Search form

Login - Register | FOLLOW US ON

Logo of Phnom Penh Post newspaper Phnom Penh Post - យុវជន​ ៥ ​នាក់​ត្រូវ​ចាប់​ខ្លួន​ពី​បទ​រំលោភ​បូក​លើ​ក្មេង​ស្រី​ម្នាក់

យុវជន​ ៥ ​នាក់​ត្រូវ​ចាប់​ខ្លួន​ពី​បទ​រំលោភ​បូក​លើ​ក្មេង​ស្រី​ម្នាក់

ព្រះសីហនុៈ នគរបាល​ស្រុក​កំពង់សិលា​បាន​ចាប់​ខ្លួន​យុវជន​ ៥ នាក់​ដែល​ត្រូវ​បាន​ចោទប្រកាន់​ពី​បទរំលោភ​បូក​ទៅលើ​ក្មេងស្រី​អាយុ​ ១៣ ​ឆ្នាំ​ម្នាក់​ហើយ​នគរបាល​កំពុង​ស្វែងរក​ចាប់​ជនសង្ស័យ​ម្នាក់​ទៀត​ដែល​កំពុង​គេច​ខ្លួន​ខណៈ​ដែល​ជនសង្ស័យ​ ២ ​នាក់​ត្រូវ​បាន​ដោះលែង​ដោយសារ​មិន​បាន​ជាប់​ពាក់ព័ន្ធ​នៅក្នុង​ករណី​នេះ​។

លោក នួន ហុង អធិការរង​នគរបាល​ស្រុក​កំពង់សិលា​បាន​ថ្លែង​កាលពី​ម្សិលមិញ​ថា​ជនរងគ្រោះ​ជា​សិស្ស​វិទ្យាល័យ​ហើយ​កាលពី​ថ្ងៃ​អាទិត្យ​​​សប្តាហ៍​មុន​នាង​បាន​សុំ​ឲ្យ​មិត្តភក្តិ​របស់​នាង​ពីរ​នាក់​​នាំ​នាង​ទៅ​ជួប​ជាមួយ​នឹង​​មិត្តភក្តិ​ប្រុស​​​ថ្មី​​ដែល​ទើប​ស្គាល់​គ្នា​តាម​ហ្វេសប៊ុក។

«​មិត្តភក្តិ​របស់​ជនរងគ្រោះ​បាន​នាំ​​នាង​ទៅ​ជួប​មិត្តភក្តិ​ប្រុស​ពីរ​នាក់​​របស់​នាង​ហើយ​បន្ទាប់មក​នាង​បាន​​ឡើង​ម៉ូតូ​ជាមួយ​មិត្តភក្តិ​យុវវ័យ​ប្រុស​ទាំងនោះ​ដោយ​មិន​បាន​ប្រាប់​មិត្តភក្តិ​របស់​នាង​ថា​ទៅ​កន្លែង​ណា​នោះ​ទេ​។ មិត្តភក្តិ​ជនរងគ្រោះ​បាន​ត្រឡប់​ទៅ​ផ្ទះ​ប៉ុន្តែ​ម្តាយ​របស់​ជនរងគ្រោះ​បាន​សួរ​ពួកគេ​ថា​តើ​​កូនស្រី​របស់​គាត់​​​ទៅ​ណា?​ ហើយ​​គាត់​បាន​ប្តឹង​ទៅ​នគរបាល​របស់​យើង​ហើយ​យើង​បាន​ចាប់ផ្តើម​ស៊ើបអង្កេត​​រហូត​ដល់​​ចាប់​ខ្លួន​ជនសង្ស័យ​ ៥ ​នាក់​ហើយ​ឥឡូវ​នេះ​យើង​កំពុង​ស្វែងរក​ជនសង្ស័យ​ម្នាក់​ទៀត​»។ ​

លោក​បាន​ថ្លែង​ថា ​ជនសង្ស័យ​មាន​អាយុ​គឺ​ចន្លោះ​ពី​ ១៥ ​ទៅ​ ១៧ ​ឆ្នាំ​​។ «​មិត្តភក្តិ ២ ​នាក់​របស់​ជនរងគ្រោះ​មិន​ពាក់ព័ន្ធ​ក្នុង​ករណី​នេះ​ទេ​ហើយ​​យើង​​អាច​ចាប់​ខ្លួន​ជនសង្ស័យ​​​ និង​ជួយ​សង្គ្រោះ​ជនរងគ្រោះ​ដោយសារ​មិត្តភក្តិ​ ២ ​នាក់​របស់​នាង​មាន​លេខ​ទូរស័ព្ទ​​​របស់​ជនសង្ស័យ​ម្នាក់​ក្នុង​ចំណោម​ជនសង្ស័យ​ទាំងនោះ​ពីព្រោះ​ជនរងគ្រោះ​បាន​ខ្ចី​ទូរស័ព្ទ​ដើម្បី​ទូរស័ព្ទ​ទៅ​ជនសង្ស័យ​​»។ «​យើង​បាន​សុំ​ឲ្យ​ក្មេងស្រី​ទាំង​ពីរ​នាក់​ជួយ​​​ទូរស័ព្ទ​​ទៅ​ជនសង្ស័យ​​រហូត​ដល់​យើង​អាច​រកឃើញ​កន្លែង​​របស់​ពួកគេ​»។

