Search form

Login - Register | FOLLOW US ON

Logo of Phnom Penh Post newspaper Phnom Penh Post - កម្មវិធី​ជួញ​ដូរ​អន​ឡាញ ​នឹង​ដំណើរ​ការ​ចុង​ឆ្នាំ​នេះ

Content image - Phnom Penh Post
រដ្ឋ​មន្ត្រី​ក្រសួង​សេដ្ឋកិច្ច​​គោះ​ជួង​​ចាប់​ផ្តើម​ជួញ​ដូរ​ភាគ​ហ៊ុន​​​កំពង់ផែ​ស្វយ័ត​ក្រុង​ព្រះសីហនុ​​កាលពី​ដើម​ខែ​នេះ។ ហេង ជីវ័ន

កម្មវិធី​ជួញ​ដូរ​អន​ឡាញ ​នឹង​ដំណើរ​ការ​ចុង​ឆ្នាំ​នេះ

ភ្នំពេញៈ ការ​ជួញ​ដូរ​តាម​ទូរស័ព្ទ​ចល័ត នឹង​អាច​រក​បាន​ក្នុង​ពេល​ឆាប់ៗ​សម្រាប់​ក្រុម​វិនិយោគិន​ដែល​ស្វែងរក​ការ​ជួញដូរ​មូល​បត្រ​នៅ​ផ្សារ​ហ៊ុន​ក្នុង​ស្រុក​។ នេះ​បើតាម​ផ្សា​រមូល​បត្រ​កម្ពុជា ​(CSX)​។

លោក ហ៊ាន សាហ៊ីប ប្រធាន​ផ្សារ​ហ៊ុន CSX បាន​ឲ្យ​ដឹង​ក្នុង​អំឡុង​ពិធី​ចុះ​បញ្ជី​របស់​កំពង់ផែ​ស្វយ័ត​ក្រុង​ព្រះសីហនុ​កាល​ពី​ថ្ងៃ​ព្រហស្បតិ៍​ សប្តាហ៍​មុន​ថា បច្ចុប្បន្ន​ផ្សារ​ហ៊ុន​កំពុង​ធ្វើ​ការ​ងារ​លើ​ការ​បង្កើត​កម្មវិធី​ជួញ​ដូរ​តាម​អន​ឡាញ​សម្រាប់​ក្រុម​វិនិយោគិន​ដើម្បី​ជួញដូរ​មូល​បត្រ​ក្នុង​ស្រុក​តាម​ទូរស័ព្ទ​ចល័ត​។

លោក​ថ្លែងថា​៖ «​ដើម្បី​ធ្វើ​ឲ្យ​វា​មាន​ភាព​ងាយ​ស្រួល​សម្រាប់​ក្រុម​វិនិយោគិន ក្នុង​ពេល​ឆាប់ៗ​ យើង​នឹង​ដំណើរការ​ការ​ជួញ​ដូរ​មូល​បត្រ​អន​ឡាញ​ដែល​ ហៅថា ប្រព័ន្ធ​ជួញ​ដូរ​ចល័ត (MTS) ដែល​អនុញ្ញាត​ឲ្យ​ក្រុម​វិនិយោគិន​ទាំងអស់​ជួញដូរ​មូល​បត្រ​តាម​រយៈ​ទូរស័ព្ទ​ចល័ត​»​។

លោក ល្មុន សូឡី ប្រធាន​ផ្នែក​ប្រតិបត្តិការ​ទីផ្សារ​នៅ CSX បាន​ឲ្យ​ដឹង​ថា ប្រព័ន្ធ​នេះ​ត្រូវ​បាន​បង្កើត​ឡើង​ដោយ​មាន​ជំនួយ​បច្ចេកទេស​មក​ពី​ ទីភ្នាក់ងារ​សហប្រតិបត្តិ​ការ​អន្តរជាតិ​កូរ៉េ​ (KOICA) ​ហើយ​នឹង​ដាក់​ដំណើរការ​ត្រឹម​ចុង​ឆ្នាំ​នេះ​។

លោក​ថ្លែងថា ផ្សារ​ហ៊ុន​នឹង​សហការ​ជាមួយ​ក្រុមហ៊ុន​មូល​បត្រ​ដែល​មាន​ចំណាប់​អារម្មណ៍​ក្នុង​ការ​ផ្ដល់​ប្រព័ន្ធ​ថ្មី​នេះ​ទៅ​ឲ្យ​អតិថិជន​របស់​ខ្លួន​។ បន្ទាប់​មក ក្រុមហ៊ុន​មូល​បត្រ​នឹង​បង់ថ្លៃ​ជូន​ផ្សារ​ហ៊ុន​សម្រាប់​ការប្រើប្រាស់​សេវា​នេះ ដែល​លោក​អះអាង​ថា មាន​តម្លៃ​កាន់​តែ​ទាប​បើ​ធៀប​នឹង​ការ​អភិវឌ្ឍ​ប្រព័ន្ធ​ជួញដូរ​ផ្ទាល់​របស់​ក្រុមហ៊ុន​ទាំង​នោះ​។

