Search form

Login - Register | FOLLOW US ON

Logo of Phnom Penh Post newspaper Phnom Penh Post - ៦ នាក់​រំលោភ​សម្លាប់​ស្ត្រី​ម្នាក់​ត្រូវ​បាន​ចាប់​ខ្លួន

Content image - Phnom Penh Post

៦ នាក់​រំលោភ​សម្លាប់​ស្ត្រី​ម្នាក់​ត្រូវ​បាន​ចាប់​ខ្លួន

ភ្នំពេញៈ កម្មករ​សំណង់ ៦ នាក់​ដែល​ព្រួត​គ្នា​រំលោភ​​បូក​ហើយ​សម្លាប់​នារី​រកស៊ី​ផ្លូវភេទ​ម្នាក់​រួច​យក​សព​ទៅ​ប្លុង​ចោល​នៅ​ក្បែរ​វត្ត​អង្គតាមិញ​ក្នុង​ខណ្ឌ​ពោធិ៍សែនជ័យ​កាលពី​ថ្ងៃ​ទី​ ១៦ ​កក្កដា ត្រូវ​សមត្ថកិច្ច​ចាប់​ខ្លួន​បាន​កាលពី​រសៀល​ថ្ងៃ​ពុធ​ក្នុង​ភូមិ​ត្រពាំងល្វា សង្កាត់​កាកាប​ហើយ​នឹង​ត្រូវ​បញ្ជូន​ទៅ​​តុលាការ​នៅ​ថ្ងៃ​នេះ​។

លោក យឹម សារ៉ាន់ អធិការ​នគរបាល​ខណ្ឌពោធិ៍​សែនជ័យ​បាន​ឲ្យ​ដឹង​ថា​ជនសង្ស័យ​ដែល​ព្រួត​គ្នា​រំលោភ​បូក​ហើយ​សម្លាប់​នារី​រកស៊ី​ផ្លូវភេទ​ម្នាក់​ត្រូវ​សមត្ថកិច្ច​ជំនាញ​បិទ​បញ្ចប់​សំណុំ​រឿង​ស៊ើបសួរ​តាម​នីតិវិធី​ហើយ​ ហើយ​ជនល្មើស​នឹង​​ត្រូវ​បញ្ជូន​​ទៅ​តុលាការ​នៅ​ថ្ងៃ​សុក្រ​នេះ​។

លោក​បាន​បន្ត​ថា​៖ ​«ជនល្មើស​ទាំង ៦ ​នាក់​នោះ​សុទ្ធតែ​រំលោភ​នារី​រងគ្រោះ​បាន​សម្រេច​ទាំងអស់​ហើយ​ជា​អ្នក​ដៃ​​ដល់​រួម​គ្នា​សម្លាប់​ជនរងគ្រោះ​ខ្លះ​ច្របាច់​ក​ ខ្លះ​ចាប់​ជើង ខឹង​នាង​គំរាម​ប្តឹង​ប៉ូលិស​»។

លោក​បាន​​ឲ្យ​ដឹង​​តាម​​ចម្លើយ​ជនសង្ស័យ​​ថា​មុន​ករណី​ឃាតកម្ម​កើតឡើង​ឈ្មោះ ជិន ណាវី និង​ ម៉ម វណ្ណាន បាន​ជិះម៉ូ​​តូ​ទៅ​រក​នារី​រកស៊ី​ផ្លូវភេទ​នៅ​ម្តុំ​ហាង​បុប្ជា​ក្នុង​ភូមិ​តាងួន​សង្កាត់​កាកាប​​វេលា​ម៉ោង ៨-៩ ​យប់​។ លុះ​និយាយ​ត្រូវ​រ៉ូវ​គ្នា​ក្នុង​មនុស្ស​​​ម្នាក់​តម្លៃ​ ១០ ​​ដុល្លារ​ពួកគេ​បាន​​ឌុប​​​នារី​រងគ្រោះ​មក​ដេក​ក្នុង​ការដ្ឋាន​សំណង់​​មួយ​នៅ​ភូមិ​ត្រពាំងល្វា សង្កាត់​កាកាប​។

