.jpg)
បុគ្គលិកថៃ-អ៊ិស្លាមកំពុងលក់គ្រឿងអលង្ការជូនអតិថិជន៕ រូប AFP
ក្រុងបាងកកៈ ការនាំចេញត្បូងមានតម្លៃ និងគ្រឿងអលង្ការរបស់ថៃអាចនឹងស្ទុះងើបឡើងវិញ ដោយសម្រេចបានកំណើនចន្លោះពី ២ ទៅ ៣ ភាគរយក្នុងឆ្នាំនេះ ដោយសារភាពរឹងមាំនៃការស្ទុះងើបឡើងវិញនៃសេដ្ឋកិច្ចសកល និង ការរចនាម៉ូដគ្រឿងអលង្ការល្អខុសគេរបស់ថៃ។
ដោយបានធ្វើជាអធិបតីភាពក្នុងពិធីពិព័រណ៍ត្បូងមានតម្លៃ និងគ្រឿងអលង្ការលើកទី ៦១ នាទីក្រុងបាងកកលោក Sontirat Sontijirawong រដ្ឋមន្ត្រីក្រសួងពាណិជ្ជកម្មថៃបានឲ្យដឹងថាក្រសួងរំពឹងថា ការនាំចេញត្បូងមានតម្លៃ និងគ្រឿងអលង្ការ (ដោយមិនរាប់បញ្ចូលមាស) អាចនឹងកើនឡើងនៅចន្លោះ ២ ទៅ ៣ ភាគរយ ដល់ ៧,៤ ពាន់លានដុល្លារអាមេរិក (២៣៣ ពាន់លានបាត) បន្ទាប់ពីកើនឡើង ២,២ ភាគរយដល់ ៧,១២ ពាន់លានដុល្លារនៅឆ្នាំ ២០១៧។
តួលេខឆ្នាំ ២០១៧ បង្ហាញពីកំណើនលើកដំបូងក្នុងរយៈពេល ៣ ឆ្នាំ។ តែការនាំចេញត្បូងមានតម្លៃ និងគ្រឿងអលង្ការសរុបរបស់ប្រទេសនេះរួមទាំងការនាំចេញមាសផងដែរនោះបានធ្លាក់ចុះ ៩,៩ ភាគរយនៅឆ្នាំ ២០១៧ មកនៅត្រឹម ១២,៨ ពាន់លានដុល្លារ។
ពិធីពិព័រណ៍នេះបានរៀបចំឡើងពីថ្ងៃទី ២១ ដល់ថ្ងៃទី ២៥ ខែកុម្ភៈនេះក្រោមប្រធានបទ «បេតិកភណ្ឌ និងសិប្បកម្ម»។
ពិធីពិព័រណ៍នេះនឹងឆ្លុះបញ្ចាំងពីបេតិកភណ្ឌវប្បធម៌របស់ប្រទេសថៃតាមរយៈគ្រឿងអលង្ការដែលត្រូវបានរចនាម៉ូដយ៉ាងល្អឯក ដែលគួបផ្សំនឹងការរចនាម៉ូដបែបថៃតាមតម្រូវការរបស់អតិថិជនអន្តរជាតិ។
ពិព័រណ៍នេះផ្តល់នូវកាលានុវត្តភាពដល់សិក្ខាកាមដើម្បីជួបជាមួយនឹងក្រុមហ៊ុនផលិតគ្រឿងអលង្ការ ក្រុមហ៊ុនចែកចាយ និងក្រុមហ៊ុននាំចេញគ្រឿងអលង្ការធំៗរបស់ថៃ និងមកពីប្រទេសផ្សេងទៀតជាង ៩០០ ដែលនឹងចូលរួមពិធីពិព័រណ៍នេះនៅតាមស្តង់ចំនួនជាង ២ ២០០កន្លែង។
ក្រុមហ៊ុនចូលរួមក្នុងពិធីពិព័រណ៍នេះនឹងមកពីសហរដ្ឋអាមេរិក ចិន ជប៉ុន ហុងកុង ឥណ្ឌា ស្រីលង្កា និងមកពីបណ្តាប្រទេសផ្សេងទៀតក្នុងតំបន់អាស៊ាន។
ក្រសួងពាណិជ្ជកម្មថៃរំពឹងថា ពិធីពិព័រណ៍គ្រឿងអលង្ការលើកនេះនឹងនាំមកនូវការលក់ជាង ២ ពាន់លានបាត និងមានអតិថិជន និងសិក្ខាកាមអន្តរជាតិចូលរួមជាង ២ ម៉ឺននាក់។
លោក Sontirat បានមានប្រសាសន៍ថា បើទោះជាមានក្តីបារម្ភជាបន្តចំពោះប្រាក់បាតដែលមានតម្លៃខ្ពស់ក្តី ក៏ប្រទេសថៃនៅតែជាប្រទេសនាំមុខមួយក្នុងការផលិតត្បូងមានតម្លៃ និងគ្រឿងអលង្ការ ដោយសារការរចនាម៉ូដស្អាត និងប្លែកៗរបស់ប្រទេសនេះ និងតម្រូវការគ្រឿងអលង្ការកាន់តែខ្ពស់ ដោយសារការស្ទុះងើបឡើងវិញនៃសេដ្ឋកិច្ចសកល។
ប្រទេសថៃមានសហគ្រាស ១៥៧៧៧ ក្នុងវិស័យត្បូង និងគ្រឿងអលង្ការនេះ ៩០ ភាគរយគឺជាសហគ្រាសខ្នាតតូច និងមធ្យម៕ BP
