Search form

Login - Register | FOLLOW US ON

Logo of Phnom Penh Post newspaper Phnom Penh Post - ការ​ចិញ្ចឹម​ក្រពើ​​ កំពុង​ងាក​ទៅ​រក​ការ​ពង្រីក​ទីផ្សារ

Content image - Phnom Penh Post
កសិដ្ឋាន​ចិញ្ចឹម​ក្រពើ​មួយ​ក្នុង​ខេត្ត​កណ្តាល​។ ហេង ជីវ័ន

ការ​ចិញ្ចឹម​ក្រពើ​​ កំពុង​ងាក​ទៅ​រក​ការ​ពង្រីក​ទីផ្សារ

ភ្នំពេញៈ ឧស្សាហកម្ម​ក្រពើ​របស់​កម្ពុជា​កំពុង​ងាក​ទៅ​រក​ការ​ជួញដូរ​បែប​ពាណិជ្ជកម្ម​ទៅ​ក្នុង​ទីផ្សារ​អន្តរជាតិ​។

ខណៈ​កសិដ្ឋាន​ចិញ្ចឹម​ក្រពើ​ ១៦ ​បន្ថែម​ទៀត​ដែល​បាន​ចុះ​បញ្ជី​ជាមួយ​នឹង​សន្ធិសញ្ញា Cites កំពុង​រង់ចាំ​ការ​អនុម័ត​ជា​ផ្លូវការ​។ នេះ​បើ​យោង​តាម​អនុប្រធាន​នាយកដ្ឋាន​អភិរក្ស​ជលផល​នៅ​ក្រសួង​កសិកម្ម​។

លោក អិន ហ៊ល អនុប្រធាន​នាយកដ្ឋាន​អភិរក្ស​ជលផល​នៅ​ក្រសួង​កសិកម្ម​បាន​ប្រាប់​ភ្នំពេញ​ប៉ុស្តិ៍​ថា​បច្ចុប្បន្ន​កម្ពុជា​មាន​កសិដ្ឋាន​ចិញ្ចឹម​ក្រពើ​ចំនួន​ ៧០០ ​កន្លែង​ទូទាំង​ប្រទេស​ដែល​កសិកដ្ឋាន​ធំៗ​មាន​នៅ​ខេត្ត​សៀមរាប បាត់ដំបង កំពង់ធំ កំពង់ឆ្នាំង បន្ទាយមានជ័យ កណ្តាល និង​ពោធិ៍សាត់​។

លោក​បន្ត​ថា​ភាគច្រើន​អ្នក​ចិញ្ចឹម​ក្រពើ​លក់​ក្រពើ​រស់​ដែល​មាន​តម្លៃ​ពី​ ៥០ ​ដុល្លារ ទៅ ៦០ ​​ដុល្លារ​ក្នុង​ក្រពើ​មួយ​ក្បាល​អាយុ​ចន្លោះ​ពី​ ២ ទៅ​ ៤ ​ឆ្នាំ​។

ការ​លក់​ក្រពើ​រស់​នេះ​ត្រូវ​បាន​អ្នក​នៅ​ក្នុង​ឧស្សាហកម្ម​នេះ​ថា​ជា​ការ​ខាតបង់​សម្រាប់​អ្នកចិញ្ចឹម​ហើយ​ការ​ចុះ​បញ្ជី​ទៅ​ក្នុង​សិទ្ធិសញ្ញា Cites នឹង​ជំរុញ​ឲ្យ​អ្នក​ចិញ្ចឹម​ក្រពើ​ងាយ​មក​ធ្វើ​ពាណិជ្ជកម្ម​ស្បែក​ក្រពើ​វិញ​ដែល​នឹង​ឲ្យ​ពួកគេ​មាន​លទ្ធភាព​នាំ​ចេញ​ស្បែក​ក្រពើ​កាន់​តែ​ទូលំទូលាយ​ទៅ​ផ្សារ​អន្តរជាតិ​ដោយ​ស្រប​ច្បាប់​។

លោក អិន ហ៊ល ថ្លែង​ថា​៖ «​ការ​ចុះ​បញ្ជី​នៅ Cites មាន​សារៈសំខាន់​សម្រាប់​ធ្វើ​ឲ្យ​ទីផ្សារ​មាន​ស្ថិរភាព ហើយ​កសិករ​អាច​ទទួល​បាន​ការ​បន្ថែម​តម្លៃ​លើ​ការ​ជួញដូរ​ស្បែក​ក្រពើ​ក្នុង​ពាណិជ្ជកម្ម​អន្តរជាតិ​»​។

