Search form

Login - Register | FOLLOW US ON

Logo of Phnom Penh Post newspaper Phnom Penh Post - ការ​ជំរុញ​អាមេរិក​​ ឲ្យ​ដាក់​បញ្ចូល​ស្បែកជើង​ផលិត​នៅ​កម្ពុជា ​ទៅ​ក្នុង​ GSP​ ទំនង​ជា​ពិបាក

Content image - Phnom Penh Post
ស្បែកជើងម៉ាកណៃ និងម៉ាកផ្សេងទៀតដែលដាក់លក់នៅក្នុងហាងមួយនៅភ្នំពេញកន្លងមក។ ផា លីណា

ការ​ជំរុញ​អាមេរិក​​ ឲ្យ​ដាក់​បញ្ចូល​ស្បែកជើង​ផលិត​នៅ​កម្ពុជា ​ទៅ​ក្នុង​ GSP​ ទំនង​ជា​ពិបាក

ភ្នំពេញៈ ទោះបី​កម្ពុជា​ប្រឹងប្រែង​ជំរុញ​អាមេរិក​ឲ្យ​ដាក់​បញ្ចូល​ទំនិញ​ស្បែកជើង​របស់​ខ្លួន​ទៅ​ក្នុង​គម្រោង​ប្រព័ន្ធ​អនុគ្រោះ​ពន្ធ (GSP) ក៏​វា​ទំនង​ជា​មិន​អាច​កើតឡើង​នោះ​ទេ ដែល​ដៃគូ​ពាណិជ្ជកម្ម​ឈាន​មុខ​គេ​តែ​មួយ​គត់​របស់​កម្ពុជា​មួយ​នេះ​នឹង​ផ្ដល់​សច្ចាប័ន​លើ​កិច្ចព្រមព្រៀង​នេះ ខណៈ​ច្បាប់​ថ្មី​ដែល​បាន​ដាក់​ចេញ​ដោយ​សភា​អាមេរិក​នៅ​មិន​ទាន់​ត្រូវ​បាន​លើក​មក​ពិភាក្សា​នៅ​ឡើយ​ទេ ហើយ​បើវា​មិន​ត្រូវ​បាន​អនុម័ត​នៅ​ឆ្នាំ​នេះ ច្បាប់​នេះ​នឹង​ត្រូវ​ទម្លាក់​ចោល​នៅ​ចុង​ឆ្នាំ​នេះ​។

អ្នក​ជំនាញ​និយាយ​ថា​ទោះបី​ច្បាប់​នេះ​ត្រូវ​បាន​អនុម័ត​ក៏​ទំនង​ជា​លំបាក​សម្រាប់​កម្ពុជា​ដែរ ខណៈ​ប្រទេស​ក្រីក្រ​មួយ​នេះ​កំពុង​វាយប្រហារ​អាមេរិក​។

ច្បាប់​ស្តីពី​ប្រព័ន្ធ​អនុគ្រោះ​ពន្ធ​នាំ​ចូល​ផលិតផល​ស្បែកជើង​ឆ្នាំ​ ២០១៧ របស់​អាមេរិក​ដែល​ត្រូវ​បាន​ដាក់​ទៅ​សភា​អាមេរិក​កាលពី​ខែ​ឧសភា​ហើយ​ត្រូវ​បាន​គាំទ្រ​ដោយ​សមាជិក​គណបក្ស​ប្រជាធិបតេយ្យ​ ៣ ​រូប និង​សមាជិក​គណបក្ស​សាធារណរដ្ឋ ២ ​រូប បំណង​ក្នុង​ការ​បន្ត​កម្មវិធី GSP ប្រចាំ​ឆ្នាំ​ដោយ​ដាក់​បញ្ចូល​ទំនិញ​ស្បែកជើង​ជា​លើក​ដំបូង​ចាប់​តាំងពី​ការ​ចាប់ផ្ដើម​ផែនការ GSP នេះ​កាលពី​ឆ្នាំ​ ១៩៧៦​។

