.jpg)
កម្មករកំពុងលីបាវអង្ករនៅក្នុងឃ្លាំងរបស់ក្រុមហ៊ុន Khmer Food។ ហេង ជីវ័ន
ភ្នំពេញៈ រដ្ឋាភិបាលកម្ពុជាតាមរយៈធនាគារអភិវឌ្ឍន៍ជនបទ (RDB) បានផ្ដល់កម្ចី ៣០ លានដុល្លារដល់រោងម៉ាស៊ីនកិនស្រូវចាប់តាំងពីខែកញ្ញាមក ដើម្បីជួយសម្រួលដល់ការទិញស្រូវ ដោយប្រធានធនាគាររដ្ឋមួយនេះបានថ្លែងថា ចំនួនទឹកប្រាក់អាចនឹងត្រូវចាក់បញ្ចូលបន្ថែមទៀតប្រសិនបើចាំបាច់។
កម្ចីនេះត្រូវបានផ្ដល់ដល់រោងម៉ាស៊ីនកិនស្រូវចំនួន ៣៨ ដោយធនាគារអភិវឌ្ឍន៍របស់រដ្ឋមួយ បន្ទាប់ពីការប្រមូលផលស្រូវ កាលពីខែកញ្ញា ហើយនឹងចាំបាច់ត្រូវសងវិញត្រឹមខែមេសាឆ្នាំនេះ។ នេះបើយោងតាម លោក កៅ ថាច អគ្គនាយក RDB។
លោក កៅ ថាច មានប្រសាសន៍ថា៖ «តម្រូវការកម្ចីបន្តកើនឡើង ប៉ុន្តែវានៅតែមិនបានឆ្លើយតបនឹងអ្វីដែលរដ្ឋាភិបាលបានផ្ដល់»។
លោកបន្តថា៖ «យើងនៅតែសង្ឃឹមថា តម្រូវការកម្ចីនឹងកើនឡើងនៅរដូវប្រមូលផលឆ្នាំក្រោយ ដោយសារតែសមត្ថភាពនៃការស្ដុក និងការសម្ងួតនឹងរួចរាល់»។
នៅក្នុងរយៈពេល ២ ឆ្នាំកន្លងមក RDB បានផ្ដោតលើការបង្កើនសមត្ថភាពស្ដុក និងសម្ងួតរបស់រោងម៉ាស៊ីនកិនស្រូវ ដើម្បីកែលម្អការកែច្នៃ និងជំរុញឲ្យមានបង្កើនការទិញស្រូវ ដែលអាចបង្កើនតម្លៃស្រូវ និងជួយដល់កសិករ។
កិច្ចខិតខំប្រឹងប្រែងនេះបានបង្ហាញពីភាពជោគជ័យខ្លះហើយ ទោះបីជាកសិករបានថ្លែងថា បញ្ហាផ្សេងទៀត ដូចជាកង្វះលទ្ធភាពទទួលបានទឹក និងបញ្ហាសត្វល្អិត បានបង្កផលប៉ះពាល់ដល់ប្រាក់ចំណេញដែលអាចនឹងទទួលបានពីការឡើងថ្លៃស្រូវកាន់តែខ្ពស់ក៏ដោយ។
លោក គឹម សាវុធ អគ្គនាយកក្រុមហ៊ុន Rice miller Khmer Food ដែលបានទទួលកម្ចីប្រហែល ១០ លានដុល្លារពីធនាគារ RDB កាលពីឆ្នាំមុន ដើម្បីពង្រីកឡសម្ងួត និងឃ្លាំងស្ដុករបស់ក្រុមហ៊ុននោះ នៅរដូវនេះបានទទួលកម្ចីប្រហែល ១ លានដុល្លារពី RDB ដើម្បីទិញស្រូវ។
លោកមានប្រសាសន៍ថា៖ «តម្រូវការទីផ្សារអង្ករអន្តរជាតិបានកើនឡើង ហើយរោងម៉ាស៊ីនកិនស្រូវបានមើលឃើញឱកាសសម្រាប់ប្រាក់ចំណេញ ដូច្នេះពួកគេបានប្រើប្រាស់ប្រាក់កម្ចីដើម្បីទិញស្រូវ»។
លោកបានព្យាករថា តម្រូវការកម្ចីនឹងកើនឡើងដោយសារឃ្លាំងស្ដុកដែលត្រូវបានពង្រីក និងឡសម្ងួតនឹងដាក់ឲ្យដំណើរការនៅរយៈពេលប៉ុន្មានខែទៀតខាងមុខ។
មូលនិធិបន្ទាន់សម្រាប់វិស័យស្រូវអង្ករនេះ ត្រូវបានដាក់ឲ្យដំណើរការជាមួយទឹកប្រាក់ ២៧ លានដុល្លារ កាលពីខែកញ្ញាឆ្នាំ ២០១៦ បន្ទាប់ពីមានការតវ៉ាប្រឆាំងដ៏ធំពីកសិករដាំស្រូវនៅក្នុងខេត្តបាត់ដំបង។ រដ្ឋាភិបាលបានចាក់បញ្ចូលសាច់ប្រាក់ចំនួន ២៣លានដុល្លារផ្សេងទៀតកាលពីខែសីហាឆ្នាំមុន។
លោក សាវុធ បានថ្លែងថា បើទោះជាវិធានការរបស់ RDB បានផ្ដល់ជំនួយសង្គ្រោះដល់វិស័យស្រូវអង្ករក៏ដោយ ក៏បញ្ហាដ៏រ៉ាំរ៉ៃនានាដូចជាថ្លៃដឹកជញ្ជូនខ្ពស់ និងថ្លៃថាមពលកើនឡើង នៅតែគំរាមកំហែងដល់ឧស្សាហកម្មនេះ៕ LA
