Search form

Login - Register | FOLLOW US ON

Logo of Phnom Penh Post newspaper Phnom Penh Post - តុលាការ​ចាប់ផ្ដើម​សួរ​ចោរប្លន់​ ៧ នាក់

តុលាការ​ចាប់ផ្ដើម​សួរ​ចោរប្លន់​ ៧ នាក់

ភ្នំពេញៈ ក្រុម​​ចោរប្លន់​​ប្រដាប់​​អាវុធ​​ ៧ ​នាក់​ដែល​​សមត្ថកិច្ច​ក្រសួង​មហាផ្ទៃ​​ និង​នគរបាល​​ខេត្ត​កំពង់ស្ពឺ​បង្ក្រាប​បាន​នៅ​​ភ្នំពេញ និង​ខេត្ត​កំពង់ស្ពឺ​កាលពី​ថ្ងៃ​ទី​ ៦ ​​ខែ​មករា​​ហើយ​ត្រូវ​ក្រសួង​មហាផ្ទៃ​បញ្ជូន​មក​សាលា​​ដំបូង​រាជធានី​ភ្នំពេញ​ កាលពី​ព្រឹក​ម្សិលមិញ​ត្រូវ​អយ្យការ​បន្ត​​នីតិវិធី​ស៊ើបសួរ​មុន​ឈាន​ទៅ​ជំនុំ​ជម្រះ​​​ក្ដី​ពួកគេ​។

លោក​ លី សុផាន់ណា អ្នក​​នាំ​ពាក្យ​សាលា​ដំបូង​រាជធានី​ភ្នំពេញ​បាន​ប្រាប់​តាម​សារ​អេឡិចត្រូនិក​យ៉ាង​ខ្លី​ថា​ករណី​ក្រុម​ចោរប្លន់​ ៧ ​នាក់​នោះ​អយ្យការ​កំពុង​តែ​ចាត់​ការ​ហើយ​។

លោក​បាន​បញ្ជាក់​ក្នុង​សារ​នោះ​ថា​៖ «​អយ្យការ​បាន​ទទួល​សំណុំ​រឿង​ដែល​បញ្ជូន​ពី​នាយកដ្ឋាន​នគរបាល​ព្រហ្មទណ្ឌ​ក្រសួង​មហាផ្ទៃ​នោះ​កំពុង​ធ្វើ​ចំណាត់ការ​ពេល​នេះ​»​។

តាម​របាយការណ៍​សមត្ថកិច្ច​បង្ហាញ​ថា​ក្រុម​ជន​សង្ស័យ​ទាំង​​ ៧ ​​នាក់​នោះ​សុទ្ធ​តែ​​ប្រុស ទី​ ១​-ឈ្មោះ អ៊ី សុភ័ណ្ឌ អាយុ ៣៥ ឆ្នាំ ជា​អ្នក​កាន់​កាំភ្លើង​ភ្ជង់ និង​បាញ់​ជនរងគ្រោះ ទី ២-ស៊ុន ប៊ុនធឿន អាយុ​ ៣៥​ ឆ្នាំ ទី ៣- សាត ធឹម អាយុ​ ៣៨ ​ឆ្នាំ ២ នាក់​នេះ​ជា​អ្នក​ចូលរួម​ធ្វើ​សកម្មភាព និង​ជា​អ្នក​ប្រមូល​ទ្រព្យ​សម្បត្តិ​ក្នុង​អំពើ​ប្លន់​ ទី ៤- អឿន សុផា អាយុ ៣៣ ឆ្នាំ ជា​អ្នក​ឌុប​បក្ខពួក​ទម្លាក់​នៅ​តាម​​គោលដៅ​ដើម្បី​​ធ្វើ​សកម្មភាព​ទី ៥.-ហម ហាន អាយុ​ ៤៤ ឆ្នាំ ទី ៦- មាស ធឹម អាយុ​ ៣៦ ឆ្នាំ ២ នាក់​នេះ​ជា​អ្នក​ដើរ​ស៊ើប​មើល​ផ្ទះ​ជនរងគ្រោះ​ដើម្បី​កំណត់​ឲ្យ​បក្ខពួក​ធ្វើ​សកម្មភាព និង​ទី ៧-ស្វាយ តាក់ ហៅ ច អាយុ​ ៣៨ ​ឆ្នាំ​ជា​អ្នក​ធ្វើ​សកម្មភាព។

