Search form

Login - Register | FOLLOW US ON

Logo of Phnom Penh Post newspaper Phnom Penh Post - ឧទ្ធរណ៍​ជំនុំជម្រះ​ជន​ជាប់​ទោស​ពី​បទ​ប្លន់

ជនជាប់ចោទ​ពី​បទ​ប្លន់​នៅ​សាលា​ឧទ្ធរណ៍​កាលពី​ម្សិលមិញ​។
ជនជាប់ចោទ​ពី​បទ​ប្លន់​នៅ​សាលា​ឧទ្ធរណ៍​កាលពី​ម្សិលមិញ​។ រូបថត គឹម សារុំ

ឧទ្ធរណ៍​ជំនុំជម្រះ​ជន​ជាប់​ទោស​ពី​បទ​ប្លន់

ភ្នំពេញៈ សាលា​ឧទ្ធរណ៍​កាលពី​ម្សិលមិញ​បាន​បើក​សវនាការ​ជំនុំជម្រះ​បណ្តឹង​សុំ​ស្រូប​ទោស​ជន​ជាប់​ចោទ​ម្នាក់​ចំពោះ​បទ​ចោទ​ចំនួន ៣ បទ​ល្មើស​ពាក់ព័ន្ធ​នឹង​អំពើ​ប្លន់​ប្រដាប់​អាវុធ​កាលពី​ឆ្នាំ ២០០៥ នៅ​ខេត្ត​តាកែវ​ដែល​ត្រូវ​​បាន​តុលាការ​ថ្នាក់​ក្រោម​ផ្តន្ទាទោស​ដាក់​ពន្ធនាគារ​សរុប ១៧ ឆ្នាំ​។

តាម​អង្គហេតុ​ជន​ជាប់​ចោទ​ដែល​មាន​ឈ្មោះ យន់ ដា ភេទ​ ប្រុស អាយុ​ ៣៥ ឆ្នាំ​ត្រូវ​សាលា​ដំបូង​ខេត្ត​តាកែវ​ផ្តន្ទាទោស​ឲ្យ​ជាប់​ពន្ធនាគារ​សរុប ១៧ ឆ្នាំ​ពី​បទ​ប្លន់​ប្រដាប់​អាវុធ​ក្នុង​បី​បទ​ល្មើស​។ ជាមួយ​គ្នា​នេះ សាលាឧទ្ធរណ៍​បាន​ប្រកាស​លើក​ពេល​ជំនុំ​ជម្រះ​ជន​ជាប់​ចោទ​ម្នាក់​ទៀត​ឈ្មោះ ម៉ាក់ យ៉ាន់ ភេទ​ប្រុស​អាយុ ៥៥ ឆ្នាំ ដែល​ត្រូវ​តុលាការ​ថ្នាក់​ក្រោម​កាត់​ឲ្យ​ជាប់​ទោស​សរុប ២២ ឆ្នាំ​ក្នុង​បី​ល្មើស​ដូច​គ្នា​នេះ​ដោយសារ​តែ​មាន​សាលដីកា​ស្ថាពរ​មួយ​មិន​ទាន់​បញ្ជូល​ក្នុង​ពាក្យ​បណ្តឹង​សុំ​ស្រូប​ទោស។

លោក ប៉ាក ចន្ទសំបូរ ប្រធាន​ចៅក្រម​ប្រឹក្សា​ជំនុំជម្រះ​បាន​សួរ​ជន​ជាប់​ចោទ​ក្នុង​បន្ទប់​សវនាការ​ថា៖ «កន្លង​មក​អ្នក​បាន​ប្រព្រឹត្ត​បទល្មើស​បង្ក​ភាព​អសន្តិសុខ​ដល់​សង្គម​ជាតិ​ និង​មាន​សាលក្រម​ស្ថាពរ​ដល់​ទៅ​បី​ដែល​សរុប​ត្រូវ​ជាប់​ទោស​ ១៧ ​ឆ្នាំ​។ តើ​ក្នុង​ពេល​អនុវត្ត​ទោស​ក្នុង​ពន្ធនាគារ​អ្នក​បាន​ធ្វើ​អ្វី​ជា​ស្នាដៃ​ខ្លះ​ ឬ​បាន​សាង​អំពើ​ល្អ​អ្វី​ខ្លះ​សម្រាប់​ខ្លួន​ឯង​?»។

