Search form

Login - Register | FOLLOW US ON

Logo of Phnom Penh Post newspaper Phnom Penh Post - ឧទ្ធរណ៍​បន្ថយ​ទោស​លោក ក្រូច បូរ័ត្ន មក​ត្រឹម ៣​ឆ្នាំ

ឧទ្ធរណ៍​បន្ថយ​ទោស​លោក ក្រូច បូរ័ត្ន មក​ត្រឹម ៣​ឆ្នាំ

20140410_08
លោក ក្រូច បូរ័ត្ន ឡើងមកបំភ្លឺនៅតុលាការនាពេលកន្លងមក ផា លីណា

ភ្នំពេញៈ សាលា​ឧទ្ធរណ៍​កាល​ពី​ថ្ងៃ​ម្សិលមិញ​បាន​ប្រកាស​សាលដីកា​កំបាំង​មុខ​លើ​សំណុំ​រឿង​លោក ក្រូច បូរ័ត្ន អតីត​ក្រឡា​បញ្ជី​ដោយ​បន្ថយ​ទោស​ពី ៤​ឆ្នាំ កន្លះ​មក​ត្រឹម ៣​ឆ្នាំ វិញ​និង​សម្រេច​តម្កល់​សាលក្រម​របស់​តុលាការ​ថ្នាក់​ក្រោម​ឲ្យ​នៅ​ដដែល។

លោក ចាយ ច័ន្ទតារាវណ្ណ ប្រធាន​ក្រុម​ប្រឹក្សា​ជំនុំ​ជម្រះ​ថ្លែង​ថា ជន​ជាប់​ចោទ ក្រូច បូរ័ត្ន ត្រូវ​ក្រុម​ប្រឹក្សា​ជំនុំ​ជម្រះ​សាលា​ឧទ្ធរណ៍​សម្រេច​កែប្រែ​បទ​ចោទ​ត្រង់​ចំណុច​ទណ្ឌកម្ម​ពី​ដាក់​គុក ៤​ឆ្នាំ ៦​ខែ មក​ជា​អនុវត្ត​ទោស​ក្នុង​ពន្ធនាគារ ៣​ឆ្នាំ វិញ​តែ​តម្កល់​សាលក្រម​សំណង​រដ្ឋប្បវេណី​របស់​សាលា​ដំបូង​ទុក​ជា​បាន​ការ​ដដែល។

គួរ​រំឭក​ថា សំណុំ​រឿង​នេះ​ត្រូវ​សាលា​ដំបូង​រាជធានី​ភ្នំពេញ​កាល​ពី ខែ​ឧសភា ឆ្នាំ​២០១៣ បាន​សម្រេច​ផ្តន្ទាទោស ក្រូច បូរ័ត្ន ដាក់​គុក ៤​ឆ្នាំ ៦​ខែ និង​បង្គាប់​ឲ្យ​សង​ប្រាក់ ២៥ ម៉ឺន​ដុល្លារ​ទៅ​ដើម​បណ្តឹង។

ក្នុង​សវនាការ​កន្លង​មក ក្រូច បូរ័ត្ន បាន​ប្រាប់​តុលាការ​ថា គាត់​បាន​ទទួល​លុយ​ទាំង​អស់ ៦ លើក​សរុប ២៥ ម៉ឺន​ដុល្លារ​តែ​លុយ​ដែល​នៅ​សល់​គាត់​មាន​តែ ៧ ម៉ឺន ៥ ពាន់​ដុល្លារ​ទេ ហើយ​លុយ​នោះ​គាត់​យក​ទៅ​ចង​ការ។ ចំណែក​លុយ​នៅ​សល់ ១៧ ម៉ឺន ៥ ពាន់​ដុល្លារ​គាត់​ប្រគល់​ទៅ​ឲ្យ​លោក​ចៅក្រម​លោក កែ សាខន អស់​ហើយ។

