Search form

Login - Register | FOLLOW US ON

Logo of Phnom Penh Post newspaper Phnom Penh Post - បុរស​ពាក់ព័ន្ធ​ថ្នាំញៀន​ ១០០ ​ក្រាម​នៅ​តែ​ជាប់​ទោស​ ៥ ​​ឆ្នាំ

បុរស​ពាក់ព័ន្ធ​ថ្នាំញៀន​ ១០០ ​ក្រាម​នៅ​តែ​ជាប់​ទោស​ ៥ ​​ឆ្នាំ

ភ្នំពេញៈ សាលា​ឧទ្ធរណ៍​ពី​ម្សិលមិញ​បាន​ប្រកាស​សាលដីកា​តម្កល់​សាលក្រម​ឲ្យ​ជន​ជាប់ចោទ​ម្នាក់​ជាប់គុក​ ៥ ​ឆ្នាំ​ដដែល​ពាក់ព័ន្ធ​ជួញដូរ​គ្រឿងញៀន​ ១០០ ​ក្រាម​បន្ទាប់ពី​បើក​សវនាការ​ជំនុំជម្រះ​កាលពី​ថ្ងៃ​ទី​ ៣០ ​សីហា​។

លោក​ចៅក្រម​ ស៊ិន វិសាល ប្រធាន​ក្រុម​ប្រឹក្សា​ជំនុំជម្រះ​ថ្លែង​ក្នុង​បន្ទប់​សវនាការ​ថា​៖ «​សំណុំ​រឿង​ដែល​មាន​ជន​ជាប់ចោទ​ឈ្មោះ​ ជិន ប៊ុនណា ក្រោយពី​ពិភាក្សា​តុលាការ​សម្រេច​តម្កល់​សាលក្រម​របស់​សាលា​ដំបូង​រាជធានី​ភ្នំពេញ​ទុក​ជា​បាន​ការ​ដដែល​»​។

ឆ្លើយ​ក្នុង​សវនាការ​កាលពី​ថ្ងៃ​ជំនុំ​ជម្រះ​​ជន​ជាប់ចោទ​ឈ្មោះ​ ជិន ប៊ុនណា បាន​និយាយ​ថា​គាត់​ធ្លាប់​ជាប់គុក​ម្តង​កាលពី​​ឆ្នាំ​ ២០១០ ​ពី​បទ​ប្រើប្រាស់​គ្រឿងញៀន​។

ចំពោះ​ថ្ងៃ​កើត​ហេតុ​ ១៤ ​មករា​ឆ្នាំ​ ២០១៦ ពេល​គាត់​កំពុង​ជញ្ជូន​កម្ទេច​ថ្ម ស្រាប់តែ​មាន​រថយន្ត​ ១ ​គ្រឿង​ហើយ​អ្នក​ជិះ​រថយន្ត​សុទ្ធ​តែ​ស្លៀកពាក់​ស៊ីវិល​មក​ឈប់​មុខ​ផ្ទះ​គាត់ ហើយ​មាន​ម្នាក់​ឈ្មោះ​ ហៃ ធា ដែល​ធ្លាប់​ចេញ​ចូល​ផ្ទះ​របស់​គាត់​បាន​ស្ទុះ​ចូល​ផ្ទះ បន្ទាប់មក​ក៏​ចេញ​មក​វិញ​។

ជន​ជាប់ចោទ​បន្ត​ថា​ពេល​ឈ្មោះ ហៃធា ចេញ​មក​ក្រៅ​ក៏​ស្រាប់តែ​មនុស្ស​ស្លៀកពាក់​ស៊ីវិល​មក​សម្លុត​ថា​គាត់​លាក់​គ្រឿងញៀន​នៅ​ចង្ក្រាន​បាយ ប៉ុន្តែ​គាត់​ថា​អត់​មាន​ទេ តែ​នគរបាល​ថា​បើ​គេ​រកឃើញ​តើ​ធ្វើ​ម៉េច​? ​ពេល​នោះ​សមត្ថកិច្ច​នាំ​គាត់​ចូល​ទៅ​ផ្ទះ​បាយ​ហើយ​រកឃើញ​គ្រឿងញៀន​មេ​តំហ្វេតាមីន​កន្លះ​ថង់​ស្មើ​នឹង​ជាង​ ១០០ ​ក្រាម​។

ទោះ​យ៉ាង​ណា​បើ​តាម​របាយការណ៍​នគរបាល​ថា​មុន​ចាប់​ខ្លួន​សមត្ថកិច្ច​បាន​ឃាត់​ខ្លួន​ឈ្មោះ​ ហៃ ធា ​ហើយ​ប្រាប់​ ហៃ ធា ​ថា​បើ​សហការ​ប្រាប់​មេខ្លោង​សមត្ថកិច្ច​នឹង​ដោះលែង ហើយ​ ហៃ ធា បាន​នាំ​សមត្ថកិច្ច​ទៅ​ដល់​ផ្ទះ​ជន​ជាប់ចោទ​នៅ​ម្តុំ​ផ្លូវ​ជា​សុផារ៉ា​។ ​ប៉ុន្តែ​បុរស​រូប​នេះ​ក៏​ត្រូវ​សមត្ថកិច្ច​ដោះលែង​តាម​សន្យា​ដែរ​។

សំណុំ​រឿង​នេះ​ត្រូវ​សាលា​ដំបូង​រាជធានី​ភ្នំពេញ​ប្រកាស​សាលក្រម​នៅ​ថ្ងៃ​ទី​ ១៦ ​ខែ​កញ្ញា​ឆ្នាំ​ ២០១៦ ​ផ្តន្ទាទោស​ជន​ជាប់ចោទ​​ ៥ ​ឆ្នាំ និង​ពិន័យ​ប្រាក់​​ ១០ ​លាន​រៀល​ចូល​ថវិការដ្ឋ​។ ​ចោទ​បទ​ «​ជួញដូរ​គ្រឿងញៀន​ខុស​ច្បាប់ » ៕

0

Comments

Please, login or register to post a comment