ប្រសិន​ច្បាប់​នេះ​បើ​ត្រូវ​បាន​អនុម័ត​នឹង​បើក​ចំហ​សម្រាប់​ផលិតផល​ស្បែកជើង​មួយ​ចំនួន​ត្រូវ​បាន​លើកលែង​ពន្ធ​នាំ​ចូល​ស្ថិត​ក្រោម​មាត្រា​ជាក់លាក់​តាម​បច្ចេកទេស​ផ្សេង​គ្នា​ ១៧ ​ជាមួយ​បំណង​ក្នុង​ការ​ផ្ដល់​អត្ថប្រយោជន៍​ដល់​ដៃគូ​ពាណិជ្ជកម្ម​ទាំងអស់​ដែល​ស្ថិត​ក្នុង​ប្រទេស​អភិវឌ្ឍន៍​តិចតួច​បំផុត​ (LDC)​។ ប៉ុន្តែ​ច្បាប់​នេះ​មិន​បាន​ទទួល​ការ​តាមដាន​ណា​មួយ​ទេ​មក​ដល់​នឹង​ពេល​នេះ​។

បើ​ទោះបី​យ៉ាង​នេះ​ក្តី​លោក កាំង ម៉ូនីកា អគ្គលេខាធិការរង​សមាគម​រោងចក្រ​កាត់ដេរ​នៅ​កម្ពុជា (GMAC) បាន​ឲ្យ​ដឹង​ថា​ស្ថាប័ន​ក្នុង​ឧស្សាហកម្ម​មួយ​នេះ​កំពុង​ធ្វើ​ការងារ​យ៉ាង​សកម្ម​ជាមួយ​ក្រសួង​ពាណិជ្ជកម្ម​ក្នុង​ការ​ដាក់​ញតិ្ត​ទៅ​អាមេរិក​នៅ​ខែ​តុលា​។ លោក​ថ្លែង​ថា​៖ «[​ញត្តិ​] នេះ​គឺ​នៅ​តែ​ដំណើរការ​ទៅ​មុខ​ ប៉ុន្តែ​រួម​ជាមួយ​ក្រសួង​ពាណិជ្ជកម្ម យើង​នឹង​មាន​ដាក់​ញត្តិ​នេះ​នៅ​ខែ​តុលា​»​។

លោក​បាន​បន្ត​ថា​៖ «​ប្រសិន​បើ​អាមេរិក​អនុម័ត​ច្បាប់​នេះ​វា​នឹង​បើក​ចំហ​ទីផ្សារ​ថ្មី​ទាំង​មូល​»​។

លោក​បន្ថែម​ថា​ខណៈ​ឧស្សាហកម្ម​កាត់ដេរ​របស់​កម្ពុជា​ទាំង​មូល​មាន​តម្លៃ​ ៦ ​ពាន់​លាន​ដុល្លារ ផលិតផល​ស្បែកជើង​មាន​តែ​ ៧០០ ​លាន​ដុល្លារ​ប៉ុណ្ណោះ ដែល​ភាគច្រើន​នាំ​ចេញ​ទៅ​សហភាព​អឺរ៉ុប និង​ទីផ្សារ​ជប៉ុន​។

លោក​ថ្លែង​ថា​៖ «​វា​ជា​ការពិត​ថា​បច្ចុប្បន្ន​យើង​មិន​បាន​ផលិត​ស្បែកជើង​ក្នុង​ចំនួន​ច្រើន​ដែល​អាច​ឆ្លើយ​តប​បាន​តាម​ច្បាប់​នៃ​តម្រូវការ​ផែនការ GSP នោះ​ទេ ប៉ុន្តែ​បើ​អាមេរិក​ធ្វើ​ច្បាប់​នេះ​ក្លាយ​ជា​ច្បាប់​ថ្មី យើង​នឹង​រំពឹង​ថា​កំណើន​ដ៏ធំ​នៅ​ក្នុង​ឧស្សាហកម្ម​នេះ​ជាមួយ​នឹង​ក្រុម​វិនិយោគិន​ថ្មីៗ និង​ការ​បញ្ជា​ទិញ​នឹង​ចូល​មក​»​។ បច្ចុប្បន្ន​កម្ពុជា​មាន​រោងចក្រ​ផលិត​ស្បែកជើង​ឈាន​មុខ​គេ​ចំនួន​ ៥៩ ​។