សូម​រំឭក​ថា កាល​ពី​ថ្ងៃ ទី​១៦ មករា ឆ្នាំ​២០១៣ លោក ក្រូច បូរ័ត្ន ជា​អតីត​ក្រឡា​បញ្ជី​របស់​ចៅក្រម​ឈ្មោះ កែ សាខន នៃ​សាលា​ដំបូង​រាជធានី​ភ្នំពេញ បាន​សារភាព​នៅ​ក្នុង​អង្គ​សវនាការ​ថា លោក​បាន​យក​ប្រាក់​ចំនួន ២ សែន ៥ ម៉ឺន​ដុល្លារ​តាម​បញ្ជា​របស់​ចៅហ្វាយ​នាយ​របស់​លោក គឺ​ចៅក្រម កែ សាខន។ លោក​បញ្ជាក់​ថា ថវិកា​ទាំង​នោះ​លោក​បាន​ទុក​ខ្លួន​ឯង​ខ្លះ និង​បាន​ប្រគល់​ឲ្យ​ចៅក្រម កែ សាខន ចំនួន ១៧៥ ០០០ (មួយ​សែន​ប្រាំពីរ​ម៉ឺន​ប្រាំ​ពាន់​ដុល្លារ)។

លោក កែ សាខន អះអាង​ថា កាល​ពី ឆ្នាំ​២០១០ កន្លង​ទៅ លោក ក្រូច បូរ័ត្ន បាន​បន្លំ​ហត្ថលេខា និង​ត្រា​របស់​លោក​ដើម្បី​ទទួល​យក​ប្រាក់​សំណង​រឿង​ក្ដី​រដ្ឋប្បវេណី​មួយ ដែល​ភាគី​ចាញ់​ក្ដី​ត្រូវ​សង​ភាគី​ឈ្នះ​ក្ដី ហើយ​លោក ក្រូច បូរ័ត្ន ទទួល​យក​ប្រាក់​ពី​ភាគី​ចាញ់​ក្ដី​បញ្ចូល​ទៅ​ក្នុង​គណនី​ធនាគារ​ផ្ទាល់​ខ្លួន​របស់​លោក ហើយ​ប្រាប់​ទៅ​ភាគី​ឈ្នះ​ក្ដី​ថា លុយ​នោះ​ភាគី​ចាញ់​ក្ដី​មិន​ទាន់​សង​ទេ លុះ​ដល់ ឆ្នាំ​២០១២ ទើប​បែក​រឿង​នេះ។

លោក កែ សាខន ជា​អតីត​ចៅក្រម​សាលា​ដំបូង​រាជធានី​តែ​ផ្លាស់​ទៅ ខេត្ត​តាកែវ ធ្លាប់​ប្រាប់​តុលាការ​ថា លោក​មិន​បាន​ទទួល​លុយ​នោះ​ពី ក្រូច បូរ័ត្ន ទេ​ដោយ​គាត់​យក​ទៅ​ប្រើ​ផ្ទាល់​ខ្លួន។

ប្រធាន​ក្រុម​អ្នក​ច្បាប់​ការពារ​សិទ្ធិ​កម្ពុជា លោក សុក សំអឿន មាន​ប្រសាសន៍​ថា ករណី​នេះ​ជះ​ឥទ្ធិពល​អាក្រក់​ដល់​តុលាការ​កម្ពុជា និង​រដ្ឋាភិបាល ពីព្រោះ​តុលាការ​ស្ថិត​នៅ​ក្រោម​ការ​គ្រប់​គ្រង​របស់​គណបក្ស​កាន់​អំណាច។ លោក សុក សំអឿន បញ្ជាក់​ឲ្យ​ដឹង​ទៀត​ថា៖ «ដើម្បី​ធានា​ឲ្យ​មាន​សុក្រឹតភាព និង​លុប​បំបាត់​អំពើ​ពុករលួយ​នៅ​ក្នុង​ប្រព័ន្ធ​តុលាការ អង្គភាព​ប្រឆាំង​អំពើ​ពុករលួយ​ត្រូវ​មាន​វិធានការ​ស៊ើប​អង្កេត​ករណី​នេះ​ឲ្យ​មាន​ប្រសិទ្ធភាព»៕

0

Comments

Please, login or register to post a comment