Search form

Login - Register | FOLLOW US ON

Logo of Phnom Penh Post newspaper Phnom Penh Post - សាលា​ឧទ្ធរណ៍​តម្កល់​ទោស​ជនជាប់ចោទ​គ្រឿងញៀន​ ៦ ​ឆ្នាំ​ដដែល

សាលា​ឧទ្ធរណ៍​តម្កល់​ទោស​ជនជាប់ចោទ​គ្រឿងញៀន​ ៦ ​ឆ្នាំ​ដដែល

ភ្នំពេញ: សាលា​ឧទ្ធរណ៍​កាលពី​ម្សិលមិញ​បាន​ប្រកាស​សាលដីកា​សម្រេច​តម្កល់​ទោស​ ៦ ​ឆ្នាំ​ដល់​ជន​ជាប់ចោទ​ម្នាក់​ក្រោយ​ពី​សាលា​ដំបូង​ខេត្ត​បន្ទាយមានជ័យ​ជម្រះ​កាលពី​ថ្ងៃ​ទី​ ១៣ ខែ​វិច្ឆិកា ឆ្នាំ​​ ២០១៧ ពាក់ព័ន្ធ​គ្រឿងញៀន​ដែល​មាន​ទម្ងន់ 0,៦ ​ក្រាម​។

លោក​ចៅក្រម ប្លង់ សំណាង​ប្រធាន​ក្រុមប្រឹក្សា​ជំនុំជម្រះ​នៃ​សាលាឧទ្ធរណ៍ បាន​អាន​សាលដីកា​កំបាំង​មុខ​ជន​ជាប់ចោទ​យ៉ាង​ខ្លី​ថា​៖ «​សំណុំ​រឿង​គ្រឿងញៀន​ដែល​មាន​ជន​ជាប់ចោទ​ឈ្មោះ​ គឹម សុខចំរើន ​សភា​ព្រហ្មទណ្ឌ​សាលា​ឧទ្ធរណ៍​សម្រេច​តម្កល់​ទោស​ជន​ជាប់ចោទ​តាម​អំណាច​សាលក្រម​របស់​សាលា​ដំបូង​ខេត្ត​បន្ទាយមានជ័យ​ទុក​ជា​បាន​ការ​ដដែល​»​។

គួ​រំឭក​ថា​បើ​តាម​អង្គហេតុ​ជន​ជាប់ចោទ​ឈ្មោះ គឹម សុខចំរើន អាយុ ៣០ ឆ្នាំ​កាលពី​អំឡុង​ខែ​មេសា និង​ខែ​សីហា​ឆ្នាំ ២០១៦ បាន​ទិញ​ថ្នាំញៀន​ម៉ា​ទឹកកក​ក្នុង​តម្លៃ​ពី ៥០ ដុល្លារ​ទៅ​ ១០០ ​ដុល្លារ​ហើយ​បាន​យក​មក​បំបែក​ជា​កញ្ចប់​តូចៗ ដើម្បី​លក់​បន្ត​។ លុះ​ក្រោយ​មក​ក៏​ត្រូវ​សមត្ថកិច្ច​ចាប់​បាន​។

សំណុំ​រឿង​នេះ​ត្រូវ​បាន​សាលា​ដំបូង​ខេត្ត​បន្ទាយមានជ័យ​ផ្តន្ទាទោស​ដាក់​គុក ៦ ឆ្នាំ​កាលពី​ថ្ងៃ ៣១ ខែ​ឧសភា​ឆ្នាំ ២០១៧ ចោទ​ពី​បទ «​ជួញដូរ និង​ប្រើប្រាស់​គ្រឿងញៀន​ខុស​ច្បាប់​» តាម​មាត្រា ៤០ នៃ​ច្បាប់​ត្រួតពិនិត្យ​គ្រឿងញៀន និង​ពិន័យ​ប្រាក់ ១០ លាន​រៀល​។

កាលពី​ថ្ងៃ​ជំនុំជម្រះ​ជន​ជាប់ចោទ​ឆ្លើយ​ក្នុង​សវនាការ​ថា​គាត់​ពិត​ជា​ទិញ​ថ្នាំញៀន​មក​ជក់​មែន ប៉ុន្តែ​ពេល​ជក់​សល់​ក៏​រំលែក​ឲ្យ​មិត្តភក្តិ​ជក់​បន្ត និង​បាន​លុយ​ពីរ​បី​ម៉ឺន​រៀល​ប៉ុណ្ណោះ​។

ជន​ជាប់ចោទ​មិន​ពេញ​ចិត្ត​​ចំពោះ​ការ​ជម្រះ​ក្ដី​នៅ​តុលាការ​ខេត្ត​បន្ទាយមានជ័យ​នោះ​ទេ​ដោយ​បាន​ចោទប្រកាន់​មក​លើ​តុលាការ​ខេត្ត​នា​ពេល​នោះ​ថា​បាន​ផ្តន្ទាទោស​គាត់​ធ្ងន់ធ្ងរ​ពេក​ហើយ​គាត់​ស្នើសុំ​ជាប់​គុក​ត្រឹមតែ ១ ឆ្នាំ​ប៉ុណ្ណោះ​៕

0

Comments

Please, login or register to post a comment