លោក​មាន​ប្រសាសន៍​ថា​៖ «​ដើម្បី​កាត់​បន្ថយ​ការ​ចំណាយ​សម្រាប់​ក្រុមហ៊ុន​មូល​បត្រ​នីមួយៗ និង​សម្រាប់​ផ្សារ​ហ៊ុន ប្រព័ន្ធ MTS របស់​យើង​គឺជា​ប្រព័ន្ធ​មួយ ដែល​ត្រូវ​បាន​ប្រើប្រាស់​ដោយ​ក្រុមហ៊ុន​មូល​បត្រ​ទាំង​អស់​។ មាន​ការ​រំពឹង​ថា ពួកគេ​នឹង​បង់ថ្លៃ​ទៀង​ទាត់​ទាប​ជាង បើ MTS ផ្ទាល់​របស់​ពួក​គេ​នីមួយៗ​ដែល​ពួក​គេ​អភិវឌ្ឍ​ឡើង​»​។

លោក​បាន​បន្ថែម​ថា​៖ «​ប៉ុន្តែ បើ​ក្រុមហ៊ុន​មូល​បត្រ​ណា​មួយ​ចង់​មាន MTS ផ្ទាល់​របស់​ខ្លួន គឺ​ស្រេច​តែ​ពួក​គេ​»​។

លោក​បាន​ពន្យល់​ថា ប្រព័ន្ធ​ជួញ​ដូរ​តាម​អន​ឡាញ​នឹង​អនុញ្ញាត​ឲ្យ​ក្រុម​វិនិយោគិន​ធ្វើ​ការ​បញ្ជា​ទិញ​ការ​ជួញ​ដូរ និង​ទទួល​ទិន្នន័យ​ផ្សារ​ហ៊ុន​ភ្លាមៗ​លើ​ទូរស័ព្ទ​ចល័ត​របស់​ពួក​គេ​។

លោក​ថ្លែងថា​៖ «​វិនិយោគិន​នឹង​មាន​លទ្ធភាព​ចូល​ផ្សារ​ហ៊ុន​បាន​ភ្លាមៗ​តាម​ទូរស័ព្ទ​ស្មាត​ហ្វូន​របស់​ពួក​គេ [​នៅពេល​] ត​ភ្ជាប់​អ៊ីនធឺណិត​»​។

លោក​បន្ត​ថា​៖ «​ក្រុម​វិនិយោគិន​អាច​ទិញ ឬ​លក់​ភាគ​ហ៊ុន​បាន​ភ្លាមៗ ពិនិត្យ​ទិន្នន័យ​ផ្សារ​ហ៊ុន និង​ព័ត៌មាន​ក្រុមហ៊ុន​ចុះ​បញ្ជី​បាន​ភ្លាមៗ ពិនិត្យ​សាច់​ប្រាក់ និង​តុល្យភាព​មូល​ប​ត្រ​របស់​ពួកគេ​និង​ការងារ​ផ្សេង​ទៀត​»​។

យោង​តាម​លោក សូឡី សម្រាប់​ក្រុម​វិនិយោគិន មាន​និន្នាការ​ឆ្ពោះ​ទៅ​រក​ការ​ជួញ​ដូរ​តាម​ទូរស័ព្ទ​ចល័ត​នៅក្នុង​ផ្សារ​ហ៊ុន​ផ្សេងទៀត​។

លោក​បន្ថែមថា កម្មវិធី​អន​ឡាញ​នឹងធ្វើ​ឲ្យ​កំហុស​ជួញដូរ​កាន់តែ​តូច ដែល​បង្កឡើង​ដោយ​ក្រុមហ៊ុន​ឈ្មួញ​ជើងសា​រមូល​ប​ត្រ និង​បង្កើន​ប្រសិទ្ធភាព​នៃ​ដំណើរ​ការ​បញ្ជា​ទិញ​។

លោក​ថ្លែងថា​៖ «​ដំណើរការ​នៃ​ការ​បញ្ជា​ទិញ​នឹង​កាន់​តែ​រហ័ស ហើយ​កាន់​តែមាន​ប្រសិទ្ធភាព​។ ក្រុមហ៊ុន​កម្រៃ​ជើង​សារ​នឹង​ប្រឈម​ហានិភ័យ​កាន់តែ​តិច​ផងដែរ​ទាក់ទង​នឹង​ការដាក់​ការ​បញ្ជា​ទិញ ខណៈ​ដែល​ក្រុម​វិនិយោគិន​នឹង​ដាក់​ការ​បញ្ជា​ទិញ​ដោយ​ខ្លួន​ឯង​»​។

លោក​ស្រី ស៊ីប ឡាយ​ហេង ប្រធាន​ប្រតិបត្តិការ​នៅ SBI Royal Securities បាន​ឲ្យ​ដឹង​ថា ការ​អនុវត្ត​ប្រព័ន្ធ MTS នឹង​អាច​ឲ្យ​ក្រុម​វិនិយោគិន​ធ្វើ​ការ​ជួញដូរ​ងាយ​ស្រួល បើ​ធៀប​នឹង​របៀប​ជួញដូរ​បែប​ប្រពៃណី​។

លោក​ស្រី​ថា​៖«​បច្ចុប្បន្ន​អតិថិជន​យើង​បញ្ជូន​ការ​បញ្ជា​ទិញ ឬ​លក់​តាម​អ៊ីមែល ទូរស័ព្ទ ឬ​នៅ​តាម​បញ្ជរ​។ យើង​ជឿជាក់​ថា ប្រព័ន្ធ MTS នឹង​ផ្ដល់​អត្ថ​ប្រយោជន៍​ដល់​អតិថិជន ទីផ្សារ និង​ក្រុមហ៊ុន​មូល​បត្រ​»៕ LA

0

Comments

Please, login or register to post a comment