo of Phnom Penh Post newspaper Phnom Penh Post - ជនជាប់ចោទ​ប្លន់​សុំ​ឲ្យ​តុលាការ​ដោះលែង

ជនជាប់ចោទ​ប្លន់​សុំ​ឲ្យ​តុលាការ​ដោះលែង

ភ្នំពេញៈ ជនជាប់ចោទ​ម្នាក់​ពី​ម្សិលមិញ​បាន​សុំ​ឲ្យ​តុលាការ​កំពូល​ដោះលែង​ខ្លួន​ពាក់ព័ន្ធ​​នឹង​បទ​ចោទ​ប្លន់​សម្លាប់​មនុស្ស​នៅ​ភូមិ​ត្នោតជ្រំ សង្កាត់​បឹងទំពុន​កាលពី​ឆ្នាំ​ ២០១១ ​ហើយ​ត្រូវ​តុលាការ​ថ្នាក់​ក្រោម​ផ្តន្ទាទោស​ ២៥ ​ឆ្នាំ​។

ដោយ​ត្រូវ​បាន​ចៅក្រម​ស្នើ​​ឲ្យ​រៀបរាប់​ពី​អង្គហេតុ​ក្នុង​សវនាការ​ជនជាប់ចោទ​ឈ្មោះ​ សួន ដា អាយុ​ ៣៣ ​ឆ្នាំ​បាន​ថ្លែង​ថា​នៅ​មុន​ថ្ងៃ​កើតហេតុ​​ទី​ ១៩ ​ធ្នូ ឆ្នាំ​ ២០១១ គាត់​ត្រូវ​បុរស​ឈ្មោះ ឯល ភក្តី ហៅ​ផឹក​កាហ្វេ​។ បន្ទាប់ពី​ផឹក​រួច ឯល ភក្តី បាន​ហៅ​ម៉ូតូឌុប​ពួកគេ​ទៅ​កៀនស្វាយ​ដើម្បី​ឆ្លង​ទូកដ​ទៅ​ត្រើយ​ម្ខាង​។

ជន​ជាប់ចោទ​បន្ត​ថា​ពេល​ទូក​ចត​មាត់ច្រាំង​ឈ្មោះ ឯល ភក្តី ​បាន​ឲ្យ​គាត់​ឡើង​ទៅ​យក​លុយ​ពី​ប្រពន្ធ​របស់​គេ​ ១០ ​ម៉ឺន​រៀល​។ ​ប៉ុន្តែ​ពេល​កំពុង​ដើរ​ឡើង​ច្រាំង​គាត់​ឃើញ​សមត្ថកិច្ច​ឃាត់​ខ្លួន​ប្រពន្ធ ឯល ភក្តី ទៅ​ហើយ​។ ​ភ្លាម​នោះ​គាត់​បាន​ចុះ​មក​រក ឯល ភក្តី ប៉ុន្តែ​ជន​នោះ​បាន​គេច​ខ្លួន​បាត់ ហើយ​គាត់​ត្រូវ​សមត្ថកិច្ច​ឃាត់​ខ្លួន​។

ទោះ​យ៉ាង​ណា​របាយការណ៍​នគរបាល​បង្ហាញ​ថា​ឈ្មោះ​ សួន ដា,គឹម ចន្ធី និង ឯល ភក្តី ​បាន​រួម​គំនិត​គ្នា​ចូល​ទៅក្នុង​ផ្ទះ​ជនរងគ្រោះ​នៅ​ផ្លូវ​លេខ ២៤ ភូមិ​ត្នោតជ្រំ សង្កាត់​បឹងទំពុន​​កាលពី​ថ្ងៃ​ ១៦ ធ្នូ ឆ្នាំ​ ២០១១ ​បំណង​លួច​ទ្រព្យ​សម្បត្តិ​។ ​ពេល​​នោះ​ឈ្មោះ ឯល ភក្តី បាន​សម្លាប់​ស្ត្រី​ម្ចាស់​ផ្ទះ​ដោយ​ខ្ទប់មាត់ ចងក ហើយ​ចាក់​សម្លាប់​នឹង​វត្ថុ​រឹង​។