ជន​ជាប់​ចោទ យន់ ដា បាន​ឆ្លើយ​ក្នុង​បន្ទប់​សវនាការ​ថា​ខ្លួន​បាន​ជាប់​​ពន្ធនាគារ​អស់​រយៈពេល ៩ ឆ្នាំ ១០ ខែ​ហើយ​។

យន់ដា និយាយ​ថា៖ «ខ្ញុំ​ប្តឹង​សូម​ស្រូប​ទោស​នេះ​ព្រោះ​ខ្ញុំ​ចង់​មាន​​ពេល​ទៅ​ជួយ​គ្រួសារ​បាន​ខ្លះ​ហើយ​ខ្ញុំ​រស់នៅ​ក្នុង​ពន្ធនាគារ​ខ្ញុំ​ត្រូវ​បាន​រៀន​ជំនាញ​សិប្បកម្ម​ និង​ជំនាញ​ដាំ​ដុះ​ស្រូវ និង​ចិញ្ចឹម​ត្រី​បាន​ចេះ​ចាំ និង​បាន​ជួយ​អប់រំ​ដល់​ពិរុទ្ធជន​ដូច​គ្នា​ឲ្យ​ខំ​កសាង​ខ្លួន​សាង​អំពើ​ល្អ​។ ​ទោស​សរុប​របស់​ខ្ញុំ​ ១៧ ​ឆ្នាំ​តែ​ខ្ញុំ​សូម​ឲ្យ​តុលាការ​ជួយ​បន្ថយ​នៅ​ត្រឹម​ ១០ ​ឆ្នាំ​បាន​ហើយ​»​។

លោក​ព្រះរាជអាជ្ញា ស យស ថាវរៈ តំណាង​មហា​អយ្យការ​បាន​សន្និដ្ឋាន​ថា​ទម្រង់​សុំ​ស្រូប​ទោស​របស់​ជន​ជាប់​ចោទ​មាន​លក្ខណៈ​ត្រឹមត្រូវ​ហើយ​ដូច្នេះ​សូម​ក្រុម​ប្រឹក្សា​ពិនិត្យ​ឲ្យ​ជនជាប់ចោទ​ស្រូប​ទោស​មួយ​ផ្នែក​ក្នុង​ចំណោម​ទោស​ទាំង​បី​នៃ​សាលក្រម​ស្ថាពរ​របស់​គាត់​ដោយ​យក​ទណ្ឌកម្ម​ទោស​ ៥ ឆ្នាំ​មួយ​ករណី​បូក​នឹង​ទណ្ឌកម្ម​ទោស​ ៧ ​ឆ្នាំ​មួយ​ករណី​ទៀត​ក្រៅ​ពី​នេះ​រក្សា​ទុក​ដដែល​។

លោក ទៀង សុទ្ធី មេធាវី​ការពារ​សិទ្ធិ​ជន​ជាប់​ចោទ​ថ្លែង​ថា​៖ «កូនក្តី​ខ្ញុំ​គាត់​អនុវត្ត​ទោស​ក្នុង​ពន្ធនាគារ​ជិត​ ១០ ឆ្នាំ​ហើយ​ ហើយ​ពេល​គាត់​ត្រឡប់​ទៅ​វិញ​គាត់​ប្តេជ្ញា​កសាង​ខ្លួន​ជា​ពលរដ្ឋ​ល្អ​។ ខ្ញុំ​សូម​ឲ្យ​តុលាការ​សម្រេច​តម្រឹម​ទោស​គាត់​ ១០ ​​ឆ្នាំ​បាន​ហើយ​»​។

ក្រោយ​ប្រើ​ពេល​ជំនុំជម្រះ​ជិត​កន្លះ​ម៉ោង​លោក ប៉ាក ចន្ទសំបូរ ប្រធាន​ចៅក្រម​ប្រឹក្សា​ជំនុំជម្រះ​ថ្លែង​ថា​សាលដីកា​នេះ​នឹង​លើក​ទៅ​ប្រកាស​នៅ​ថ្ងៃ​ទី ២០ ខែ​សីហា ខាង​មុខ​៕

0

Comments

Please, login or register to post a comment