លោក​បន្ត​ថា​សម្រាប់​កសិដ្ឋាន​ក្រពើ​ទាំង​ ១៦ រំពឹង​ថា​នឹង​ទទួល​បាន​ការ​យល់​ព្រម​ឆាប់ៗ​នេះ ខណៈ​ឯកសារ​ដែល​បាន​ដាក់​ឆ្លើយតប​តាម​តម្រូវការ​ភាគច្រើន​។ តាម​លោក អិន ហ៊ល មាន​កសិដ្ឋាន​ក្រពើ​ចំនួន​ ៥ ត្រូវ​បាន​ទទួល​ស្គាល់​ដោយ Cites រួច​ហើយ​កាលពី​ឆ្នាំ​ ១៩៩៩​។ លោក​បញ្ជាក់​ថា​៖ «​ពេល​នេះ​យើង​ចង់​ពង្រីក​ទីផ្សារ​ដើម្បី​ស្រោចស្រង់ និង​ឆ្លើយតប​នឹង​កំណើន​ការ​ចិញ្ចឹម​ក្រពើ​» ​។

CITES ឬ អនុសញ្ញា​ស្ដីពី​ពាណិជ្ជកម្ម​អន្តរជាតិ​នៅ​ក្នុង​ពូជ​សត្វ​ជិត​ផុត​ពូជ​នៃ Wild Fauna និង Flora គឺជា​សន្ធិសញ្ញា​ពហុភាគី​ដើម្បី​ការពារ​រុក្ខជាតិ និង​សត្វ​ជិត​ផុត​ពូជ​។ វា​មាន​បំណង​ធានា​ឲ្យ​ប្រាកដ​ថា​ពាណិជ្ជកម្ម​អន្តរជាតិ​ក្នុង​គំរូ​សត្វព្រៃ និង​ រុក្ខជាតិ​មិន​គំរាម​កំហែង​ដល់​ការ​រស់នៅ​របស់​ពូជ​សត្វ​ជាច្រើន​នៅក្នុង​ព្រៃ​ហើយ​សន្ធិសញ្ញា​នេះ​ស្រប​តាម​កម្រិត​ផ្សេងៗ​នៃ​ការ​ការពារ​ដល់​ពូជ​សត្វ និង​រុក្ខជាតិ​ជាង ៣៥ ០០០ ប្រភេទ​។

លោក លី ហ្វេន កសិករ​ចិញ្ចឹម​ក្រពើ​នៅ​សង្កាត់​ក្របី​រៀល ស្រុក​សៀមរាប ខេត្ត​សៀមរាប​ដែល​ស្ថិត​ក្នុង​ចំណោម​កសិដ្ឋាន​ទាំង​ ១៦ ​នោះ​ឲ្យ​ដឹង​ថា​លោក​បាន​ចំណាយពេល​ ៣ ​​ឆ្នាំ​ក្នុង​ការ​ចុះ​ឈ្មោះ​កសិដ្ឋាន​លោក​ទៅ​ក្នុង​សន្ធិសញ្ញា Cites នេះ​។

លោក​ថ្លែង​ថា​៖ «​ខ្ញុំ​សង្ឃឹម​ថា​រដ្ឋាភិបាល​នឹង​ជួយ​ដើម្បី​ទទួល​ឲ្យ​ទទួល​ស្គាល់​ពី Cites ក្នុង​ពេល​ឆាប់ៗ​។ បើ​យើង​ទទួល​ការ​យល់ព្រម​ពី Cites យើង​នឹង​អាច​នាំ​ចេញ​ក្រពើ​របស់​យើង​ទៅ​ទីផ្សារ​អន្តរជាតិ​ជាជាង​ការ​ពឹង​ផ្អែក​លើ​ប្រទេស​ជិត​ខាង​»​។

លោក​បន្ត​ថា​៖ «​បើ​គ្មាន Cites ក្រពើ​របស់​យើង​នឹង​មិន​ត្រូវ​បាន​ទទួល​ស្គាល់​ពី​កសិដ្ឋាន​នោះ​ទេ ដែល​មាន​ន័យ​ថា​យើង​ប្រមាញ់​ពី​ព្រៃ ឬ​គេ​សន្មត​ថា​ជា​ផលិតផល​រត់ពន្ធ​។ ការ​បញ្ជាក់​របស់ Cites នឹង​ធ្វើឲ្យ​ទីផ្សារ​របស់​យើង​មាន​ស្ថិរភាព​ដែល​បន្ថែម​តម្លៃ​ដល់​ការ​លក់​ក្រពើ​របស់​យើង​»​។

លោក លី ហ្វេន ដែល​ចិញ្ចឹម​ក្រពើ​អស់​រយៈពេល​ ១០ ​ឆ្នាំ​មក​ហើយ​ឲ្យ​ដឹង​ថា​តម្លៃ​កូន​ក្រពើ​ធ្លាក់​ចុះ​ពី​ចន្លោះ​ ២០ ​ដុល្លារ​ទៅ​ ២៧ ​ដុល្លារ​កាលពី​​ឆ្នាំ​ ២០១៤ មក​នៅ​ន្លោះ​ពី​ ៨ ​ដុល្លារ​ទៅ​ ៩ ​ដុល្លារ​ក្នុង​ ១ ​ក្បាល​ដែល​លក់​ទៅ​ទីផ្សារ​វៀតណាម និង​ថៃ​។

