Search form

Login - Register | FOLLOW US ON

Logo of Phnom Penh Post newspaper Phnom Penh Post - ឧទ្ធរណ៍​ជម្រះ​សំណុំ​រឿង​ចោរប្លន់​ដែល​ព្រះរាជអាជ្ញា​ប្តឹង​ទាស់

ឧទ្ធរណ៍​ជម្រះ​សំណុំ​រឿង​ចោរប្លន់​ដែល​ព្រះរាជអាជ្ញា​ប្តឹង​ទាស់

ភ្នំពេញៈ សាលា​ឧទ្ធរណ៍​កាលពី​ម្សិលមិញ​បាន​បើក​ការ​ជំនុំជម្រះ​សំណុំ​រឿង​ប្លន់​របស់​ជន​ជាប់ចោទ​ ៣ ​នាក់​ដែល​ត្រូវ​ចៅក្រម​ដោះលែង ប៉ុន្តែ​ព្រះរាជអាជ្ញារង​ខេត្ត​បាត់ដំបង​មិន​សុខចិត្ត​ហើយ​ប្តឹង​ទាស់​។

នៅ​ក្នុង​សវនាការ​កាលពី​ម្សិលមិញ​ជន​ជាប់ចោទ​ម្នាក់​ឈ្មោះ វិន វុធ អាយុ ៥៣ ឆ្នាំ បាន​និយាយ​ប្រាប់​ចៅក្រម​ថា​សំណុំ​រឿង​ដែល​ផ្តើម​ឲ្យ​មាន​ការ​ចោទ​គាត់​ថា​បាន​ធ្វើ​សកម្មភាព​ប្លន់​ផ្ទះ​ជនរងគ្រោះ​ឈ្មោះ គឹម ហួន នៅ​ភូមិ​ព្រៃចេក ឃុំ​កំពង់ព្រះ ស្រុក​សង្កែ ខេត្ត​បាត់ដំបង​កាលពី​ថ្ងៃ​ទី​ ៦ សីហា ឆ្នាំ​ ២០១៥ នោះ​គឺ​គាត់​មិន​បាន​ប្រព្រឹត្ត​ទេ ពីព្រោះ​នៅ​ថ្ងៃ​នោះ​គាត់​បាន​ទៅ​ធ្វើ​អត្តសញ្ញាណប័ណ្ណ នៅ​ប៉ុស្តិ៍​នគរបាល​ឃុំ​កំពង់ព្រះ ប៉ុន្តែ​ធ្វើ​មិន​បាន​គាត់​ក៏​ត្រឡប់​មក​ផ្ទះ​វិញ​។

ជន​ជាប់ចោទ​និយាយ​បន្ត​ថា​៖ «​ក្នុង​រឿង​នេះ​ខ្ញុំ​មិន​បាន​ប្រព្រឹត្ត​ដូច​ការ​ចោទប្រកាន់​ទេ ប៉ុន្តែ​ខ្ញុំ​ធ្លាប់​ជាប់គុក​ម្តង​ហើយ រយៈពេល​ ៦ ​ឆ្នាំ​ពី​បទ​ប្លន់​ហើយ​ខ្ញុំ​ត្រូវ​បាន​ដោះលែង​វិញ​ក្រោយ​ពី​ខ្ញុំ​អនុវត្ត​ទោស​ចប់​ក្នុង​ពន្ធនាគារ​»​។ «​បន្ទាប់ពី​ខ្ញុំ​មាន​សេរីភាព​បាន​ជាង​ ២ ​ឆ្នាំ​ខ្ញុំ​ក៏​ត្រូវ​សមត្ថកិច្ច​ចាប់​ខ្លួន​ដោយ​ចោទ​ពី​បទ​ប្លន់​។ ទោះ​យ៉ាង​ណា​ខ្ញុំ​សុំ​ឲ្យ​តុលាការ​ដោះលែង​ខ្ញុំ​វិញ​»​។

ជន​ជាប់ចោទ​ម្នាក់​ទៀត​ឈ្មោះ​ សៀង ស៊ុយ ​អាយុ​ ៥២ ឆ្នាំ និយាយ​ដែរ​ថា​៖ «​រឿង​នេះ​ខ្ញុំ​ក៏​មិន​បាន​ចូលរួម​ធ្វើ​សកម្មភាព​ប្លន់​ដែរ​ព្រោះ​នៅ​ថ្ងៃ​កើត​ហេតុ​នោះ ខ្ញុំ​ដេក​នៅ​ផ្ទះ​របស់​ខ្ញុំ​។ ខ្ញុំ​សូម​តុលាការ​ឧទ្ធរណ៍​តម្កល់​សាលក្រម​របស់​តុលាការ​ខេត្ត​បាត់ដំបង​នៅ​ដដែល​»​។