លោកស្រី សឹង សុផារី អ្នក​នាំពាក្យ​ក្រសួង​ពាណិជ្ជកម្ម​បាន​ឲ្យ​ដឹង​ថា​បើ​អាមេរិក​បញ្ចូល​ស្បែកជើង​នៅ​ក្នុង​ផែនការ GSP វា​នឹង​មាន​អត្ថប្រយោជន៍​សេដ្ឋកិច្ច​ដ៏ធំ​សម្រាប់​កម្ពុជា​។

លោកស្រី​ថ្លែង​តាម​អ៊ីមែល​ថា​៖ «​ប្រសិន​បើ​ផែនការ GSP ស្បែកជើង​ត្រូវ​បាន​ផ្ដល់​កម្ពុជា​អាច​មាន​ការ​ទាក់ទាញ​កាន់តែ​ខ្លាំង​ដល់​ក្រុម​វិនិយោគិន​ដែល​មាន​ចំណាប់​អារម្មណ៍​នៅ​ក្នុង​វិស័យ​ផលិត​មួយ​នេះ ហើយ​អាច​រក្សា​បាន​នូវ​រោងចក្រ​មាន​ស្រាប់​របស់​យើង​ដែល​ផលិត​ផលិតផល​ស្បែកជើង​ដែល​ទីបញ្ចប់​នឹង​ពង្រឹង​សមត្ថភាព​នាំ​ចេញ​របស់​យើង ហើយ​ផ្ដល់​អត្ថប្រយោជន៍​ដល់​កម្មករ​ដែល​មាន​ស្រាប់ និង​ពង្រីក​ឱកាស​ការងារ​ដើម្បី​ស្រូប​យក​កម្លាំង​ពលកម្ម​កាន់តែ​ច្រើន​»​។

ទីផ្សារ​សម្រាប់​នាំ​ចូល​ស្បែក​ជើង​របស់​អាមេរិក​មាន​តម្លៃ​ ១២៣ ​ពាន់​លាន​ដុល្លារ​កាលពី​ឆ្នាំ​មុន​។ នេះ​បើ​យោង​តាម​ស្ថិតិ​ពាណិជ្ជកម្ម​អាមេរិក​។

តាម​ទិន្នន័យ​គយ​កម្ពុជា​ដែល​បាន​ផ្ដល់​ដោយ​ក្រសួង​ពាណិជ្ជកម្ម ការ​នាំ​ចេញ​ស្បែកជើង​របស់​កម្ពុជា​ទៅ​អាមេរិក​បាន​កើនឡើង​ជា​ប្រចាំ​ពី​ ៦៩ លាន​ដុល្លារ​កាលពី​ឆ្នាំ​ ២០១៤ ដល់​ ១២៧ ​លាន​ដុល្លារ​ពី​ឆ្នាំ​មុន​។

ខណៈ​លោក ស្រី សឹង សុផារី បាន​ទទួល​ស្គាល់​ថា​ប្រទេស​កម្ពុជា​មិន​មាន​អំណាច​បញ្ចុះបញ្ចូល​ខ្លាំង​ទេ​ដល់​ការ​សម្រេច​ចិត្ត​របស់​ទីក្រុង​វ៉ាស៊ីនតោន​លើ​ការ​អនុម័ត​ច្បាប់​ដែល​នឹង​ផុត​កំណត់​ត្រឹម​ចុង​ឆ្នាំ​នេះ​នោះ​។

លោក Miguel Chanco អ្នក​វិភាគ​អាស៊ាន​ជាន់​ខ្ពស់​នៅ​ក្រុមហ៊ុន Economist Intelligence Unit បាន​ឲ្យ​ដឹង​ថា​វា​គឺជា​ពាក្យ​ធំ​គឺ «​ប្រសិន​បើ​» ដែល​ច្បាប់​នេះ​នឹង​ត្រូវ​បាន​អនុម័ត ហើយ​ទោះបី​ជា​វា​ត្រូវ​បាន​អនុម័ត​ក៏ដោយ​លោក​បាន​ចោទ​សួរ​ថា តើ​កម្ពុជា​នឹង​ត្រូវ​បាន​ដាក់​បញ្ចូល​ឬ​ទេ​ដោយសារ​វោហារស័ព្ទ​ប្រឆាំង​អាមេរិក​ដ៏ចម្រូង​ចម្រាស​ដែល​ធ្វើ​ឡើង​ដោយ​គណបក្ស​កំពុង​កាន់​អំណាច និង​ការ​ធ្វើឲ្យ​ខូច​ផ្នែក​នយោបាយ​របស់​ប្រទេស​កម្ពុជា​។