លោក​បាន​ថ្លែង​ថា​៖ «​នៅ​ពេល​ក្រពើ​មាន​តម្លៃ​ទាប​ខ្លាំង​ណាស់ យើង​ជា​កសិករ​មិន​អាច​រក​ប្រាក់​ចំណេញ​បាន​ទៀត​ទេ​»​។

បច្ចុប្បន្ន​លោក លី ហ្វេន មាន​ក្រពើ​ប្រហែល​ ៣០០០ ​ក្បាល​ដែល​អាច​ប្រមូល​កូន​ក្រពើ​បាន ៨ ០០០ ​ក្បាល និង​លក់​បាន ៤ ៥០០ ​ក្បាល​នៅ​ឆ្នាំ​នេះ​។

លោក ណៅ ធួក អនុរដ្ឋលេខាធិការ​ក្រសួង​កសិកម្ម រុក្ខាប្រមាញ់ និង​នេសាទ បាន​ឲ្យ​ដឹង​ថា​ទីផ្សារ​ក្រពើ​កំពុង​ប្រឈម​ដោយសារ​កសិករ​ធ្វើ​អាជីវកម្ម​កូន​ក្រពើ​ជាង​ការ​លក់​ស្បែក​ដែល​ធ្វើឲ្យ​ពួកគេ​ទទួល​បាន​ប្រាក់​ចំណេញ​កាន់តែ​តិច និង​ខ្វះ​តម្រូវការ​ទីផ្សារ​។

លោក​ថ្លែង​ថា​៖ «​ទីផ្សារ​ក្រពើ​ជា​ទីផ្សារ​ធំ​ដែល​ចំណេញ​ប្រាក់​រាប់លាន​ដែល​ពឹង​លើ​ការ​លក់​ស្បែក ផ្ទុយ​ទៅ​វិញ​កសិករ​យើង​ចង់​លក់​កូន​ក្រពើ​រស់​ដែល​វា​ធ្វើឲ្យ​ពួកគេ​ទទួល​បាន​ប្រាក់​ចំណេញ​កាន់តែ​តិច និង​ខ្វះ​ទីផ្សារ​»​។

លោក​បន្ថែម​ថា​ការ​សិក្សា​បង្ហាញ​ថា​កសិករ​ខាត​បង់​ ១០០ ​ដុល្លារ​ក្នុង​ក្រពើ​មួយ​ក្បាល​ពី​ការ​លក់​ក្រពើ​រស់​បើ​ធៀប​នឹង​ការ​លក់​ស្បែក​។

លោក​បន្ត​ថា​ស្បែក​ក្រពើ​កម្ពុជា​ជាប់​ចំណាត់ថ្នាក់​គុណភាព​លេខ​ ២ ដែល​មាន​តម្លៃ​ជា​មធ្យម​ ២២៥ ​​ដុល្លារ​សម្រាប់​ស្បែក​ក្រពើ​មួយ​ក្បាល​។

យោង​តាម​លោក ណៅ ធួក ឧស្សាហកម្ម​ក្រពើ​កម្ពុជា​មាន​ប្រហែល ២០ ០០០ ​ក្បាល​ដែល​អាច​បង្កើត​កូន​បាន​ ៣០០ ០០០ ក្បាល​ក្នុង​មួយ​ឆ្នាំ​។ លោក​ថ្លែង​ថា​ តម្លៃ​កូន​ក្រពើ​កាលពី​ដើម​រដូវ ​១៧ ​ដុល្លារ ហើយ​នៅ​ពេល​នេះ​បាន​ធ្លាក់​ចុះ​ក្រោម​ ១០ ​ដុល្លារ​។

លោក​ថ្លែង​ថា​៖ «​តាម​បទពិសោធ​របស់​ខ្ញុំ​ក្នុង​វិស័យ​នេះ​ខ្ញុំ​បាន​ព្យាយាម​ជំរុញ​ឲ្យ​កសិករ​លក់​ស្បែក ប៉ុន្តែ​ពួកគេ​បាន​អះអាង​ការ​ខ្វះខាត​ថវិកា បញ្ហា​ប្រឈម​គឺ​ថា​នៅ​ពេល​នេះ​កសិករ​មិន​បាន​គ្រប់គ្រង​ល្អ​លើ​ការ​ផលិត​របស់​ពួកគេ​នោះ​ទេ​»​។

លោក​បន្ថែម​ថា ​ពេល​កសិករ​ងាក​ទៅ​រក​ការ​លក់​ស្បែក​ប្រាក់​ចំណេញ​របស់​ពួកគេ​នឹង​កើន​ឡើង​ដោយសារ​ទីផ្សារ​ស្បែក​ក្រពើ​គឺ​ធំ ហើយ​វា​នឹង​ជួយ​កាត់​បន្ថយ​កម្មករ​ចំណាក​ស្រុក និង​ផ្ដល់​ការងារ​ច្រើន​ផង​ដែរ​៕ LA

0

Comments

Please, login or register to post a comment