.jpg)
អ្នកជំនាញណែនាំឲ្យអ្នកជម្រុះចោលកង្វល់ពីរឿងកង្វះលំហាត់ប្រាណជាមុនសិន។
ក្រុងឡុងដ៍: ក្នុងឆ្នាំថ្មី ២០១៨ នេះ មនុស្សម្នាក់ៗខិតខំតាំងចិត្ដចុះឈ្មោះចូលហ្វឹកហាត់នៅក្លិបយ៉ាងមុតមាំសម្បើមណាស់ ពីព្រោះបារម្ភចំពោះសុខភាព។ ប៉ុន្ដែការគិតគូរចំពោះការសម្រកទម្ងន់ជ្រុល អាចជះឥទ្ធិពលអាក្រក់លើសុខភាព។
ចិត្ដវិទូម្នាក់បានព្រមានថា ក្ដីបារម្ភអំពីលំហាត់ប្រាណថា តើគួរត្រូវខិតខំហាត់ដល់កម្រិតណា អាចធ្វើឲ្យអ្នកឆាប់ស្លាប់ទៅវិញទេ។ គេជឿថា ស្ដ្រេសនាំឲ្យកើតអត្ដចរិតមិនអំណោយផលដល់សុខភាព ដូចជា ការទទួលទានគ្រឿងស្រវឹងច្រើន ហើយផ្ទុយពីការជំរុញទឹកចិត្ដឲ្យធ្វើលំហាត់ប្រាណ បែរជាលែងចង់ធ្វើអ្វីទៅវិញ។
ភ័ស្ដុតាង បានបង្ហាញថា អត្ដចរិតបែបនេះ អាចបង្កើនហានិភ័យឆាប់ស្លាប់មុនអាយុនៅរយៈពេល ២០ ឆ្នាំទៅមុខរហូតដល់ ៧០ ភាគរយ។
វេជ្ជបណ្ឌិត រ៉ូប៊ីន បៃលី អ្នកឯកទេសព្យាបាលចិត្ដសាស្ដ្រផ្នែកអត្ដចរិតមកពីសាកលវិទ្យាល័យ Central Lancashire បាននិយាយថា៖ «នេះគឺជាវេលាក្នុងមួយឆ្នាំ នៅពេលមនុស្សគ្រប់រូបចាប់ផ្ដើមនឹកនាដល់ការធ្វើលំហាត់ប្រាណ។ ពួកគេបារម្ភពីការទទួលទានច្រើនពេក។ យ៉ាងណាមិញ ស្ដ្រេសបែបនេះ ត្រូវបានភ្ជាប់ទៅនឹងឥទ្ធិពលអវិជ្ជមាន ចំពោះសុខភាព ខណៈអ្នកដែលជួបបទពិសោធស្ដ្រេសបង្ហាញនូវអត្ដចរិតប៉ះពាល់ដល់សុខភាពមិនថាតែការជក់បារី ផឹកគ្រឿងស្រវឹងច្រើន ឬអត់ខ្វល់រឿងហាត់ប្រាណពីព្រោះពួកគេបារម្ភជ្រុលពេក»។
មុននឹងផ្ដើមហាត់ប្រាណ អ្នកត្រូវបោះបង់ក្ដីកង្វល់ចំពោះខ្លួនឯង ដែលថា តើគួរត្រូវហាត់ប្រាណកម្រិតណាធៀបនឹងអ្នកដទៃ៕
HR
