Search form

Login - Register | FOLLOW US ON

Logo of Phnom Penh Post newspaper Phnom Penh Post - កម្ពុជា​ចុះ MoU ជាមួយ​ក្រុមហ៊ុន​ចិន​ជំរុញ​នាំ​ចេញ​អង្ករ

Content image - Phnom Penh Post
កម្មករ​កំពុង​លី​ស្រូវ​ដាក់​លើ​ឡាន​ពេល​ឈ្មួញ​ចុះ​ទៅ​ទិញ​ស្រូវ​កសិករ​នៅ​ខេត្ត​បាត់ដំបង​កន្លង​មក​។ ហេង ជីវ័ន

កម្ពុជា​ចុះ MoU ជាមួយ​ក្រុមហ៊ុន​ចិន​ជំរុញ​នាំ​ចេញ​អង្ករ

ភ្នំពេញៈ រដ្ឋាភិបាល​កម្ពុជា​កាល​ពី​ម្សិលមិញ​បាន​ចុះ​អនុស្សរណៈ​នៃ​ការ​យោគយល់ (MoU) ២ ​ផ្សេង​គ្នា​ជាមួយ​ក្រុមហ៊ុន​ចិន​ធំៗ ក្នុង​គោលដៅ​សហការ​អនុវត្ត​គម្រោង ដើម្បី​បង្កើន​ផលិតកម្ម​ស្រូវ​នៅ​កម្ពុជា និង​ការ​នាំ​ចេញ​អង្ករ​កម្ពុជា​។ នេះ​បើ​យោង​តាម​សេចក្តី​ប្រកាស​ព័ត៌មាន​បន្ទាប់ពី​ពិធី​ចុះ​ហត្ថលេខា​កាលពី​ម្សិលមិញ​។

យោង​តាម​សេចក្តី​ប្រកាស​ព័ត៌មាន​ដដែល MoU កិច្ចសហការ​រវាង​ កម្ពុជា​-​ចិន នេះ​គឺ​ផ្តោត​សំខាន់​លើ​គម្រោង​ ២​ រួម​មាន សម្រប​សម្រួល​កិច្ចសហ​ប្រតិបត្តិការ​រវាង​ស្ថាប័នរដ្ឋ និង​រដ្ឋ​នៃ​ប្រទេស​ទាំង​ ២​ ដើម្បី​ស្វែងរក​លទ្ធភាព​បង្កើន​កូតា​នៃ​ការ​នាំ​ចេញ​អង្ករ​ទៅ​ចិន (​ពី​បរិមាណ​ដែល​មាន​ស្រាប់​) និង គម្រោង​សហការ​អភិវឌ្ឍន៍​ហេដ្ឋា​រចនា​សម្ព័ន្ធ​ស្រូវ (​ឃ្លាំង​ស្តុក និង​ឡ​សម្ងួត​)​។

សេចក្តី​ជូន​ដំណឹង​បាន​បញ្ជាក់​ថា​៖ «​រាជរដ្ឋាភិបាល​កម្ពុជា​នឹង​ស្នើ​ប្រើប្រាស់​ឥណទាន​សម្បទាន​ពី​ចិន ដើម្បី​អនុវត្ត​គម្រោង​នេះ​ដោយ​វិនិយោគ​លើ​ការ​សាងសង់​ហេដ្ឋា​រចនា​សម្ព័ន្ធ​ឃ្លាំង​ស្តុក​ស្រូវ​អង្ករ និង​ឡ​សម្ងួត​នៅ​ទីកន្លែង​ចាំបាច់​ទូទាំង​ប្រទេស​ដើម្បី​ផ្តល់​សេវា​ស្តុក និង​សម្ងួត​ជូន​ប្រជា​កសិករ និង​ធុរជន ក្នុង​តម្លៃ​ទាប​សមរម្យ​»​។

សេចក្តី​ជូន​ដំណឹង​កាលពី​ម្សិលមិញ​មិន​បាន​បញ្ជាក់​ពី​ទឹក​ប្រាក់​ដែល​អាច​វិនិយោគ​ក្នុង​គម្រោង​នេះ​នោះ​ទេ​។

