Search form

Login - Register | FOLLOW US ON

Logo of Phnom Penh Post newspaper Phnom Penh Post - កម្ពុជា ​នាំ​ចេញ​ទៅ​អាមេរិក ​នៅ​ឆមាស​ទី១​ ជាង ​$១,៣ ​ពាន់​លាន

Content image - Phnom Penh Post
កម្មការិនីរោងចក្រមួយ កំពុង​​ដេរ​​សម្លៀក​បំពាក់​​នៅ​ក្នុង​រោងចក្រ​កាត់ដេរ​មួយ​នៅ​ក្នុង​រាជធានី​ភ្នំពេញ កាល​ពី​ឆ្នាំ​មុន។ ហេង ជីវ័ន

កម្ពុជា ​នាំ​ចេញ​ទៅ​អាមេរិក ​នៅ​ឆមាស​ទី១​ ជាង ​$១,៣ ​ពាន់​លាន

ភ្នំពេញៈ ការ​នាំ​ចេញ​សរុប​របស់​កម្ពុជា​ទៅ​អាមេរិក​នៅ​ឆមាស​ទី ១ មាន​ជាង ១,៣​ ពាន់​លាន​ដុល្លារ កើន​ឡើង​តិចតួច​ បន្ទាប់​ពី​បាន​ធ្លាក់​ចុះ​កាលពី​ឆមាស​ទី​ ១ ​ឆ្នាំ​មុន ជា​អ្វី​ដែល​មន្ត្រី​រដ្ឋាភិបាល និង​អ្នក​ជំនាញ​អះអាង​ថា ការ​ឡើង​នេះ​ត្រូវ​បាន​រួម​ចំណែក​បន្ទាប់​ពី​អាមេរិក​បាន​ផ្តល់​សិទ្ធិ​ពិសេស​នាំ​ចេញ​ដោយ​មិន​ជាប់​ពន្ធគយ​លើ​ទំនិញ​ធ្វើ​ដំណើរ​។

កាលពី​ឆ្នាំ​មុន សហរដ្ឋ​អាមេរិក​បាន​ធ្វើ​ការ​សម្រេច​ថ្មី​ចំពោះ​ប្រព័ន្ធ​អនុគ្រោះ​ពន្ធ​ទូទៅ​ (GSP) ហើយ​អនុញ្ញាត​ឲ្យ​ផលិតផល​ទាក់ទង​នឹង​ការ​ធ្វើ​ដំណើរ​ផលិត​នៅ​កម្ពុជា​ដូច​ជា​វ៉ាលិស កាបូប​ដាក់​អីវ៉ាន់ កាបូប​យួរដៃ និង​កាបូប​ប្រាក់​ផ្សេងៗ​ជា​ដើម អាច​នាំ​ចេញ​ទៅ​ទីផ្សារ​អាមេរិក​ដោយ​មិន​ជាប់​ពន្ធគយ ដោយ​បាន​អនុវត្ត​ចាប់ពី​ថ្ងៃទី​១​ខែ​កក្កដា ឆ្នាំ​២០១៦ មក​។

ទិន្នន័យ​ពាណិជ្ជកម្ម​ចុង​ក្រោយ​របស់​ក្រសួង​ពាណិជ្ជកម្ម​អាមេរិក​បង្ហាញ​ថា​ទឹក​ប្រាក់​នៃ​ការ​នាំ​ចេញ​ទំនិញ​របស់​កម្ពុជា​ទៅ​អាមេរិក​ចាប់​ពី​ខែ​ មករា ដល់​ខែ ​មិថុនា ឆ្នាំ​នេះ​មាន​សរុប​ ១,៣៦​ ពាន់​លាន​ដុល្លារ កើន​ឡើង ​៤,៦ ភាគរយ​ពី​ ១,៣០​ ពាន់​លាន​ដុល្លារ​ក្នុង​អំឡុង​ពេល​ដូចគ្នា​កាលពី​ឆ្នាំ​មុន​។

ទោះបី​ជា​មាន​កំណើន​ទាប តែ​ទិន្នន័យ​នេះ​បង្ហាញ​ពី​ការ​ងើប​ឡើង​វិញ​នៃ​ការនាំ​ចេញ​ទៅ​អាមេរិក ខណៈ​កាលពី​ឆមាស​ទីមួយ​ឆ្នាំ​មុន​ទឹក​ប្រាក់​ពី​ការ​នាំ​ចេញ​បាន​ធ្លាក់​ចុះ ១៣ ភាគរយ​ពី ១,៥ ពាន់​លាន​ដុល្លារ​ឆមាស​ទីមួយ​ឆ្នាំ​ ២០១៥ មក​ ១,៣០ ពាន់​លាន​ដុល្លារ​នៅ​ឆមាស​ទីមួយ​ឆ្នាំ ២០១៦​។

ការ​នាំ​ចេញ​មួយ​ឆ្នាំ​ពេញ​ ២០១៦ ក៏មាន​ធ្លាក់ចុះ​ប្រមាណ​៧​ភាគរយ​ដែរ គឺ​ពី​ ៣,០២ ​ពាន់​លាន​ដុល្លារ​កាលពី​ឆ្នាំ​ ២០១៥ មក​នៅ​ត្រឹម ​២,៨១ ​ពាន់​លាន​ដុល្លារ​ កាលពី​ឆ្នាំ​ ២០១៦​។