លោក នួន ហុង បាន​ថ្លែង​ថា​លោក​បាន​ចាប់​ខ្លួន​ពួកគេ​ និង​បាន​កសាង​​ឯកសារ​ដើម្បី​បញ្ជូន​​ជនសង្ស័យ​​ទាំង​ ៥ ​នាក់​​ទៅ​​នគរបាល​ខេត្ត​ដែល​ទទួល​បន្ទុក​ករណី​​ជួញដូរ​មនុស្ស​ និង​ការពារ​អនីតិជន​។

លោក​បន្ត​ថា​៖ «​​នាង​ត្រូវ​បាន​ឃុំ​ខ្លួន​ និង​រំលោភ​ដោយ​ជនសង្ស័យ​​រយៈពេល​ ២ ​ថ្ងៃ​ហើយ​យើង​បាន​ចាប់​ខ្លួន​ពួកគេ​នៅ​ថ្ងៃ​ទី​ ១១ សីហា​»។

លោកស្រី ប៉ែន កញ្ញា ស្នងការ​រង​ខេត្ត​ព្រះសីហនុ​ដែល​ទទួល​បន្ទុក​ផ្នែក​ប្រឆាំង​ការ​ជួញដូរ​មនុស្ស​​ និង​ការពារ​អនីតិជន​បាន​ថ្លែង​កាល​ម្សិលមិញ​ថា​លោកស្រី​មិន​បាន​​បញ្ជូន​​​ជនរងគ្រោះ​ទៅ​​មន្ទីរ​សង្គមកិច្ច​ខេត្ត​ទេ ប៉ុន្តែ​នាង​ត្រូវ​បាន​បញ្ជូន​ទៅ​ព្យាបាល​នៅ​មន្ទីរពេទ្យ​។

លោកស្រី​បន្ត​ថា​៖ «​មនុស្ស​បី​នាក់​បាន​រំលោភ​នាង​ហើយ​សុខភាព​របស់​នាង​ខ្សោយ​ហេតុ​ដូចនេះ​នាង​ត្រូវការ​ពេល​​ព្យាបាល​សុខភាព​»។

មន្រ្តី​នគរបាល​ខេត្ត​ម្នាក់​ដែល​សុំ​មិន​បញ្ចេញ​ឈ្មោះ​បាន​ថ្លែង​កាល​ម្សិលមិញ​ថា​ជនសង្ស័យ​ទាំង​ ៥​ នាក់​​ត្រូវ​បាន​បញ្ជូន​ទៅ​សាលា​ដំបូង​ខេត្ត​កាល​ថ្ងៃ​ព្រហស្បតិ៍​សប្តាហ៍​មុន​ប៉ុន្តែ​ ៣ ​នាក់​ក្នុង​ចំណោម​ពួកគេ​​ត្រូវ​បាន​ចោទប្រកាន់​ និង​​បញ្ជូន​ទៅ​ឃុំ​ខ្លួន​នៅ​ពន្ធនាគារ​។

លោក​បាន​ថ្លែង​ថា​៖ «​​មនុស្ស​ពីរ​នាក់​ត្រូវ​បាន​ដោះលែង​ដោយសារ​ពួកគេ​មិន​បាន​ពាក់ព័ន្ធ​ក្នុង​​ការ​រំលោភ​ហើយ​ជនរងគ្រោះ​បាន​ប្រាប់​នគរបាល​ថា​មាន​តែ​ជនសង្ស័យ​បួន​នាក់​ប៉ុណ្ណោះ​ដែល​ម្នាក់​កំពុង​រត់​គេច​ខ្លួន​បាន​រំលោភ​នាង​ហើយ​ពីរ​នាក់​ទៀត​មិន​ពាក់ព័ន្ធ​ទេ​ដូច្នេះ​យើង​ដោះលែង​ពួកគេ​ឲ្យ​មាន​សេរីភាព​»៕ PS

0

Comments

Please, login or register to post a comment

ព័ត៌មានពាក់ព័ន្ធ