MoU ទីមួយ​ត្រូវ​បាន​ចុះ​ហត្ថលេខា​រួម​ដោយ​លោក អូន ព័ន្ធមុនីរ័ត្ន រដ្ឋ​មន្ត្រី​ក្រសួង​សេដ្ឋកិច្ច និង​ហិរញ្ញវត្ថុ និង​ លោក ប៉ាន សូរ​ស័ក្តិ រដ្ឋ​មន្ត្រី​ក្រសួង​ពាណិជ្ជកម្ម និង លោក Liu Liange ប្រធាន​ធនាគារ​នីហរ័ណ អាហរ័ណ​ចិន និង​លោក Wang Jiong ប្រធាន​ក្រុមហ៊ុន CITIC Group​។

MoU ទី​២​ ត្រូវ​បាន​ចុះ​ហត្ថលេខា​រួម​ដោយ​រដ្ឋ​មន្ត្រី​ទាំង​២​រូប​ដដែល ជាមួយ​តំណាង​ក្រុមហ៊ុន CITIC Cooperation និង Henan Yuguang International Eonomic & Technical Cooperation​។

ប្រទេស​ចិន​គឺជា​ទីផ្សារ​ដ៏​ធំ​សម្រាប់​អង្ករ​កម្ពុជា​។

យោង​តាម​របាយការណ៍​រដ្ឋាភិបាល​កម្ពុជា​ដែល​បាន​ចេញ​ផ្សាយ​កាលពី​សប្ដាហ៍​មុន ប្រទេស​កម្ពុជា​បាន​នាំ​ចេញ​អង្ករ​ ១៤២,៧៦៨​ តោន​ទៅ​ប្រទេស​ចិន​ក្នុង​រយៈពេល​ ១០​ ខែ​នៃ​ឆ្នាំ​ ២០១៧ កើន​ឡើង​ ៥៩​ ភាគរយ​ក្នុង​រយៈពេល​ដូច​គ្នា​កាលពី​ឆ្នាំ​មុន​។

របាយការណ៍​បន្ត​ថា ការ​នាំ​ចេញ​ទៅ​ប្រទេស​ចិន​មាន​ចំនួន​ជិត ​១​ ភាគ​ ៣​ នៃ​ការ​នាំ​ចេញ​សរុប​របស់​កម្ពុជា ដែល​ការ​នាំ​ចេញ​សរុប​មាន​ចំនួន ​៤៩២,១១៥​ តោន​ក្នុង​អំឡុង​ខែមករា​ដល់​ខែ​តុលា​នៅ​ឆ្នាំ​នេះ ​កើន​ឡើង​ ១៧​ ភាគរយ​ក្នុង​រយៈពេល​ដូច​គ្នា​ កាលពី​ឆ្នាំ​មុន​។

ប្រទេស​កម្ពុជា​រំពឹង​ថា នឹង​នាំ​ចេញ​អង្ករ​ពី ​២០០ ០០០​ តោន​ទៅ​ប្រទេស​ចិន ​ក្នុង​ឆ្នាំ​ ២០១៧ និង​ ៣០០ ០០០​ តោន​ក្នុង​ឆ្នាំ​ ២០១៨​។

លោក​ សុង សារ៉ន អគ្គនាយក​ក្រុមហ៊ុន អេមរុ រ៉ាយស៍ ​(​ខេមបូឌា​) ដែល​ទើប​ទទួល​បាន​កម្ចី​ពី​រដ្ឋាភិបាល​ចំនួន​ ៥ ​លាន​ដុល្លារ​ដើម្បី​សាងសង់​ឃ្លាំង​ស្ដុក និង​ឡ​សម្ងួត​នៅ​ក្នុង​ខេត្ត​កំពង់ធំ បាន​ឲ្យ​ដឹង​កាលពី​ថ្ងៃ​ម្សិលមិញ​ថា វា​ជា​គំនិត​ផ្ដួចផ្ដើម​ដ៏​ល្អ​ពី​រដ្ឋាភិបាល​ដែល​ស្វែងរក​ការ​អនុវត្ត​ក្នុង​ការ​បើក​ចំហ​លទ្ធភាព​ទីផ្សារ​សម្រាប់​អង្ករ និង​ការ​អភិវឌ្ឍ​ឃ្លាំង​ស្ដុក​អង្ករ និង​ហេដ្ឋា​រចនា​សម្ព័ន្ធ​ស្ដុក​របស់​ប្រទេស​កម្ពុជា​។