លោក ហ៊ុន សុហុន អធិការ​ស្រុក​ថ្ពង ខេត្ត​​កំពង់ស្ពឺ​បាន​​រំឭក​ថា​​ការ​បង្ក្រាប​ក្រុម​ចោរប្លន់​នេះ​លោក​បាន​ចូលរួម​ជាមួយ​សមត្ថកិច្ច​ក្រសួង​មហាផ្ទៃ​ព្រោះ​ជនសង្ស័យ​​​ ២ ​នាក់​រស់នៅ​ក្នុង​ដែនដី​របស់​លោក​។ ​ប៉ុន្តែ​លោក​មិនមែន​ជា​ម្ចាស់​ករណី​ទេ​ ខណៈ​ក្រុម​ចោរ​បាន​ធ្វើ​សកម្មភាព​​ប្លន់​នៅ​​ភ្នំពេញ​។​

លោក​ថា​ សមត្ថកិច្ច​បាន​បង្ក្រាប​ក្រុម​ជនសង្ស័យ​តាំងពី​ព្រឹក​ថ្ងៃ​ ទី​ ៦ ខែ​មករា​រហូត​ដល់​ល្ងាច​ថ្ងៃ​ដដែល​នៅក្នុង​ស្រុក​ថ្ពង​ដោយ​​​​ចាប់​ជនសង្ស័យ​បាន​ ២ ​នាក់​បន្ទាប់មក​នាំ​ទៅ​ឆែកឆេរ​ផ្ទះ​បាន​កាំភ្លើង​អាកាស្វ័យ​បត់​ ១ ​ដើម​ និង​គ្រាប់​ ១ បង់​មាន​ ៣០ ​គ្រាប់​។​ ស្រុក​ឱរ៉ាល់​​ឃាត់​ខ្លួន​បាន​ម្នាក់​រឹបអូស​​អាវុធ​ ១ ​ដើម។ សមត្ថកិច្ច​បន្ត​ទៅ​ចាប់​បាន​ ២ ​នាក់​ទៀត​នៅ​​ស្រុក​ឧដុង្គ​ និង​នៅ​ឃុំ​​ត្រែងត្រយឹង​ ស្រុក​ភ្នំស្រួច​បាន​ម្នាក់​ទៀត​​ និង​នៅ​​ភ្នំពេញ​បាន​ម្នាក់​​។

ពាក់ព័ន្ធ​ករណី​ប្លន់​ប្រដាប់​អាវុធ​នេះ​លោកស្រី​ថៃ​នាយ​ប៉ុស្តិ៍​នគរបាល​ស្តីទី​សង្កាត់​ស្នោរ​ក្នុង​ខណ្ឌ​ពោធិ៍សែនជ័យ​ប្រាប់​ពី​ម្សិលមិញ​ថា​បុរស​រងគ្រោះ​ឈ្មោះ​ រី​ សុភាព​ អាយុ​ ៤៥ ​ឆ្នាំ​ត្រូវ​ក្រុម​ចោរ​បាញ់​ត្រូវ​មួយ​គ្រាប់​បាក់​ឆ្អឹង​កែង​ដៃ​​ និង​ប្លាត​ត្រូវ​ធ្លាយ​ពោះ​ដាច់​ពោះវៀន​ធំ​ស្លាប់​បន្ទាប់ពី​ចូល​ព្យាបាល​ក្នុង​មន្ទីរពេទ្យ​បាន​ ៣ ​ថ្ងៃ​។

លោក​ប្រាប់​ថា​៖ ​«​ក្រុម​គ្រួសារ​អ្នក​ស្លាប់​បាន​ដាក់​ពាក្យ​បណ្តឹង​អស់​ហើយ​តាំងពី​ថ្ងៃ​កើត​ហេតុ​ទី​ ២៦ ​ខែ​ធ្នូ​មក​ម្ល៉េះ ឯ​ម្ចាស់​ផ្ទះ​រងគ្រោះ​ក៏​ដាក់​ពាក្យ​ប្តឹង​មក​ប៉ុស្តិ៍​ដូច​គ្នា​»​។