ទោះ​យ៉ាង​ណា​បើ​តាម​ចម្លើយ​សាក្សី ៥ នាក់​ដែល​ឆ្លើយ​នៅ​នគរបាល​ខេត្ត​បាត់ដំបង​បង្ហាញ​ថា​នៅ​ប៉ុន្មាន​ខែ​មុន​ថ្ងៃ​កើតហេតុ​គេ​មិន​បាន​ឃើញ​ជន​ជាប់ចោទ​ទាំង​ ២ ​នាក់ និង​គូកន​ឈ្មោះ​ វិន វុន មក​ភូមិ​ទេ​។ លុះ​នៅ​ថ្ងៃ​ទី​ ៥ សីហា ឆ្នាំ ២០១៥ មុន​ថ្ងៃ​កើតហេតុ​ ១ ​ថ្ងៃ​គេ​ក៏​បាន​ឃើញ​ក្រុម​ជន​ទាំង​ ៣ ​នាក់​ជុំ​គ្នា​ផឹកស៊ី ហើយ​នៅ​ថ្ងៃ​ទី​ ៦ ​សីហា​ក៏​មាន​ហេតុការណ៍​ប្លន់​កើតឡើង​តែ​ម្តង​។

ក្នុង​សកម្មភាព​នោះ​ក្រុម​ចោរប្លន់​បាន​ប្រើ​អាវុធ​វែង​ ១ ​ដើម​ចូល​ប្លន់​ផ្ទះ​ជនរងគ្រោះ​ឈ្មោះ គឹម ហួន ប៉ុន្តែ​ជនរងគ្រោះ​មិន​មាន​គ្រោះថ្នាក់​អ្វី​ទេ​។ នៅ​ក្នុង​យប់​នោះ​ក្រុម​ចោរប្លន់​បាន​ ២៥០០០ ​ដុល្លារ លុយ​ខ្មែរ ២០ លាន​រៀល លុយ​ថៃ ៤៥ ម៉ឺន​បាត ហើយ​រត់​គេច​ខ្លួន​បាត់​។

សំណុំ​រឿង​នេះ​ត្រូវ​សាលា​ដំបូង​ខេត្ត​បាត់ដំបង​ប្រកាស​សាលក្រម​នៅ​ថ្ងៃ​ទី ២៧ កញ្ញា ឆ្នាំ​ ២០១៦ សម្រច​ឲ្យ​ជន​ទាំង​ ៣ ​នាក់​រួច​ខ្លួន​។ ប៉ុន្តែ​ត្រូវ​លោក​ សេង ផានិត ព្រះរាជអាជ្ញារង​ប្តឹង​ទាស់​។

លោក​ព្រះរាជអាជ្ញា​ ជា ម៉េត តំណាង​មហាអយ្យការ​សន្និដ្ឋាន​ថា​លោក​សូម​ឲ្យ​ក្រុមប្រឹក្សា​ជំនុំជម្រះ​ពិចារណា​លើ​សារណា​របស់​លោក​ព្រះរាជអាជ្ញារង​ដែល​ប្តឹង​ជនជាប់ចោទ​ហើយ​ម្យ៉ាង​ពួកគេ​ធ្លាប់​ជាប់​គុក​ម្តង​ហើយ​។

លោកស្រី ថូ ណាវី ជា​មេធាវី​ចាត់​តាំង​ការពារ​សិទ្ធិ​ឲ្យ​ជន​ជាប់ចោទ​សន្និដ្ឋាន​ថា​៖ «​រឿង​នេះ​លោក​ព្រះរាជអាជ្ញា​ប្តឹង​យោង​លើ​សាក្សី​ម្នាក់ និង​ពុំ​មាន​ភ័ស្តុតាង​ច្បាស់លាស់​ឡើយ​។ សំអាង​តែ​កូន​ក្តី​ខ្ញុំ​ធ្លាប់​ជាប់គុក​ប៉ុណ្ណោះ​។ យ៉ាងណា​ខ្ញុំ​សូម​តុលាការ​តម្កល់​សាលក្រម​របស់​តុលាការ​ខេត្ត​បាត់ដំបង​នៅ​ដដែល​»​។

ក្រោយ​ពី​បាន​បើក​សវនាការ​ជំនុំជម្រះ​អស់​រយៈពេល​ប្រមាណ​ជា​ជិត ១ ម៉ោង​លោក​ ប៉ាក ច័ន្ទសំបូរ ប្រធាន​ក្រុម​ប្រឹក្សា​ជំនុំជម្រះ​បាន​ថ្លែង​ថា​សាលដីកា​នេះ​ប្រកាស​នៅ​ថ្ងៃ​ទី​ ៩ កញ្ញា​៕

0

Comments

Please, login or register to post a comment