ខណៈ​កម្ពុជា​ផលិត​ស្រូវ​បាន​ជាង​៩​លាន​តោន​ក្នុង​មួយ​ឆ្នាំ លោក​សារ៉ន ថ្លែងថា កម្ពុជា​មាន​ស្រូវ​លើស​ជាង​ ៤ ​លាន​តោន ហើយ​តែង​តែ​ហូរ​ចេញ​ទៅ​បណ្ដា​ប្រទេស​ជាច្រើន​ក្នុង​អំឡុង​រដូវ​ប្រមូល​ផល​ដោយ​សារ​សមត្ថភាព​ទិញ​ស្រូវ​ក្នុង​ស្រុក​នៅ​មាន​កម្រិត​។

លោក​ថ្លែងថា​៖ «​ការ​មាន​ឃ្លាំង​ស្ដុក និង​ហេដ្ឋា​រចនា​សម្ព័ន្ធ​ស្ដុក​គ្រប់​គ្រាន់​នឹង​ជួយ​ទប់ស្កាត់​លំហូរ​ចេញ​ស្រូវ ជាពិសេស​ស្រូវ​ក្រអូប ទៅ​ប្រទេស​ជិត​ខាង​របស់​យើង​ក្នុង​អំឡុង​រដូវ​ប្រមូល​ផល​»​។

លោក​បន្ត​ថា​៖ «​ចិន​គឺជា​ទីផ្សារ​ដ៏​មាន​សក្ដានុពល​ខ្លាំង​បំផុត​សម្រាប់​ផលិតផល​កម្ពុជា​មិន​គ្រាន់​តែ​ស្រូវ​ប៉ុណ្ណោះ​ទេ ប៉ុន្តែ​ថែម​ទាំង​ដំណាំ​កសិកម្ម​ជាច្រើន​ផ្សេង​ទៀត​ផងដែរ​»​។ លោក​បន្ថែម​ថា ការ​ប្រើ​ប្រាស់​អង្ករ​របស់​ចិន​មាន​ប្រហែល​៥​លាន​តោន​ប្រចាំ​ឆ្នាំ ប្រហែល ​៣០​ភាគរយ ជា​អង្ករ​ក្រអូប​។

លោក ម៉ី កល្យាណ ទីប្រឹក្សា​ជាន់ខ្ពស់​នៅ​ឧត្តម​ក្រុម​ប្រឹក្សា​សេដ្ឋកិច្ច​ជាតិ បាន​ថ្លែង​កាលពី​ម្សិលមិញ​ថា គំនិត​ផ្ដួច​ផ្ដើម​សម្រាប់​ការ​បង្កើន​ការ​ផលិត​ស្រូវ​តាមរយៈ​ឃ្លាំង​ស្ដុក និង​ហេដ្ឋា​រចនា​សម្ព័ន្ធ​ស្ដុក​គឺជា​អ្វីដែល​ត្រូវ​ការ និង​ត្រូវ​បាន​ពិភាក្សា​អស់​រយៈពេល​ជា​យូរ​។

លោក​ថ្លែងថា​៖ «​ការ​អនុវត្ត​គម្រោង​មួយ​គួរ​តែ​ត្រូវ​ការ​ពេលវេលា​។ ប៉ុន្តែ​យើង​ស្វាគមន៍​ជា​ខ្លាំង​សម្រាប់​ការ​មាន​កិច្ច​ព្រម​ព្រៀង MoU នៅ​ថ្ងៃ​នេះ ខណៈ​យើង​សង្ឃឹម​ថា វា​នឹង​បើក​ចំហ​ឱកាស​ក្នុង​ការ​ធ្វើ​ឲ្យ​គម្រោង​សម្រេច​បាន​កាន់​តែ​ឆាប់​»៕ LA

0

Comments

Please, login or register to post a comment