Search form

Login - Register | FOLLOW US ON

Logo of Phnom Penh Post newspaper Phnom Penh Post - សាលា​ឧទ្ធរណ៍​ជម្រះ​សំណុំ​រឿង​ ប្លន់​សម្លាប់​នៅ​ខេត្ត​ស្វាយរៀង

សាលា​ឧទ្ធរណ៍​ជម្រះ​សំណុំ​រឿង​ ប្លន់​សម្លាប់​នៅ​ខេត្ត​ស្វាយរៀង

ភ្នំពេញៈ សំណុំ​រឿង​ប្លន់​ប្រដាប់​អាវុធ​ហើយ​បាញ់​ជនរងគ្រោះ​ស្លាប់​ម្នាក់​នៅ​ស្រុក​រមាសហែក​កាលពី​ឆ្នាំ​ ២០១៥ ត្រូវ​សាលា​​ឧទ្ធរណ៍​​លើក​មក​ជំនុំ​ជម្រះ​កាលពី​ម្សិលមិញ​ដោយ​ជន​ជាប់ចោទ​ ២ ​នាក់​ត្រូវ​សាលា​ដំបូង​ខេត្ត​​ស្វាយរៀង​​ផ្តន្ទាទោស​​ឲ្យ​ជាប់​គុក​អស់​មួយ​ជីវិត​ និង​ម្នាក់​ឲ្យ​រួច​ខ្លួន​តែ​ត្រូវ​ព្រះរាជអាជ្ញា​​ប្តឹង​ទាស់​។

តាម​អង្គហេតុ​បង្ហាញ​ថា​ជនជាប់ចោទ​ទី​ ១- ឈ្មោះ​ យស់ សាវី​ ភេទ​ប្រុស​​អាយុ​ ៤៥​ ​ឆ្នាំ​,​ទី​ ២-ឈ្មោះ​ សូ យេម ហៅ​ ឆ្អឹង ភេទ​ប្រុស​អាយុ​ ២៧ ​ឆ្នាំ​ និង​ទី​ ៣-ឈ្មោះ​ ឈឿន​ ឈី​ ភេទ​ប្រុស​អាយុ​ ៣២ ​ឆ្នាំ​។​

អង្គហេតុ​បង្ហាញ​បន្ត​ថា ​នៅ​មុន​ថ្ងៃ​កើតហេតុ​ជន​ជាប់ចោទ​ទាំង ២ ​​នាក់​​បាន​ជួបជុំ​គ្នា​នៅ​​ភ្នំពេញ​ ឯ​ម្នាក់​ទៀត​​នៅ​ខេត្ត​ស្វាយរៀង​ដើម្បី​រក​​ទិញ​ម៉ូតូ​ជិះ​សម្រាប់​ធ្វើ​សកម្មភាព​ប្លន់​។​ លុះ​ដល់​ថ្ងៃ​ទី​ ២១ ​ខែ​មេសា​ឆ្នាំ ​២០១៥ ​ជន​ជាប់ចោទ​​​ទាំង​ ៣ ​នាក់​​បាន​ធ្វើ​សកម្មភាព​ប្លន់​ផ្ទះ​ប្រជាពលរដ្ឋ​នៅ​ភូមិ​បុះ​គគីរ ឃុំ​អណ្តូងពោធិ៍​ ស្រុក​រមាសហែក​​។ ​

ក្រុម​ចោរ​មាន​កាំភ្លើង​អាកា​ ១ ​ដើម​និង​កាំភ្លើង​ខ្លី​ ១ ​ដើម​បាន​បាញ់​ជនរងគ្រោះ​​ម្នាក់​ស្លាប់​ខណៈ​គាត់​ជិះ​ម៉ូតូ​មក​​​ឈប់​​នៅ​មុខ​ផ្ទះ​កើត​ហេតុ​។​ អង្គហេតុ​បង្ហាញ​បន្ត​ថា​នៅក្នុង​យប់​ថ្ងៃ​ទី​ ២១ ​ខែ​មេសា​នោះ​ បន្ទាប់ពី​ប្លន់​បាន​ក្រុម​ចោរ​បាន​រត់​គេច​ខ្លួន ហើយ​សម្ងំ​លាក់​ខ្លួន​នៅ​កណ្តាល​វាលស្រែ​។

លុះ​ព្រលឹម​ឡើង​ថ្ងៃ​ទី​ ២២ មេសា​ក្រុម​ជនសង្ស័យ​បាន​ជិះ​រថយន្ត​មក​រាជធានី​ភ្នំពេញ​វិញ​ដោយ​បន្សល់​ទុក​ម៉ូតូ​ ១ ​គ្រឿង​។ ​