ខណៈ​ទិន្នន័យ​ពាណិជ្ជកម្ម​មិន​បាន​ផ្ដល់​តួលេខ​លម្អិត​ពី​ប្រភេទ​ទំនិញ លោក កាំង ម៉ូនីកា អគ្គលេខាធិការ​រង​សមាគម​រោងចក្រ​កាត់ដេរ​នៅ​កម្ពុជា (GMAC) បាន​ឲ្យ​ដឹង​ថា ផលិតផល សម្លៀក​បំពាក់ និង​ស្បែក​ជើង​ជា​ផលិតផល​ចម្បង​ដែល​កម្ពុជា​តែង​នាំ​ចេញ​ទៅ​អាមេរិក​។

លោក​បន្ថែម​ថា ការ​ទទួល​បាន​ការ​អនុគ្រោះ​ពន្ធ​ពាណិជ្ជកម្ម​ថ្មី​ដែល​អនុញ្ញាត​ឲ្យ​ទំនិញ​ទាក់ទង​នឹង​ការ​ធ្វើ​ដំណើរ​ផលិត​នៅ​កម្ពុជា​ចូល​ទីផ្សារ​អាមេរិក​ដោយ​មិន​ជាប់​ពន្ធ បាន​ធ្វើ​ឲ្យ​ការ​នាំ​ចេញ​ទំនិញ​ទាំង​នេះ​កើន​ឡើង ហើយ​កំណើន​នេះ​អាច​រួម​ចំណែក​សំខាន់​ដល់​តម្លៃ​នាំ​ចេញ​ទៅ​អាមេរិក​នៅ​ឆ្នាំ​នេះ​។

លោក​ថ្លែង​ថា​៖ «​ដោយ​សារ​យើង​មាន​ការ​រួច​ពន្ធ​ការ​នាំ​ចេញ​ទៅ​អាមេរិក [​ទំនិញ​ទាក់ទង​ការ​ធ្វើ​ដំណើរ​] កត្តា​នេះ​បាន​ជំរុញ​ឲ្យ​មាន​កំណើន​នៃ​ការ​នាំ​ចេញ​ទៅ​អាមេរិក​ទាក់ទង​នឹង​ផលិតផល​សម្រាប់​ការ​ធ្វើ​ដំណើរ​»​។

លោក​បន្ត​ថា កំណើន​នាំ​ចេញ​ទំនិញ​ទាក់ទង​នឹង​ការ​ធ្វើ​ដំណើរ​ពី​កម្ពុជា​ទៅ​អាមេរិក អាច​ជា​ប្រភព​កំណើន​ល្អ​មួយ​សម្រាប់​កម្ពុជា​ដើម្បី​រក្សា​កំណើន​នាំ​ចេញ​ទៅ​អាមេរិក​ស្រប​ពេល​ផលិតផល​នាំ​ចេញ​សម្លៀក​បំពាក់ និង​ស្បែក​ជើង​ទៅ​ទីផ្សារ​អាមេរិក​កំពុង​មាន​ការ​ប្រកួត​ប្រជែង​ខ្លាំង​ជាង​មុន​។

លោក​បញ្ជាក់​ថា​៖ «​ពេល​នេះ​ទឹកប្រាក់​នៃ​ការ​នាំ​ចេញ​ផលិតផល​ធ្វើ​ដំណើរ​ពី កម្ពុជា​អាច​កើន​ដល់​ខ្ទង់​រយ​លាន​ដុល្លារ ភាគ​ច្រើន​នាំ​ចេញ​ទៅ​អាមេរិក​»​។

អាមេរិក​គឺជា​ទីផ្សារ​មួយ​ក្នុង​ចំណោម​ទីផ្សារ​ឈាន​មុខ​គេ​ជា​ច្រើន​របស់​ពិភពលោក​សម្រាប់​ទំនិញ​ធ្វើ​ដំណើរ មាន​តម្លៃ​ដល់​ជាង ១០ ​ពាន់​លាន​ដុល្លារ​កាលពី​ឆ្នាំ​មុន​។

កាល​ពី​មុន​ទំនិញ​ប្រភេទ​នេះ​ប្រឈម​ពន្ធ​នាំ​ចូល​ចន្លោះ​ពី ៤,៥ ទៅ ២០​ភាគរយ អាស្រ័យ​តាម​មុខ​ទំនិញ​ផ្សេងៗ​គ្នា​។

លោកស្រី សឹង សុផារី អ្នក​នាំ​ពាក្យ​ក្រសួង​ពាណិជ្ជកម្ម បាន​ឲ្យ​ដឹង​កាល​ពី​ម្សិលមិញ​ថា តួ​លេខ​នេះ​គឺជា​ដំណើរ​ការ​ដ៏​ល្អ​មួយ ស្រប​ពេល​ការ​នាំ​ចេញ​សម្លៀក​បំពាក់ និង​ស្បែក​ជើង ដែល​ជា​ទំនិញ​នាំ​ចេញ​ដ៏​សំខាន់​របស់​កម្ពុជា​ទៅ​អាមេរិក កំពុង​ប្រឈម​ការ​ប្រកួត​ប្រជែង​ជាមួយ​បណ្ដា​ប្រទេស​ផ្សេង​ទៀត​។

លោក​ស្រី​បាន​ថ្លែង​ថា​៖ «​យើង​ត្រូវ​ការ​ពេល​បន្តិច​សិន​ដើម្បី​អាច​បង្កើន​ការ​នាំ​ចេញ​ផលិតផល​ទាក់ទង​នឹង​ការ​ធ្វើ​ដំណើរ ព្រោះ​ថា​យើង​មិន​អាច​ទាក់ទាញ​ឲ្យ​គេ​ដាក់​ការ​វិនិយោគ​នៅ​យើង​បាន​ភ្លាមៗ​ទេ ដោយ​សារ​យើង​ទើប​តែ​ទទួល​ការ​អនុគ្រោះ​ពន្ធ​ហ្នឹង​»៕ LA

0

Comments

Please, login or register to post a comment