សំណុំ​រឿង​នេះ​ត្រូវ​សាលា​ដំបូង​រាជធានី​ផ្តន្ទាទោស គឹម ចន្ធី,ឯល ភក្តី និង​ សួន ដា ដាក់​គុក​ម្នាក់​ ២៥ ​ឆ្នាំ​ចោទ​ពី​បទ​ «​លួច​មាន​ស្ថាន​ទម្ងន់​ទោស​បណ្តាល​ឲ្យ​មរណភាព​ជនរងគ្រោះ​ និង​បង្គាប់​ឲ្យ​រួម​គ្នា​សង​គ្រួសារ​ជនរងគ្រោះ​ ៦០ ​លាន​រៀល​។

រឿង​នេះ​ត្រូវ​សាលា​ឧទ្ធរណ៍​កែប្រែ​បទ​ចោទ សួន ដា ពី​បទ​លួច​មាន​ស្ថាន​ទម្ងន់​ទោស​បណ្តាល​ឲ្យ​មរណភាព​មក​បទ​ «​លួច​មាន​ស្ថាន​ទម្ងន់​ទោស​» ​និង​បន្ថយ​ទោស​ពី​ ២៥ ​ឆ្នាំ​មក​ ២០ ​ឆ្នាំ​វិញ បន្ទាប់ពី​ត្រូវ​តុលាការ​កំពូល​បង្វិល​ឲ្យ​ជំនុំជម្រះ​ម្តង​ទៀត​។

ជនជាប់ចោទ​ពី​ម្សិលមិញ​បាន​​ប្រកែក​មិន​ទទួល​ស្គាល់​រឿង​នេះ​ ខណៈ​លោក​ ឡោគីមហ្គេច ​មេធាវី​ការពារ​សិទ្ធិ​សន្និដ្ឋាន​ថា​រឿង​នេះ​កូនក្តី​លោក​ស្គាល់​ ឯល ភក្តី និង​ គឹម ចន្ធី ដោយសារ​លេង​បាល់​ជាមួយ​គ្នា​។

លោក​បន្ត​ថា​៖ «​ប្រសិន​កូនក្តី​ខ្ញុំ​រួម​គំនិត​សម្លាប់​ជនរងគ្រោះ​ប្រហែល​ជា​គាត់​រត់​បាត់​ហើយ​ព្រោះ​គាត់​ឃើញ​សមត្ថកិច្ច​ចាប់​ប្រពន្ធ​ ឯល ភក្តី ហើយ​ពេល​នោះ​គាត់​មក​រក ឯល ​ភក្តី ​ទៀត​តែ​គេ​គេច​ខ្លួន​។ ​សូម​តុលាការ​ដោះលែង​កូនក្តី​ខ្ញុំ​ផង​»​។

លោក​ព្រះរាជអាជ្ញា ឌុច គឹមសន តំណាង​មហាអយ្យការ​សន្និដ្ឋាន​ថា​៖ «​រឿង​នេះ​ដើម្បី​ផលប្រយោជន៍​ជន​ជាប់ចោទ​ខ្ញុំ​ស្នើ​​ហៅ គឹម ចន្ធី មក​ឆ្លើយ​តទល់​​ជាមួយ​ជន​ជាប់ចោទ​»​។

ក្រោយ​ជំនុំជម្រះ​លោក​ចៅក្រម​ ស៊ឹង ​បញ្ញាវុឌ្ឍ ​ប្រធាន​ក្រុមប្រឹក្សា​ជំនុំជម្រះ​ថ្លែង​ថា​សាលដីកា​នឹង​ប្រកាស​នៅ​ថ្ងៃ​ទី​ ១៣ ខែ​កញ្ញា​ខាង​មុខ​៕

0

Comments

Please, login or register to post a comment