Search form

Login - Register | FOLLOW US ON

Logo of Phnom Penh Post newspaper Phnom Penh Post - ឧទ្ធរណ៍​ជម្រះ​ក្ដី​ស្ត្រី​ទម្លាក់​មាស​ក្លែង​​ បោក​យក​មាស​ពិត

Content image - Phnom Penh Post
ស្ត្រី​ជាប់ចោទ​ឈ្មោះ​ នួច ស៊ីណា អាយុ​ ៣៧ ​ឆ្នាំ​ដើរ​ចេញ​ ក្រោយ​ពី​ស្តាប់​​សវនាការ។ រូបថត គឹម សារុំ

ឧទ្ធរណ៍​ជម្រះ​ក្ដី​ស្ត្រី​ទម្លាក់​មាស​ក្លែង​​ បោក​យក​មាស​ពិត

ភ្នំពេញៈ សាលា​ឧទ្ធរណ៍​ពី​ម្សិលមិញ​បាន​ជំនុំជម្រះ​ស្ត្រី​ជាប់​ចោទ​ម្នាក់​ក្នុង​ចំណោម​ ២ ​នាក់​ដែល​ប្រើ​ល្បិច​ទម្លាក់​មាស​ក្លែងក្លាយ​បោក​យក​មាស​ពិត បន្ទាប់ពី​ត្រូវ​តុលាការ​ថ្នាក់​ក្រោម​ផ្តន្ទាទោស​ដាក់គុក​ ២ ​ឆ្នាំ​ ប៉ុន្តែ​បាន​ប្តឹង​ទាស់ ។

ស្ត្រី​ជាប់ចោទ​ឈ្មោះ​ នួច ស៊ីណា អាយុ​ ៣៧ ​ឆ្នាំ​បាន​ថ្លែង​ក្នុង​សវនាការ​ថា​ខ្លួន និង​ស្ត្រី​បក្ខពួក​ម្នាក់​ទៀត​ឈ្មោះ​ លឹម សុខគា​ អាយុ​ ៥៥ ​ឆ្នាំ​កាលពី​ថ្ងៃ​ ១៦ ​កញ្ញា​ឆ្នាំ​មុន​បាន​យក​សំណ​គ្រាប់កង់​ជ្រលក់​ទឹកមាស​ទម្លាក់​នៅ​មុខ​ស្ត្រី​រងគ្រោះ​ម្នាក់​ក្នុង​ភូមិ​ ៤ ​សង្កាត់​ស្រះចក ខណ្ឌ​ដូនពេញ​។

ពេល​នោះ​ស្ត្រី​រងគ្រោះ​បាន​ឃើញ​ហើយ​ពួកខ្លួន​ក៏​បបួល​ឲ្យ​ស្ដ្រី​នោះ​ដោះ​ខ្សែ​កមាស​ឲ្យ បន្ទាប់មក​ពួកខ្លួន​ក៏​ជិះ​ម៉ូតូ​គេច​ខ្លួន​។

ស្ត្រី​ជាប់ចោទ​ថា​៖ «​ប៉ុន្តែ​ក្រោយ​ខ្ញុំ​ធ្វើ​សកម្មភាព​បាន​ ៤ ​ថ្ងៃ​ក៏​ត្រូវ​សមត្ថកិច្ច​ឃាត់​ខ្លួន​ពួកខ្ញុំ​តែម្តង​។ រឿង​នេះ​ខ្ញុំ​ដឹង​កំហុស​ហើយ​ខ្ញុំ​ធ្វើ​ព្រោះ​ខ្ញុំ​ក្រ​មិន​ដឹង​រកស៊ី​អី​។ ​សូម​តុលាការ​តម្រឹម​ទោស​ខ្ញុំ​មក​ ១ ​ឆ្នាំ​បាន​ហើយ​»​។

ទោះ​យ៉ាង​ណា​របាយការណ៍​របស់​នគរបាល​ថា​នៅ​ថ្ងៃ​កើតហេតុ​ស្ត្រី​ជាប់ចោទ​បាន​ប្រើ​ល្បិច​​ទម្លាក់​ដុំ​មាស​ក្លែងក្លាយ​នៅ​មុខ​ស្ត្រី​រងគ្រោះ​ឈ្មោះ​ សយ ស្រីលី ហើយ​ល្បួង​គាត់​ឲ្យ​ដោះ​ខ្សែ​កមាស​ឲ្យ រួច​គេច​ខ្លួន​។ លុះ​ដល់​​ថ្ងៃ​ ២២ ​កញ្ញា ស្ត្រី​រងគ្រោះ​បាន​​ឃើញ​ស្ត្រី​ជាប់ចោទ​នៅ​ពេទ្យ​គន្ធបុប្ផា​ក៏​ឃាត់​ខ្លួន​ឲ្យ​សមត្ថកិច្ច​។

សំណុំ​រឿង​នេះ​ត្រូវ​សាលា​ដំបូង​រាជធានី​ភ្នំពេញ​ផ្តន្ទាទោស​ស្ត្រី​ជាប់ចោទ និង​គូកន​ដាក់គុក​ម្នាក់ៗ​ ២ ​ឆ្នាំ​កាលពី​ថ្ងៃ​ទី​ ៦ ខែ​ធ្នូ​ឆ្នាំ​មុន​ចោទ​ពី​បទ​ «​ឆបោក​»​។

ព្រះរាជអាជ្ញា​ ង៉ែត សារ៉ាត ​សន្និដ្ឋាន​ថា​៖ «​ទោះ​ជា​ស្ត្រី​ជាប់ចោទ​​សារភាព​ក្តី ប៉ុន្តែ​ខ្ញុំ​ជា​តំណាង​មហាអយ្យការ​មិន​អាច​ទទួល​យក​បាន​ទេ​។ ​ខ្ញុំ​សូម​តម្កល់​ទោស​នៅ​ដដែល​»​។

លោកស្រី​ចៅក្រម​ គឹម ដានី ប្រធាន​ក្រុម​ប្រឹក្សា​ជំនុំជម្រះ​ថា​សាលដីកា​រឿង​នេះ​នឹង​ប្រកាស​ថ្ងៃ​ទី​ ២៩ កញ្ញា​ខាង​មុខ​៕

0

Comments

Please, login or register to post a comment