ប៉ុន្តែ​បក្ខពួក​គេ​ម្នាក់​ដេក​ជាមួយ​ជនរងគ្រោះ​ហើយ​ក៏​មាន​ពួកគេ ៥ នាក់​ទៀត​មក​​ចាប់​នាង​រំលោភ​​រហូត​​បាន​សម្រេច​ទាំងអស់​គ្នា​​។ លោក​អធិការ​បន្ត​ទៀត​ថា​បន្ទាប់ពី​បាន​​ឈ្លោះ​ប្រកែក​ជាមួយ​​ក្រុម​ជនសង្ស័យ​ដែល​មិន​ព្រម​ឲ្យ​លុយ​ស្រ្តី​រងគ្រោះ​បាន​គំរាម​ថា​នឹង​រាយការណ៍​ប្រាប់​ទៅ​សមត្ថកិច្ច​នគរបាល​ឲ្យ​ចាប់​ពួកគេ​តែ​​ត្រូវ​ក្រុម​ជនល្មើស​នាំគ្នា​ចាប់​ច្របាច់​ក​នាង​រហូត​ស្លាប់​ហើយ​ដឹក​សាកសព​​តាម​ម៉ូតូ​​យក​ទៅ​ទម្លាក់​​ចោល​ទាំង​យប់​នៅ​ក្បែ​រវត្ត​អង្គតាមិញ សង្កាត់​កាកាប ខណ្ឌ​ពោធិ៍សែនជ័យ​។

លោក​បាន​ឲ្យ​​ដឹង​ថា​បន្ទាប់ពី​ធ្វើការ​ស្រាវជ្រាវ​អស់​​រយៈពេល ៧២​ ម៉ោង​ ចាប់ពី​ថ្ងៃ​ទី​ ២៦ ​ដល់​ថ្ងៃ​ទី​ ២៩ ​កក្កដា​មក​សមត្ថកិច្ច​បាន​កំណត់​​មុខសញ្ញា​ឈាន​​ដល់​ចាប់​បក្ខពួក​ជន​ដៃដល់​បាន​ទាំងអស់​នៅ​រសៀល​ម៉ោង ២ ​ថ្ងៃ​ទី ២៩ កក្កដា ក្នុង​ការដ្ឋាន​សំណង់​ដែល​ពួកគេ​ធ្វើការ​ស្ថិត​​នៅ​​សង្កាត់​កាកាប​។

ក្រុម​ជនសង្ស័យ​​មាន​ឈ្មោះ ជិន ណាវី អាយុ ២៩​ ឆ្នាំ​រស់នៅ​​ភូមិ​សៀមបូក ឃុំ​ព្រៃចា ស្រុក​ជើងព្រៃ ខេត្ត​​កំពង់ចាម អៀម ឡុច អាយុ ២០ ឆ្នាំ​ រស់នៅ​ភូមិ-ឃុំ បាក់ស្នា ស្រុក​បារាយណ៍ ខេត្ត​កំពង់ធំ ខាត់សួរ អាយុ ១៧ ឆ្នាំ​នៅ​ភូមិ-ឃុំ បាក់ស្នា ស្រុក​បារាយណ៍ ខេត្ត​កំពង់ធំ ណាង ណាវី អាយុ​ ១៩ ឆ្នាំ រស់នៅ​ភូមិ មានជ័យ ឃុំ​ចុងអំពិល ស្រុក​កញ្ជ្រៀច ខេត្ត​ព្រៃវែង មឿន ខី អាយុ ២០ ឆ្នាំ រស់នៅ​ភូមិ-ឃុំ បាក់ស្នា ស្រុក​បារាយណ៍ ខេត្ត កំពង់ធំ និង​ឈ្មោះ ម៉ម វណ្ណាន អាយុ​ ២០ ឆ្នាំ​នៅ​ភូមិ​សៀមបោយ ឃុំ​ព្រៃចា ស្រុក​ជើងព្រៃ ខេត្ត​កំពង់ចាម​។

សូម​រំឭក​ថា​សព​នារី​រងគ្រោះ​ក្រោយពី​ក្រុម​ជនសង្ស័យ​ធ្វើ​សកម្មភាព​រំលោភ និង​សម្លាប់​រួច​ក្រុម​ជនសង្ស័យ​បាន​រុំ​សព​ដោយ​អង្រឹង​ហើយ​យក​មក​ប្លុង​ចោល​នៅ​ក្បែរ​វត្ត​អង្គតាមិញ​ក្នុង​សង្កាត់​កាកាប ខណ្ឌ​ពោធិ៍សែនជ័យ។ លុះ​ព្រឹក​ឡើង​នៅ​ថ្ងៃ​ទី ២៦ ខែ​កក្កដា ឆ្នាំ ២០១៥ សព​នាង​ត្រូវ​បាន​ប្រជាពលរដ្ឋ​ប្រទះ​ឃើញ និង​បាន​រាយការណ៍​ប្រាប់​សមត្ថកិច្ច​៕

0

Comments

Please, login or register to post a comment