ភ្នំពេញៈ បុរសជាប់ចោទម្នាក់ដែលត្រូវសាលាឧទ្ធរណ៍ផ្តន្ទាទោស ២៥ ឆ្នាំពាក់ព័ន្ធបាញ់សម្លាប់អតីតប្រពន្ធរបស់ខ្លួនហើយបានប្តឹងសារទុក្ខនឹងទណ្ឌកម្មទោសនេះ នៅថ្ងៃទី ៣ មករានេះត្រូវតុលាការកំពូលហៅមកជំនុំជម្រះ។
ជនជាប់ចោទឈ្មោះ តូ វីសែល អាយុ ២៧ ឆ្នាំ ឯនារីរងគ្រោះឈ្មោះរស្មី ស្រីខួចមានកូនស្រីម្នាក់អាយុ ៦ ឆ្នាំរស់នៅភូមិត្រពាំងព្រីង ស្រុក-ខេត្ត ស្ទឹងត្រែង។
លោកស្រីចៅក្រមគិម សត្ថាវីប្រធានក្រុមប្រឹក្សាជំនុំជម្រះបានអានអង្គហេតុថា បុរសជាប់ចោទឈ្មោះ តូ វីសែល បានលែងលះជាមួយប្រពន្ធហើយ ហើយនៅថ្ងៃកើតហេតុទី ១០ ខែ មិនា ឆ្នាំ ២០១៥ បុរសជាប់ចោទបានមកពីខេត្ត រតនគីរី មកខេត្ត ស្ទឹងត្រែង។ ពេលមកដល់ឃើញអតីតប្រពន្ធកំពុងនិយាយទូរស័ព្ទជាមួយបុរសផ្សេងក៏មានចិត្តខឹងហើយបាញ់សម្លាប់តែម្តង។
សំណុំរឿងនេះ ត្រូវសាលាដំបូងខេត្ត ស្ទឹងត្រែង ផ្តន្ទាទោសដាក់ពន្ធនាគារ ១ ជីវិត ប៉ុន្តែបុរសជាប់ចោទមិនសុខចិត្តប្តឹងមកសាលាឧទ្ធរណ៍ ហើយត្រូវសាលាឧទ្ធរណ៍បន្ថយទោសមកនៅត្រឹម ២៥ ឆ្នាំ៕