ក្រុងស៊ីដនី: យោងតាមការស្រាវជ្រាវថ្មីមួយ បានបង្ហាញថា ម្នាក់ក្នុងចំណោម ៥ នាក់តែងតែទំពាស្ករកៅស៊ូដើម្បីរក្សាខ្យល់ដង្ហើមស្រស់ថ្លា តែពួកគេមិនដឹងថា ខ្លួនកំពុងតែបង្កបញ្ហាកាន់តែធ្ងន់ធ្ងរឡើយ។
ទន្ដពេទ្យម្នាក់បាននិយាយថា ជាតិស្ករមិនត្រឹមធ្វើឲ្យធ្មេញពុកប៉ុណ្ណោះទេ ប៉ុន្ដែថែមទាំងបង្កជាក្លិនមិនល្អផងដែរ។
លោក ចេមស៍ ប៊ូឆាណាន់ មកពីអូស្ដ្រាលី បាននិយាយថា៖ «ទំពាស្ករកៅស៊ូជាវិធីកម្ចាត់ក្លិនដង្ហើមមិនល្អ។ បាក់តេរីក្នុងមាត់បានប្រែក្លាយជាតិស្ករទៅជាអាស៊ីត ដែលតោងជាប់ធ្មេញ និងបង្កឲ្យមានក្លិនដង្ហើមស្អុយ។ យកល្អគួរតែប្រើស្ករកៅស៊ូគ្មានជាតិស្ករ»។
ផ្ទុយទៅវិញ លោកបានណែនាំឲ្យទទួលទានទឹកដោះគោជូរ និងផ្លែឈើសម្រាប់អាហារពេលព្រឹកដើម្បីសម្អាតមាត់ធ្មេញ និងខ្យល់ដង្ហើមបរិសុទ្ធ។ បន្លែសេលេរី និងផ្លែប៉ោម ក៏អាចជួយបង្កើនទឹកមាត់ និងលាងសម្អាតកម្ទេចកម្ទីដែលបង្កឲ្យមានក្លិនមាត់ធ្មេញ។
Vital Statistics តំណាងឲ្យ White Glo បានស្ទង់មតិមនុស្ស ២ ពាន់នាក់អំពីទម្លាប់សម្អាតមាត់ធ្មេញ។
គួរឲ្យភ្ញាក់ផ្អើល មនុស្សតែ ៥២ ភាគរយបានរាយការណ៍ពីការប្រើវិធីដុសសម្អាតធ្មេញ ២ ដងក្នុងមួយថ្ងៃ ដែលជាចំនួនត្រូវបានណែនាំ។ ដើមចមបង្កឲ្យមានបញ្ហាក្លិនមាត់ចម្បងបំផុតគឺកង្វះការសម្អាតមាត់ ទោះជាមូលហេតុផ្សេងៗអាចជាកត្ដាចំណីអាហារ និងភេសជ្ជៈ ព្រមទាំងទម្លាប់ជក់បារី ការប្រើប្រាស់ឱសថ និងស្ថានភាពជំងឺក៏ដោយ។
លោក ប៊ូឆាណាន់ និយាយថា៖ «កាកសំណល់អាហារជាប់ក្នុងធ្មេញ ធ្វើឲ្យធុំក្លិនមាត់ តែដើមចមសំខាន់បំផុតគឺកំបោរតាមគល់ធ្មេញ»៕HR