Search form

Login - Register | FOLLOW US ON

Logo of Phnom Penh Post newspaper Phnom Penh Post - កម្ចី​របស់​មីក្រូហិរញ្ញវត្ថុ ស្ទើរ​តែ​នៅ​ទ្រឹង​ក្នុងឆ្នាំ ​២០១៦

Content image - Phnom Penh Post
ប្រជា​ពលរដ្ឋ​ដែល​មក​ទទួល​សេវា​ហិរញ្ញវត្ថុ​ពី​គ្រឹះស្ថាន​មីក្រូ​ហិរញ្ញវត្ថុ​ប្រាក់​សាក់​សាខា​ស្រុក​អង្គ​ស្នួល​កន្លង​មក។ ហុង មិនា

កម្ចី​របស់​មីក្រូហិរញ្ញវត្ថុ ស្ទើរ​តែ​នៅ​ទ្រឹង​ក្នុងឆ្នាំ ​២០១៦

ភ្នំពេញៈ កម្ចី​នៅ​ក្នុង​វិស័យ​មីក្រូហិរញ្ញវត្ថុ​របស់​កម្ពុជា​ស្ទើរ​តែ​មិន​មាន​កំណើន​កាលពី​ឆ្នាំ​មុន ដោយ​សារ​កំណើន​ឥណទាន​នៅ​ទ្រឹង បន្ទាប់ពី​ការ​ទទួល​បាន​កំណើន​ដ៏​ធំ​ក្នុង​រយៈពេល​ជាច្រើន​ឆ្នាំ​មក​។ នេះ​បើ​យោង​តាម​របាយការណ៍​របស់​ធនាគារ​ពិភពលោក​បាន​ចេញ​ផ្សាយ​កាលពី​ថ្ងៃ​ពុធ​។

កំណើន​ឥណទាន​របស់​វិស័យ​មីក្រូ​ហិរញ្ញវត្ថុ​បាន​កើន​ឡើង​ខ្លាំង ​កាលពី​ឆ្នាំ ​២០១៤ ក្នុង​ចំនួន​ជាង ​៥០​ ភាគរយ​ធៀប​នឹង​រយៈពេល​ដូច​គ្នា ​កាលពី​ឆ្នាំ​ ២០១៣ ប៉ុន្តែ​បន្ទាប់​មក​បាន​ជាប់​គាំង​ដោយ​មិន​បាន​រំពឹង​ទុក​ កាលពី​ឆ្នាំ​ ២០១៦​។ ផលបត្រ​កម្ចី​រួម​របស់​គ្រឹះស្ថាន​មីក្រូ​ហិរញ្ញវត្ថុ​ (MFI)​ ទាំង​អស់​បាន​កើន​ឡើង​ ៤,៧​ ភាគរយ​ដល់ ៣,១៦ ​ពាន់​លាន​ដុល្លារ​ កាល​ពី​ចុង​ឆ្នាំ ​២០១៦​។

យោង​តាម​របាយ​ការណ៍​របស់​ធនាគារ​ពិភពលោក ហេតុ​ផល​នៅ​ពី​ក្រោយ​នៃ​ការ​ជាប់​គាំង​កំណើន​នេះ​ដោយ​សារ​ការ​ដក​ចេញ​មីក្រូ​ហិរញ្ញវត្ថុ​ស្ថាបនា​ទៅ​ជា​ធនាគារ​ពាណិជ្ជ​ការ​កើន​ឡើង​នៃ​ស្ថាប័ន​ក្រៅ​ផ្លូវ​ការ និង​ការ​ធ្លាក់​ចុះ​តម្រូវ​ការ​ពី​កសិករ អាជីវករ​ក្រៅ​ប្រព័ន្ធ​។

របាយ​ការណ៍​របស់ ធនាគារ​ពិភពលោក​បាន​លើក​ឡើង​ថា​៖ «​កំណើន​យ៉ាង​លឿន​រហ័ស​នៃ​ទំហំ​ឥណទាន ដូច​អ្វី​ដែល​កម្ពុជា​ធ្លាប់​ទទួល​បាន​ក្នុង​រយៈពេល​ប្រាំ​មួយ​ឆ្នាំ​ចុង​ក្រោយ​នេះ គឺថា​ការ​ឲ្យ​តម្លៃ​ពី​គុណភាព​នៃ​វិស័យ​នេះ​តែងតែ​ធ្វើ​ឡើង​ដោយ​យោង​លើ​ហេតុផល​ល្បឿន​ប្រាក់​កម្ចី​»​។

របាយការណ៍​ដដែល​បន្ថែម​ថា​៖«​ទាល់​តែ​ពេល​មាន​ការ​ថមថយ​ដ៏​គួរ​ឲ្យ​ព្រួយ​បារម្ភ​ណាមួយ​កើត​ឡើង ទើប​វា​នឹង​បង្ហាញ​ពី​ភាព​ងាយ​រងគ្រោះ​ជាក់ស្តែង​ជាង​មុន​។ ឧទាហរណ៍ ក្នុង​ករណី​ថា​មាន​អ្នក​ទទួល​កម្ចី​ជាច្រើន​បាន​ទទួល​កម្ចី​ថ្មី​ដើម្បី​សង​កម្ចី​ចាស់​ជាដើម​»។

យោង​តាម​របាយការណ៍​ចំនួន​គ្រួសារ​សរុប​ដែល​ទទួល​កម្ចី​ពី​គ្រឹះស្ថាន​មីក្រូ​ហិរញ្ញវត្ថុ​ទាំង​អស់​នៅ​ឆ្នាំ​ ២០១៦ មាន​ចំនួន ​២,១៤ ​លាន​គ្រួសារ​ធ្លាក់​ចុះ​ពី​ចំនួន​ ២,១៩​ លាន​គ្រួសារ​កាលពី​ឆ្នាំ​២០១៥​។ អត្រា​កម្ចី​មិន​ដំណើរ បាន​កើន​ឡើង​ដល់​ ១,៥​ ភាគរយ ​កាលពី​ឆ្នាំ​ ២០១៦ គឺ​កើន​ពី​ ០,៧​ ភាគរយ ​កាលពី​ឆ្នាំ​ ២០១៥​។

