Search form

Login - Register | FOLLOW US ON

Logo of Phnom Penh Post newspaper Phnom Penh Post - តុលាការ​កាត់ទោស​មនុស្ស​ ៥ ​នាក់​ឲ្យ​ជាប់​គុក​​ ៣០ ​ឆ្នាំ​ និង​មួយ​ជីវិត

តុលាការ​កាត់ទោស​មនុស្ស​ ៥ ​នាក់​ឲ្យ​ជាប់​គុក​​ ៣០ ​ឆ្នាំ​ និង​មួយ​ជីវិត

ភ្នំពេញ: កាលពី​ចុង​សប្ដាហ៍​មុន​តុលាការ​ក្រុង​ភ្នំពេញ​បាន​កាត់ទោស​ជន​ជាប់ចោទ​ ៥ ​នាក់​ដែល​អ្នក​ខ្លះ​ជាប់គុក​ ៣០ ​ឆ្នាំ​ និង​អ្នក​ខ្លះ​ទៀត​ជាប់គុក​មួយ​​ជីវិត​ដោយ​បាន​ពាក់ព័ន្ធ​ក្នុង​ការ​គប់​គ្រាប់បែក​ដើម្បី​សម្លាប់​មនុស្ស​នៅ​បណ្ដោយ​ផ្លូវ​ ១៦៣ សង្កាត់​បឹង​កេងកង​ ៣ ខណ្ឌ​​ចំការមន​ក្នុង​ទីក្រុង​ភ្នំពេញ​កាលពី​ខែ​កញ្ញា​ឆ្នាំ​ ២០១៦​។

លោក លី សុខឡេង ចៅក្រម​សាលា​ដំបូង​រាជធានី​ភ្នំពេញ​កាលពី​ថ្ងៃ​សុក្រ​បាន​កាត់​ទោស​ដាក់​ពន្ធនាគារ​មនុស្ស​ ៣ ​នាក់​ឲ្យ​ជាប់​ពន្ធនាគារ​មួយ​ជីវិត​ដែល​មាន​ឈ្មោះ សុខ គឹមលី អាយុ ៤១ ឆ្នាំ​ជា​ស្ត្រី​ជាប់​ចោទ​ពី​បទ​ផ្តើម​គំនិត​អំពើ​ឃាតកម្ម​គិត​ទុក​មុន​តាម​មាត្រា ២៨ និង​មាត្រា ២០០ ឈ្មោះ ប៊ុន ភក្តី អាយុ ៣២ ឆ្នាំ និង​ឈ្មោះ សាក់ ម៉ាប់ អាយុ ៣៦ ឆ្នាំ​ជាប់​ចោទ​ពី​បទ​ឃាតកម្ម​គិត​ទុក​មុន​តាម​មាត្រា ២០​។

ចំណែក​ជន​ជាប់ចោទ​ពីរ​នាក់​ទៀត​​មាន​ឈ្មោះ ឈ្មោះ ប៊ូ សុភាព (​ស្រី​) អាយុ ២៥ ឆ្នាំ និង​ឈ្មោះ នូ សំបាន អាយុ ៣៣ ឆ្នាំ​ត្រូវ​ជាប់​ ៣០ ​ឆ្នាំ​ពី​បទ​សមគំនិត​ក្នុង​អំពើ​ឃាតកម្ម​គិត​ទុក​មុន​តាម​មាត្រា ២៩ និង ២០០ នៃ​ក្រម​ព្រហ្មទណ្ឌ​។ នេះ​បើ​តាម​ការ​បញ្ជាក់​របស់​លោក ស៊ុយ សុខុន មេធាវី​ការពារ​ជន​ជាប់ចោទ សុខ គឹមលី​។

ហេតុការណ៍​ផ្ទុះ​គ្រាប់បែក​នេះ​បាន​ធ្វើឲ្យ​អ្នក​ដំណើរ​ ៤ ​នាក់​រងរបួស​។

លោក​មេធាវី ស៊ុយ សុខុន បាន​ថ្លែង​ថា​លោក​នឹង​ប្តឹង​​ឧទ្ធរណ៍​ដោយ​ការ​សម្រេច​នេះ​មិន​មាន​ភ័ស្តុតាង​គ្រប់គ្រាន់​​សម្រាប់​ដាក់​បន្ទុក​លើ​កូនក្តី សុខ គឹមលី ឡើយ​។ អា​រឿង​នេះ​អត់​មាន​ភ័ស្តុតាង​ជាក់ស្តែង​ដូចជា កាមេរ៉ា វីដេអូ ឬ​អ្នក​ឃើញ​ផ្ទាល់​ភ្នែក​។

លោក មេធាវី បាន​ថ្លែង​ថា​៖ «​ឥឡូវ​ខ្ញុំ​ដាក់​ទៅ​ឧទ្ធរណ៍​ហើយ​ពីព្រោះ​សំណុំ​រឿង​នេះ​គ្មាន​ភ័ស្តុតាង​ច្បាស់​ទេ​»៕

0

Comments

Please, login or register to post a comment