.jpg)
ការសិក្សាជាច្រើនជំនាន់នៅតែសង្កត់ធ្ងន់ពីផលវិជ្ជមាននៃសត្វចិញ្ចឹម។
ក្រុងឡុងដ៍: យើងបានដឹងថា សត្វចិញ្ចឹមអាចផ្ដល់សារៈសំខាន់មួយផ្នែកនៃមជ្ឈមណ្ឌលថែទាំសុខភាពតាំងពីសតវត្សរ៍ទី ៩។ ទំនាក់ទំនងរវាងមនុស្ស និងសត្វត្រូវបានប្រើរាប់រយឆ្នាំដើម្បីជួយមនុស្សជាសះស្បើយពីប្រភេទជំងឺផ្សេងៗទាំងផ្លូវកាយ និងផ្លូវចិត្ត។
ជាក់ស្ដែង ការស្រាវជ្រាវថ្មីដែលចុះផ្សាយក្នុងព្រឹត្តិបត្រ BMC Psychiatry បានរកឃើញយ៉ាងច្បាស់ថា សត្វចិញ្ចឹមបង្កើនសុខភាពផ្លូវចិត្ដ។
ក្រុមស្រាវជ្រាវមកពីសាកលវិទ្យាល័យអង់គ្លេស ៣ ទីតាំង (មេនឆែស្ទើរ លីវើរភូល និងសោតថេមតុន) បានធ្វើការសើរើលើការសិក្សាជាច្រើនចំពោះសត្វចិញ្ចឹម។
ការវិភាគលើឯកសារអន្ដរជាតិចំនួន ១៧ បានតាមដានពីអត្ថប្រយោជន៍នៃឥទ្ធិពលសត្វចិញ្ចឹមមកលើការរស់នៅរបស់មនុស្ស ហើយថាតើវាជះឥទ្ធិពលលើមនុស្សកម្រិតណា ប្រសើរ ឬកាន់តែអាក្រក់។
ឯកសារនីមួយៗបានសង្កត់ធ្ងន់លើទំនាក់ទំនងស៊ីជម្រៅរវាងម្ចាស់ និងសត្វចិញ្ចឹម ដោយគ្មានករណីលើកលែង។ ម្ចាស់សត្វចិញ្ចឹមទាំងអស់ បានអះអាងថា សត្វពួកវាដោះស្រាយបញ្ហាវិបត្តិផ្លូវចិត្ដប្រចាំថ្ងៃ។
លទ្ធផលទាំងនេះ បានជូនដំណឹងដល់មជ្ឈមណ្ឌលថែទាំសុខភាព ដែលនាំឲ្យមានការព្យាបាលទាក់ទងនឹងសត្វតែម្ដង។
ការព្យាយាមដោយប្រើសត្វចិញ្ចឹម ឬហៅថា សត្វជួយអន្ដរាគមន៍ ឬព្យាបាលត្រូវបានប្រើសម្រាប់អ្នកកើតជំងឺលើរាងកាយ និងអ្នកមានបញ្ហាវិបត្ដិផ្លូវចិត្ដ។ ប៉ុន្ដែការព្យាបាលដោយប្រើសត្វចិញ្ចឹម ដូចជា ឆ្កែ ឆ្មា បក្សី និងសេះក៏ផ្ដល់ផលវិជ្ជមានដល់អ្នកគ្មានបញ្ហាសុខភាព និងគ្រប់គ្រងអារម្មណ៍ស្រេ្តសផងដែរ៕HR
