ភ្នំពេញៈ ការផ្គត់ផ្គង់ថាមពលរបស់កម្ពុជាក្នុងឆ្នាំ២០១៧ បានសម្រេចទៅតាមផែនការ ដោយផ្គត់ផ្គង់បាន ៦,៥ពាន់លានគីឡូវ៉ាត់ម៉ោង ស្មើនឹងប្រហែល ៨០ ភាគរយនៃការផ្គត់ផ្គង់សរុប។ នេះបើយោងតាមក្រសួងរ៉ែ និងថាមពលកាលពីម្សិលមិញ។
លោក វិចទ័រ ហ្សូនា អ្នកនាំពាក្យក្រសួងរ៉ែ និងថាមពលបានមានប្រសាសន៍ថា៖ «អ្វីៗកើនឡើងទៅតាមផែនការ។ កំណើននេះទទួលបានយ៉ាងច្រើនពីប្រតិបត្តិការរោងចក្រថាមពលដើរដោយធ្យូងថ្ម និងទំនប់វារីអគ្គិសនី»។
លោកបានថ្លែងថា រោងចក្រផលិតថាមពលធ្បូងថ្មដែលមានអានុភាព ១៣៥ មេហ្គាវ៉ាត់ ដែលបានប្រតិបត្តិការកាលពីឆ្នាំ ២០១៧ បានបន្ថែមដល់សមត្ថភាពដែលមានស្រាប់ ២៧០ មេហ្គាវ៉ាត់នៃស្ថានីយថាមពលរបស់ក្រុមហ៊ុន CIIDG ដែលបានប្រតិបតិ្តការ កាលពីចុងឆ្នាំ ២០១៤។
លោកបានបន្ថែមថា ក្នុងចំណោមប្រភពផ្គង់ផ្គង់សរុប ថាមពល ៣៩,៧៣ ភាគរយបានមកពីការដុតធ្យូងថ្ម ៣៣,៧២ភាគរយបានមកពីវារីអគ្គិសនី ៥,៣៣ ភាគរយ បានមកពីការដុតប្រេង ០,៨០ ភាគរយ បានមកពីថាមពលកកើតឡើងវិញ និង ០,២ ភាគរយទៀតបានមកពីប្រភពផ្ទាល់របស់ឧស្សាហកម្ម និងអ្នកចែកចាយ។
លោក ហ្សូនា បានបន្តថា ដើម្បីបំពេញកង្វះខាត កម្ពុជា បាននាំចូលថាមពលចំនួន ១,៦៥ពាន់លានគីឡូវ៉ាត់ម៉ោងពីប្រទេសថៃ វៀតណាម និងឡាវ ដែលស្មើនឹង ២០ ភាគរយនៃការផ្គត់ផ្គង់សរុប។
កាលពីឆ្នាំ ២០១៧ ស្ថានីយថាមពលចំនួន ២ ក្នុងចំណោម ៨ នៅទំនប់វារីអគ្គិសនីសេសាន បានបើកដំណើរការសាកល្បង កាលពីឆ្នាំ ២០១៧ ហើយប្រតិបត្តិការពេញលេញរបស់ស្ថានីយទាំង៨នេះ នឹងចាប់ផ្ដើមនៅខែតុលា ឆ្នាំនេះ។ ស្ថានីយនីមួយៗមានអានុភាព ៥០មេហ្គាវ៉ាត់។ នៅពេលស្ថានីយទាំងអស់នេះបើកប្រតិបត្តិការពេញលេញ វានឹងជួយបង្កើនថាមពល ១៥ភាគរយផ្សេងទៀតក្នុងឆ្នាំ២០១៨។
លោកថ្លែងថា ដោយសារកិច្ចប្រឹងប្រែងក្នុងឆ្នាំ ២០១៧ អាជ្ញាធរអគ្គិសនីកម្ពុជា( EAC) បានផ្គត់ផ្គង់ថាមពលដល់ ១៤,១៦៨ ភូមិ ស្មើនឹង ៨១ ភាគរយ និង ៣,៣ លានលំនៅឋានស្មើនឹង ៦៨,៥ ភាគរយ។
លោកបានបន្ថែមថា ក្នុងឆ្នាំ ២០១៨ អាជ្ញាធរ EAC គ្រោងបង្កើនការតភ្ជាប់ថាមពលទៅកាន់លំនៅឋានឲ្យបាន ៤ភាគរយបន្ថែមទៀត និង ៥ភាគរយសម្រាប់ភូមិ។
លោកថ្លែងថា៖ «ទិសដៅកំណត់របស់យើងគឺពង្រីកអគ្គិសនីជាតិឲ្យដល់ ២៥ខេត្ត ដើម្បីទទួលបានតម្លៃទាប»។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍ប្រចាំក្រុមហ៊ុន Emerging Markets Consulting បានសម្តែងការសាទរចំពោះកំណើនផ្គត់ផ្គង់នេះ តែលោកបានចង់ឲ្យរដ្ឋាភិបាលលើកកម្ពស់ថាមពលកកើតឡើងវិញជំនួសវិញ។
លោកបានថ្លែងថា ការរីកចម្រើននៃផែនការផ្គត់ផ្គង់ថាមពល គឺជាកំណើនដ៏ល្អ និងជួយកាត់បន្ថយតម្លៃអគ្គិសនីជាជំហានៗ តែវាគ្រាន់តែជាអត្ថប្រយោជន៍រយៈពេលខ្លីប៉ុណ្ណោះសម្រាប់ឧស្សាហកម្ម តែវាមានផលប៉ះពាល់ដល់បរិស្ថានរយៈពេលវែង។
លោកថ្លែងថា៖ «យើងមើលឃើញថា កំណើនការផ្គត់ផ្គង់អគ្គិសនីជួយកាត់បន្ថយតម្លៃ ប៉ុន្តែវាមិនមានស្ថិរភាពនោះទេសម្រាប់ឧស្សាហកម្ម ដោយសារគម្រោងផ្គត់ផ្គង់ថាមពលពឹងផ្អែកលើរោងចក្រដើរដោយធ្យូងថ្ម និងទំនប់វារីអគ្គិសនី ដែលនឹងប៉ះពាល់ដល់បរិស្ថានក្នុងរយៈពេលវែង»។
លោកមានប្រសាសន៍ថា៖ «រដ្ឋាភិបាលគួរតែបារម្ភពីផលប៉ះពាល់នេះ និងលើកកម្ពស់ការវិនិយោគលើថាមពលកកើតឡើងវិញ និងសូឡា ដែលជាថាមពលស្អាតប្រកបដោយស្ថិរភាព»។
តម្លៃអគ្គិសនីសម្រាប់លំនៅឋាននាពេលបច្ចុប្បន្ន ថ្លៃចាប់ពី ៤៨០រៀលដល់ ៧២០រៀលក្នុងមួយគីឡូវ៉ាត់ទៅតាមទំហំប្រើប្រាស់៕ LA