បន្ទាប់ពី​ សមត្ថកិច្ច​រកឃើញ​ម៉ូតូ​នោះ​ក៏​ស្រាវជ្រាវ​រក​ម្ចាស់​ម៉ូតូ និង ​ឈាន​ទៅ​ឃាត់​ខ្លួន​ឈ្មោះ​ ឈឿនឈី​ និង​រំលង​ ១ ​ខែ​ក្រោយ​ទើប​សមត្ថកិច្ច​ចាប់​ខ្លួន​ យស់ សាវី និង​ឆែក​ផ្ទះ​ យស់​ សាវី​ ឃើញ​លុយ​ខ្មែរ​ ២៥ ​លាន​រៀល​ និង​លុយ​ដុល្លារ​ ៩០០ ​ដុល្លារ​ទៀត​។ ​

សំណុំ​រឿង​នេះ​ត្រូវ​សាលា​ដំបូង​ខេត្ត​ស្វាយរៀង​ ប្រកាស​សាលក្រម​នៅ​ថ្ងៃ​ទី​ ២៧ ខែ​មិថុនា​ឆ្នាំ​ ២០១៦ ​ដោយ​ផ្តន្ទាទោស​ឈ្មោះ​ សូ យេម ​និង​ ឈឿន ឈី ដាក់​គុក​ ១ ​ជីវិត​ពី​បទ​ «ឃាតកម្ម​ និង​លួច​មាន​ស្ថាន​ទម្ងន់​ទោស​» ​ឯ​ឈ្មោះ​ យស់ ​សាវី​ ចោទ​ពី​បទ​​ ​«​សម​គំនិត​» ​ក្រោយ​មក​ចេញ​ដីកា​ដោះលែង​ឲ្យ​រួច​ខ្លួន​ ប៉ុន្តែ​ត្រូវ​ព្រះរាជអាជ្ញា​ប្តឹង​ទាស់​មក​សាលា​ឧទ្ធរណ៍​។

ឈឿន ឈី​ និង​ សូយេម បាន​ឆ្លើយ​ដោះសា​ក្នុង​សវនាការ​​កាលពី​ម្សិលមិញ​ថា​ពួកគេ​មិន​បាន​ប្រព្រឹត្ត​ដូច​ការ​ចោទប្រកាន់​ទេ​ព្រោះ​នៅ​ថ្ងៃ​កើត​ហេតុ​ទី​ ២១ មេសា ឈឿន ឈី នៅ​ធ្វើ​ផ្ទះ​នៅ​ក្នុង​ស្រុក​មេសាង​ ខេត្ត​ព្រៃវែង ហើយ​ សូ យេមថា គាត់​នៅ​ស្រុក​អង្គស្នួល​ខេត្ត​កណ្តាល​ទេ​។

ពួកគេ​ឆ្លើយ​ថា​៖ ​«​ពួក​ខ្ញុំ​មិន​បាន​ប្រព្រឹត្ត​ទេ​សូម​តុលាការ​ដោះលែង​​ពួក​ខ្ញុំ​ឲ្យ​មាន​សេរីភាព​​វិញ​ផង​»​។

ជន​ជាប់ចោទ​ យស់​ សាវី​ ដែល​រស់នៅ​ក្នុង​ភូមិ​កើត​ហេតុ​ឆ្លើយ​ថា​គាត់​ជា​អ្នក​ដើរ​ទិញ​គោ​ក្របី​ហើយ​មុន​ថ្ងៃ​កើត​ហេតុ​ឈ្មោះ​ ឈី ចេះ​តែ​ទូរស័ព្ទ​សួរ​គាត់​​ថា​សមត្ថកិច្ច​ចាប់​បាន​ចោរ​​ឬ​នៅ​​?

លោក​ អ៊ិន សារ៉ាត ជា​ជនរងគ្រោះ​ដែល​ជា​ម្ចាស់​ផ្ទះ​បាន​ឆ្លើយ​​​ក្នុង​សវនាការ​ថា​គាត់​​បាត់​លុយ ​៣១​ លាន​រៀល​ និង​ ៤០០០​ ដុល្លារ​ហើយ​គាត់​អះអាង​ថា​ចំណាំ​ក្រដាស​ ១០០ ​ដុល្លារ​ ១ ​សន្លឹក​បោះត្រា​​ធំ​ទើប​សមត្ថកិច្ច​ប្រគល់​លុយ​ឲ្យ​គាត់​វិញ​ ប៉ុន្តែ​លុយ​ទាំង​នោះ​គាត់​ចាយ​វាយ​អស់​ហើយ​។

