ភ្នំពេញៈ សមត្ថកិច្ចនៅមិនទាន់កំណត់អត្តសញ្ញាណខ្មាន់កាំភ្លើងដែលបានបាញ់យុវជនម្នាក់ត្រូវក្បាលរបួសធ្ងន់កាលពីព្រលប់ថ្ងៃទី ១ មករានៅគល់ស្ពានលីយ៉ុងផាត់ក្នុងសង្កាត់ខណ្ឌព្រែកព្នៅ រាជធានីភ្នំពេញនោះទេដោយសារគ្មានសាក្សីនៅកន្លែងកើតហេតុ ខណៈជនរងគ្រោះគ្មានសង្ឃឹមថានឹងរស់នោះ។
នៅពេលទាក់ទងសុំការបំភ្លឺទៅអធិការនគរបាលខណ្ឌឫស្សីកែវលោក ទៀង ច័ន្ទសា កាលពីម្សិលមិញមិនបានលទ្ធផលទេ ខណៈអ្នកលើកទូរស័ព្ទប្រាប់ថាច្រឡំលេខ។
ទោះយ៉ាងណាលោក ហ៊ឹម គឹមសាន នាយនគរបាលប៉ុស្តិ៍ស្វាយប៉ាកប្រាប់ថាករណីឃាតកម្មនេះសមត្ថកិច្ចនៅរកមិនឃើញមូលហេតុពិតនៅឡើយទេ។
លោកបានប្រាប់ថា៖ «រឿងនេះយើងរកមូលហេតុពិតមិនទាន់ឃើញទេ សូម្បីតែភិនភាគជនសង្ស័យក៏មិនដឹងថាយ៉ាងម៉េចដែរ»។
លោកបន្តថាមុនកើតហេតុជនរងគ្រោះមានគ្នា ៣ នាក់ ឯ ២ នាក់ជាប្តីប្រពន្ធហើយបានជិះម៉ូតូឌុបគ្នាមកម្តុំគល់ស្ពានលីយ៉ុងផាត់ ខាងលិច។ ប៉ុន្តែពេលកំពុងធ្វើដំណើរស្រាប់តែម៉ូតូក្រុមជនរងគ្រោះបានបែកកង់ក៏នាំគ្នាចុះដើរ។ លុះពេលជនរងគ្រោះម្នាក់កំពុងបណ្តើរម៉ូតូទៅមុខ ២ នាក់ជាប្តីប្រពន្ធបានប្រហែល ២០ ម៉ែត្រស្រាប់តែឮស្នូរកាំភ្លើង ឯជនរងគ្រោះក៏ដួលតែម្ដង។
លោក គឹម សាន បញ្ជាក់ថាក្រោយកើតហេតុសមត្ថកិច្ចបានហៅប្តីប្រពន្ធមកសួរដើម្បីកំណត់អត្តសញ្ញាណជនដៃដល់ តែជនរងគ្រោះថាពួកគេមិនដឹងថាជនល្មើសមានប៉ុន្មាននាក់ទេហើយក៏មិនឃើញច្បាស់ដែរព្រោះយប់ងងឹត។
ស្ត្រីឈ្មោះ ស៊ុំ គឹមស្រស់ ជាបងជនរងគ្រោះប្រាប់ពីម្សិលមិញថាប្អូនគាត់ឈ្មោះ ស៊ុំ គឹមស្រ៊ីម អាយុ ២០ ឆ្នាំរស់នៅភូមិព្រែកតាមែ ឃុំកំពង់អូស ស្រុកពញាឮខេត្តកណ្តាលទើបប្រឡងធ្លាក់ថ្នាក់ទី ១២ ហើយមកជួយធ្វើស្រែឪពុកម្តាយ។
គឹមស្រស់ ប្រាប់ថាមុនកើតហេតុប្អូនគាត់បានសុំម្តាយថាចេញទៅដើរលេងបុណ្យឆ្លងឆ្នាំសកលហើយក្រោយមកម្តាយគាត់ទូរស័ព្ទមិនចូល។ ពេលនោះម្តាយគាត់បានទូរស័ព្ទប្រាប់គាត់ដើម្បីតេសួររកប្អូន ហើយពេលគាត់ទូរស័ព្ទចូលស្រាប់តែមានអ្នកផ្សេងលើកហើយប្រាប់ថា គឹមស្រ៊ីម ត្រូវគេបាញ់ហើយក៏ដឹកទៅសង្គ្រោះបន្ទាន់នៅមន្ទីរពេទ្យព្រះកេតុមាលា។
គឹមស្រស់ ប្រាប់ថាខាងគ្រូពេទ្យបានថតមើលក្បាលឃើញគ្រាប់កាំភ្លើងចូលជ្រៅក្នុងខួរក្បាលដោយមិនអាចវះកាត់យកចេញបានឡើយ។
គាត់បានបញ្ជាក់ថារហូតមកដល់ព្រឹកថ្ងៃទី ២ មករាខាងក្រុមគ្រូពេទ្យបានប្រាប់គាត់ឲ្យយកប្អូនទៅផ្ទះវិញព្រោះគ្រូពេទ្យមិនអាចជួយសង្គ្រោះជីវិតជនរងគ្រោះបាន។
គឹមស្រស់ ថា៖ «ខ្ញុំយកប្អូនខ្ញុំមកផ្ទះវិញហើយអញ្ជើញលោកតាអាចារ្យមកសូត្រធម៌ឲ្យដើម្បីឲ្យគាត់បានស្តាប់ធម៌ខ្លះមុនគាត់ស្លាប់។ ខ្ញុំមិនសង្ឃឹមថាប្អូនខ្ញុំអាចរស់បានទេព្រោះរបួសគាត់ហូរខួរ និងឈាមចេញមកក្រៅរហូត។ ប្អូនខ្ញុំស្លូតណាស់គាត់មិនដែលបង្កបញ្ហាក្នុងគ្រួសារ ឬដល់អ្នកភូមិទេ»៕