លោក​ថ្លែង​តាម​អ៊ីមែល​ថា​៖ «​ការ​ធ្វើឲ្យ​ខូច​លទ្ធិប្រជាធិបតេយ្យ​របស់​កម្ពុជា​ក្នុង​រយៈពេល​ពីរ​បី​ខែ​កន្លង​មក​នេះ​នឹង​ធ្វើឲ្យ​ប្រទេស​នេះ​កាន់​តែ​ពិបាក​ក្នុង​ការ​បញ្ចុះបញ្ចូល​តំណាងរាស្ដ្រ​អាមេរិក​ឲ្យ​ផ្ដល់​ដល់​ប្រទេស​នេះ​នូវ​លទ្ធភាព​ចូល​​ទីផ្សារ​កាន់​តែ​ជ្រៅ​នៅ​ពេល​ជិត​ផុត​អាណត្តិ​នេះ​»​។

សេចក្តី​ថ្លែងការណ៍​របស់​ឯកអគុ្គរដ្ឋទូត​អាមេរិក William A. Heidt កាលពី​ថ្ងៃ​ម្សិលមិញ​បាន​ក្រើន​រំឭក​កម្ពុជា​ពី​អត្ថប្រយោជន៍​ជាច្រើន​ដែល​កម្ពុជា​ទទួល​បាន​ពី​អាមេរិក បន្ទាប់ពី​រដ្ឋាភិបាល​កម្ពុជា​បន្ត​ចោទ​អាមេរិក​ថា​ជា​អ្នក​នៅ​ពីក្រោយ​ការ​ប៉ុនប៉ង​ផ្តួល​រំលំ​រដ្ឋាភិបាល​របស់​បក្ស​ប្រឆាំង​ បន្ទាប់ពី​មាន​ការ​ចាប់​ខ្លួន​មេបក្ស​ប្រឆាំង​នោះ​។

លោក William A. Heidt ថ្លែង​ថា​៖ «​មួយ​ជំហាន​ម្តងៗ​ព្រឹត្តិការណ៍​ទាំង​នេះ​កំពុង​តែ​ធ្វើឲ្យ​កម្ពុជា ឯកោ​ពី​សហគមន៍​អន្តរជាតិ​ក្នុង​ពេល​ដែល​កម្ពុជា​ត្រូវការ​ជំនួយ​គាំទ្រ​អន្តរជាតិ​ដើម្បី​លើក​កម្ពស់​សេដ្ឋកិច្ច​របស់​ខ្លួន​ប្រកួត​ប្រជែង​ជាមួយ​ប្រទេស​ជិត​ខាង​នៅ​អាស៊ាន​»​។

លោក​ថ្លែង​ថា​សម្តី​ប្រឆាំង​អាមេរិក​បាន​ធ្វើឲ្យ​ជនជាតិ​អាមេរិក និង​អ្នក​ទេសចរ​លោក​ខាង​លិច​ជាច្រើន​មាន​អារម្មណ៍​លែង​កក់ក្តៅ​ជាង​មុន​ពេល​ធ្វើ​ដំណើរ​មក​កម្ពុជា​នាពេល​បច្ចុប្បន្ន​។ ឆ្នាំ​នេះ​អ្នក​ទេសចរ​ទាំង​នោះ​អាច​ទៅ​ចាយ​លុយ​នៅ​ហាឡុងបេយ៍ ឬ​នៅ​ភូកេត​ជា​ជាង​នៅ​អង្គរវត្ត​។

លោក​បន្ត​ថា​៖ «​នាពេល​បច្ចុប្បន្ន​ក្រុមហ៊ុន​អាមេរិក និង​លោក​ខាង​លិច​ក៏​មាន​អារម្មណ៍​លែង​កក់ក្តៅ​ជាង​មុន​ផង​ដែរ ហើយ​ក្រុមហ៊ុន​កាន់តែ​តិច​ថែម​ទៀត​នឹង​មក​វិនិយោគ​នៅ​កម្ពុជា​៕LA

0

Comments

Please, login or register to post a comment