ទោះ​យ៉ាង​ណា​លោក​ចៅក្រម​ ចាយ​ ចាន់ តារាវណ្ណ​ ប្រធាន​ក្រុម​ប្រឹក្សា​​ជំនុំជម្រះ​បាន​ថ្លែង​ថា​៖ ​«​ជនជាប់ចោទ​​ឆ្លើយ​ដោះសា​ជា​សិទ្ធិ​របស់​ពួកគាត់​ ប៉ុន្តែ​បើ​ពិនិត្យ​លើ​ចម្លើយ​របស់​ពួកគាត់​នៅ​នគរបាល​បាន​ឆ្លើយ​​សារភាព​ដែល​ចម្លើយ​នោះ​វា​ស៊ី​សង្វាក់​នឹង​ការ​ផ្តល់​ទិន្នន័យ​ពី​ក្រុមហ៊ុន​ទូរស័ព្ទ​ដែល​ពួកគេ​ទូរស័ព្ទ​ទាក់ទង​គ្នា​ និង​បញ្ជាក់​ពី​ទីតាំង​ផង​»​។

លោក​ព្រះរាជអាជ្ញា អ៊ឹម សុផាន តំណាង​មហាអយ្យការ​សន្និដ្ឋាន​ថា​ឈ្មោះ​ សាវី ត្រូវ​សមត្ថកិច្ច​រឹបអូស​លុយ​គាត់​ ២៥​ លាន​រៀល​ប៉ុន្តែ​លុយ​នោះ​ត្រូវ​សាក្សី​ជា​ជនជាតិ​វៀតណាម​ឆ្លើយ​ថា​លុយ​នោះ​គាត់​ទិញ​ក្របី​ពី​ឈ្មោះ​ សាវី​ ពិត​មែន​។​

លោក​ថ្លែង​ថា​៖ ​«​សូម​ក្រុម​ប្រឹក្សា​ពិចារណា​អង្គហេតុ​ឈ្មោះ សាវី​ ព្រោះ​ក្នុង​អង្គហេតុ​គាត់​ជាប់​ពាក់ព័ន្ធ​តែ​រឿង​លុយ​ និង​ទាក់ទង​ទូរស័ព្ទ​ប៉ុណ្ណោះ​។​ ឯ​ជនជាប់ចោទ​​ ២ ​នាក់​ទៀត​ក៏​សូម​ក្រុម​ប្រឹក្សា​​ពិចារណា​ដែរ​ព្រោះ​ស្ថានីយ​ទូរស័ព្ទ​បញ្ជាក់​ច្បាស់​ពី​ទីតាំង​ដែល​ខុស​​ពី​ចម្លើយ​របស់​ពួកគេ​»​។

លោក​ នូ ចន្ថា មេធាវី​ការពារ​សិទ្ធិ​ យស់ សាវី សន្និដ្ឋាន​ថា​៖ «​រឿង​នេះ​កូន​ក្តី​ខ្ញុំ​មាន​សាក្សី​អ្នក​ទិញ​ក្របី​ហើយ​គាត់​មាន​តែ​ស្តី​​ឲ្យ​ក្រុម​ជនជាប់ចោទ​ទូរស័ព្ទ​មក​រំខាន​គាត់​ផង​។​ ឯ​លុយ​រឹបអូស​ពី​គាត់​ត្រូវ​ប៉ូលិស​ឲ្យ​ជនរងគ្រោះ​ហើយ​ជនរងគ្រោះ​ចាយ​អស់​ទៀត​គ្មាន​វត្ថុតាង​។ ​ខ្ញុំ​សូម​តុលាការ​ដោះលែង​គាត់​វិញ​»​។

លោក​ ឌឹម សុខហេង មេធាវី​ការពារ​សិទ្ធិ​ឲ្យ​ឈ្មោះ​ ឈឿន​ ឈី ​បាន​សន្និដ្ឋាន​ថា​នៅ​ថ្ងៃ​កើតហេតុ​កូន​ក្តី​លោក​នៅ​ផ្ទះ​ទេ​ហើយ​តុលាការ​មិន​ជឿ​លើ​សាក្សី​​បំភ្លឺ​នោះ​ហាក់​អយុត្តិធម៌​ណាស់។ ​លោក​សុំ​ឲ្យ​តុលាការ​ដោះលែង​កូន​ក្តី​លោក​វិញ​​។

លោក​ចៅក្រម​ ចាយ ចាន់តារាវណ្ណ ​ថ្លែង​ថា​សាលដីកា​នេះ​នឹង​ត្រូវ​​ប្រកាស​នៅ​ថ្ងៃ​ទី​ ១៩​ ខែ​មករា​​៕

0

Comments

Please, login or register to post a comment