ត្រឹម​ចុង​ឆ្នាំ ​២០១៦ កម្ពុជា​មាន​មីក្រូ​ហិរញ្ញវត្ថុ​សរុប​ ៧១ ក្នុង​នោះ MFI ទទួល​យក​ប្រាក់​បញ្ញើ ​(MDI )​ចំនួន​ ៧ និង​ប្រតិបត្តិករ​ឥណទាន​ចុះ​បញ្ជី​ ១៧០ ​ផ្សេង​ទៀត​។ នេះ​បើ​យោង​តាម​របាយ​ការណ៍​ត្រួត​ពិនិត្យ​ឆ្នាំ​២០១៦ របស់​ធនាគារ​ជាតិ​នៃ​កម្ពុជា ​(NBC)​។

យោង​តាម​ NBC ការ​ផ្តល់​កម្ចី​របស់​MFI កាលពី​ឆ្នាំ ​២០១៦ មាន​កំណើន​តែ ​៤,៧ ​ភាគរយ ​ប៉ុណ្ណោះ ដែល​ជា​កំណើន​ធ្លាក់​ចុះ​យ៉ាង​ខ្លាំង​ធៀប​នឹង​ឆ្នាំ​មុនៗ​។

NBC បាន​ឲ្យ​ដឹង​ថា ការ​ធ្លាក់​ចុះ​នេះ បណ្ដាល​ដោយ​ការ​ច្របាច់​បញ្ចូល​គ្នា​រវាង​មីក្រូ​ហិរញ្ញវត្ថុ​ស្ថាបនា និង​ធនាគារ Maruhan Japan Bank ដែល​នៅ​ពេល​នេះ កម្ចី​ស្ថាបនា ត្រូវ​បាន​ដក​ចេញ​ពី​ការ​គណនា​របស់​វិស័យ​មីក្រូ​ហិរញ្ញវត្ថុ​ពី​ឆ្នាំ​២០១៦​។

កម្ចី​របស់​ស្ថាបនា​បាន​កើន​ឡើង​ដល់​៥៩៩​លាន​ដុល្លារ​ត្រឹម​ចុងឆ្នាំ​ ២០១៦​។ ចំនួន​នេះ ប្រសិន​បើ​រួម​បញ្ចូល​ជាមួយ​កម្ចី​នៅ​ក្នុង​វិស័យ MFI នឹង​ធ្វើ​ឲ្យ​កម្ចី​នៅ​ក្នុង​វិស័យ​នេះ​បាន​កើន​ឡើង​ដល់​ ៣,៧ ​ពាន់​លាន​ដុល្លារ​។

លោក ប៊ុន មុន្នី ទីប្រឹក្សា​សមាគម​មីក្រូ​ហិរញ្ញវត្ថុ​កម្ពុជា ​(CMA) និង​ជា​អតីត​អគ្គនាយក​ធនាគារ ស្ថាបនា បាន​ឲ្យ​ដឹង​ថា ការ​ដក​ចេញ​កម្ចី​របស់​ស្ថាបនា​ពី​វិស័យ ​MFI គឺជា​ហេតុ​ផល​សំខាន់​នៃ​ការ​នៅ​ទ្រឹង​កាលពី​ឆ្នាំ​មុន​។ ក្រៅពី​នោះ មាន​តម្រូវ​ការ​ទាប​ពី​កសិករ​ផង​ដែរ ដោយ​សារ​ភាព​រាំង​ស្ងួត​ពន្យារ​ពេល​យូរ និង​ តម្លៃ​ទំនិញ​កសិកម្ម​ទាប​។

ប៉ុន្តែ​ លោក​ឲ្យ​ដឹង​ថា តម្រូវការ​ឥណទាន​នៅ​តែ​កើន​ឡើង ដោយ​សារ​ការ​ធៀប​នឹង​ឆ្នាំ​ ២០១៥ វា​មាន​មូលដ្ឋាន​គឺ​ធំ​រួច​ទៅ​ហើយ​។

លោក​ថ្លែង​ថា​៖ «​ដើម្បី​រក្សា ឬ​បង្កើន​ជាថ្មី​ដល់​អត្រា​កំណើន​កម្ចី ស្ថាប័ន​រដ្ឋាភិបាល​ចាំបាច់​ត្រូវ​ធានា​ឲ្យ​ប្រាកដ​ដល់​តម្រូវការ​ទីផ្សារ​របស់​ដំណាំ​កសិកម្ម​សំខាន់ៗ​ដូច​ជា ស្រូវ ម្រេច គ្រាប់​ស្វាយ​ចន្ទី កៅស៊ូ និង​ដំណាំ​កសិកម្ម​ផ្សេង​ទៀត​»​។

លោក​ ហួត អៀងតុង អគ្គនាយក​ធនាគារ ហត្ថា​កសិករ បាន​ឲ្យ​ដឹង​ថា ៖ «​ខ្ញុំ​គិត​ថា កំណើន​ឥណទាន​យឺត​ល្អ​ដោយ​សារ​តែ​វា​ងាក​ទៅរក​កំណើន​កាន់​តែ​ប្រសើរ​ដែល​ផ្ដល់​អត្ថ​ប្រយោជន៍​ដល់​ភាគី​ទាំង​អស់​»៕ LA

0

Comments

Please, login or register to post a comment