Search form

Login - Register | FOLLOW US ON

Logo of Phnom Penh Post newspaper Phnom Penh Post - ម្ចាស់​ឡាន​​បុក​គ្នា​របួស​ ៨ ​នាក់​មិន​ទាន់​ចូល​ដោះស្រាយ

Content image - Phnom Penh Post
រថយន្ត​ពីរ​គ្រឿង​ដែល​បុក​គ្នា​បណ្តាល​ឲ្យ​រងរបួស​ ៨ ​នាក់​កាលពី​ល្ងាច​ថ្ងៃ​សៅរ៍​​។ រូបថត សហការី

ម្ចាស់​ឡាន​​បុក​គ្នា​របួស​ ៨ ​នាក់​មិន​ទាន់​ចូល​ដោះស្រាយ

សៀមរាបៈ គិត​មក​ដល់​ត្រឹម​ថ្ងៃ​អង្គារ​ម្សិលមិញ​ភាគី​រថយន្ត​តាក់ស៊ី និង​ភាគី​រថយន្ត Luxus RX300 ដែល​បុក​គ្នា​នៅ​លើ​កំណាត់​ផ្លូវ​ជាតិ​លេខ​ ៦៧ ក្នុង​ភូមិ​ទួលគ្រោះ​បណ្តាល​ឲ្យ​មនុស្ស​យ៉ាង​ហោច​ណាស់​ ៨ ​នាក់​រងរបួស​កាលពី​ល្ងាច​ថ្ងៃ​សៅរ៍​នៅ​មិន​ទាន់​ចូល​ខ្លួន​ទៅ​​ដោះស្រាយ​នៅ​ឡើយ​ទេ ខណៈ​រថយន្ត​ទាំង​ពីរ​គ្រឿង​កំពុង​ត្រូវ​បាន​រក្សា​ទុក​នៅ​ប៉ុស្តិ៍​នគរបាល​ឃុំ ឃុនរាម ស្រុក​បន្ទាយស្រី​។

លោក រស់ ស៊ីសុវណ្ណា អធិការរង​ស្រុក​បន្ទាយស្រី​ទទួល​បន្ទុក​ផ្នែក​ចរាចរណ៍​បាន​​ឲ្យ​ដឹង​កាលពី​ម្សិលមិញ​ថា​ក្នុង​ហេតុការណ៍​នោះ​ខាង​រថយន្ត​កាមរី [រថយន្ត​តាក់ស៊ី] ​បើកបរ​ដោយ​ឈ្មោះ ឡុង ឡូញ អាយុ ៤៥​ ឆ្នាំ រស់នៅ​ស្រុក​អន្លង់វែង​រងរបួស​បាក់​ជើង​ទាំង​សង​ខាង ខណៈ​អ្នក​ដំណើរ​ ៤ នាក់​ផ្សេង​ទៀត​ដែល​ជិះ​ក្នុង​រថយន្ត​នោះ​រួម​មាន​​ឈ្មោះ ទិត្យ មុន្នី ភេទ​ស្រី អាយុ​ ៥៦ ​ឆ្នាំ​រស់នៅ​ភូមិ​ស្វាយដង្គំ សង្កាត់​ស្វាយដង្គំ ក្រុង​សៀមរាប និង​ចៅប្រុស​របស់​គាត់​ឈ្មោះ ស៊ីន ឧត្តមវឌ្ឍនៈ អាយុ​ ២​ ឆ្នាំ ព្រម​ទាំង​កូនប្រុស​គាត់​ ២ នាក់​ទៀត​ម្នាក់​ឈ្មោះ ស្រី ចន្ថា អាយុ ​៣៣ ​ឆ្នាំ និង​ម្នាក់​ទៀត​ឈ្មោះ ស្រី ចន្ទី អាយុ​ ៣១ ​ឆ្នាំ​បាន​រងរបួស​ធ្ងន់​។

ចំណែក​ខាង​រថយន្ត Luxus បើកបរ​ដោយ​ឈ្មោះ ដូ ចេងហុង ភេទ​ប្រុស អាយុ​ ៥០ ​ឆ្នាំ​មុខរបរ​ដឹក​ភ្ញៀវ (​របួស​បាក់​ស្មង​ជើង​ស្តាំ​) និង​អ្នក​រួម​ដំណើរ​​ជាមួយ​ ២ ​នាក់​ម្តាយ​កូន​ជា​ជនជាតិ​ថៃ​ឈ្មោះ PAPA ISARA អាយុ​ ៤១ ​ឆ្នាំ និង​កូនស្រី​ឈ្មោះ SARAH BEIH អាយុ​ ៨ ​ឆ្នាំ​របួស​ស្រាល​​។

លោក​បញ្ជាក់​ថា៖ «យោង​តាម​ការ​វាស់វែង​នៅ​កន្លែង​កើតហេតុ​រថយន្ត​តាក់ស៊ី​បាន​បើក​ចូល​ទៅ​ក្នុង​គន្លង​ផ្លូវ​របស់​រថយន្ត​ Luxus។

ទោះជា​បែប​ណា​ក្ដី​សមត្ថកិច្ច​យើង​បាន​ត្រឹម​តែ​ជួយ​អន្តរាគមន៍​នាំ​យក​ជនរងគ្រោះ​ទៅ​ព្យាបាល និង​អូស​រថយន្ត​ទាំង​ពីរ​ទៅ​រក្សា​ទុក រង់ចាំ​ការ​ដោះស្រាយ​ពី​គូភាគី​ទាំង​ពីរ និង​កសាង​សំណុំ​រឿង​បញ្ជូន​ទៅ​តុលាការ​ដើម្បី​ដោះស្រាយ​តាម​ផ្លូវ​ច្បាប់​ក្នុង​ករណី​ភាគី​ទាំង​ពីរ​មិន​ចុះ​សម្រុង​គ្នា»។

លោក​បាន​បន្ត​ថា​គិត​មក​ដល់​រសៀល​ថ្ងៃ​អង្គារ​ម្សិលមិញ​ភាគី​ទាំង​ពីរ​នៅ​មិន​ទាន់​ចូល​មក​​ដោះស្រាយ​នៅ​ឡើយ​​​ទេ ខណៈ​រថយន្ត​ទាំង​ពីរ​កំពុង​ត្រូវ​បាន​រក្សា​ទុក​នៅ​ប៉ុស្តិ៍​នគរបាល​ឃុំ​ឃុនរាម។

បច្ចុប្បន្ន​បញ្ហា​គ្រោះថ្នាក់​ចរាចរណ៍​គឺជា​កង្វល់​ដ៏ធំ​មួយ​នៅ​ក្នុង​សង្គម​កម្ពុជា ខណៈ​ដែល​ក្នុង​មួយ​ថ្ងៃ​មាន​មនុស្ស​ប្រមាណ​ ៦ ​នាក់​បាន​ស្លាប់​ដោយសារ​គ្រោះថ្នាក់​ចរាចរណ៍​នេះ​។ តាម​របាយការណ៍​មូលហេតុ​ដែល​បណ្តាល​ឲ្យ​កើត​មាន​គ្រោះថ្នាក់​ចរាចរណ៍​គឺ​ដោយសារ​តែ​អ្នក​បើកបរ​មួយ​ចំនួន​មិន​គោរព​ច្បាប់​បើក​លើស​ល្បឿន​កំណត់៕

0

Comments

Please, login or register to post a comment