លោក​ សេង ជៀន ចៅ​សង្កាត់​ស្នោរ​ប្រាប់​ពី​ម្សិលមិញ​ដែរ​ថា​ជនរងគ្រោះ​កាលពី​មិន​ទាន់​ស្លាប់​ អាជ្ញាធរ​សង្កាត់​ខណ្ឌ​ពោធិ៍សែនជ័យ​ និង​សាលា​រាជធានី​ភ្នំពេញ​បាន​ជួយ​ជាង​ ៥ លាន​រៀល​ និង​ ២០០ ​ដុល្លារ​ផង​ដែរ​។

អ្នកស្រី​ ភី​ ធឿន​ អាយុ​ ៣៦ ​ឆ្នាំ​ និង​ប្តី​ឈ្មោះ​ កែម កន អាយុ​ ៤៤ ​ឆ្នាំ​រស់នៅ​ភូមិ​ព្រៃ​ក្រាយ​សង្កាត់​ស្នោរ​បាន​រំឭក​ប្រាប់​ថា​មុន​កើត​ហេតុ​វេលា​ម៉ោង​ជិត​ ៨ ​យប់​លោក​ និង​ប្រពន្ធ​កំពុង​អង្គុយ​មើល​ទូរទស្សន៍​ឯ​កូន​ ៣ ​នាក់​ទៀត​នៅ​ក្នុង​បន្ទប់​ក៏​ស្រាប់​តែ​មាន​បុរស​ម្នាក់​ចូល​ក្នុង​ផ្ទះ​យក​ដៃ​កេះ​ខ្នង​គាត់​ហើយ​គាត់​​សួរ​ថា​រក​អី​។ ​ពេល​នោះ​ជនសង្ស័យ​ម្នាក់​ថា​កុំ​មាត់​ប្រយ័ត្ន​ស្លាប់​។ ​បន្ទាប់​មក​គាត់​ឃើញ​ក្រុម​ចោរ​មាន​គ្នា​ ៧ ​នាក់​ និង​កាន់​កាំភ្លើង​វែង​ ៦ ​ដើម​ចាប់​ពួកគាត់​ និង​កូន​ប្រុស​ស្រី​ចង​ស្លាប​សេក​ឲ្យ​ដេក​ផ្កាប់​មុខ​។

អ្នកស្រី​បន្ត​ថា​បន្ទាប់មក​ជនសង្ស័យ​ម្នាក់​បាន​កាន់​កណ្តៀវ​ភ្ជង់​ត្រង់​ក​កូនស្រី​គាត់​សួរ​រក​សោ​ទូ​ហើយ​ក៏​រើ​កកាយ​បាន​​លុយ​ ៤០០ ​ដុល្លារ ​ខ្សែ​ក​ប្លាទីន​ ៥ ​ជី​ និង​កងដៃ​ប្លាទីន​ ១ ​គូ​ផង​។ ​​ពេល​នោះ​ជន​រងគ្រោះ​ឈ្មោះ រីសុភាព បាន​កាន់​កាំភ្លើង​ខ្យល់​ចូល​ទៅ​ជួយ​ហើយ​ក៏​ត្រូវ​ក្រុម​ចោរ​បាញ់​ ១ ​គ្រាប់​ត្រូវ​កែង​ដៃ​ប្លាត​ត្រូវ​ធ្លាយ​ពោះ​ទៀត​ហើយ​ត្រូវ​អ្នកភូមិ​ដឹក​ទៅ​មន្ទីរពេទ្យ​ព្រះកុសុមៈ​។​ ចំណែក​គាត់​ត្រូវ​ក្រុម​ចោរ​ទាត់​ ២ ​ជើង និង​កូនប្រុស​ត្រូវ​មួយ​ជើង​ចំ​កញ្ចឹង​ក​បន្ទាប់មក​ពួកចោរ​ក៏​រត់​គេច​ខ្លួន​បាត់​អស់​៕

0

Comments

Please, login or register to post a comment

ព័ត៌មានពាក់ព័ន្ធ