ភ្នំពេញៈ ការផ្តល់ឥណទានក្នុងវិស័យធនាគារក្នុងឆ្នាំ ២០១៧ បានកើនឡើង ១៦,៨ ភាគរយដល់ ៦៥ ពាន់ពាន់លានរៀល (ប្រហែល ១៦ ពាន់លានដុល្លារ) ខណៈការផ្តល់ឥណទានក្នុងវិស័យមីក្រូហិរញ្ញវត្ថុកើនឡើង ២៥,៥ ភាគរយដល់ ១៥,៩ ពាន់ពាន់លានរៀល (ប្រហែល ៣,៩ ពាន់លានដុល្លារ)។ នេះបើយោងតាមរបាយការណ៍ប្រចាំឆ្នាំរបស់ធនាគារជាតិនៃកម្ពុជា។
របាយការណ៍ដែលបានចេញផ្សាយកាលពីមុនបានបង្ហាញថា វិស័យដែលទទួលបានឥណទានពីធនាគារ បាននាំ មុខដោយការជួញដូររាយ (១៧,៦ ភាគរយ) ការជួញដូរដុំ (១២,៤ ភាគរយ) រីឯកសិកម្ម រុក្ខាប្រមាញ់ និងនេសាទ (១០,៣ ភាគរយ) សំណង់ (៩,៥ ភាគរយ) កម្ចីទិញផ្ទះជាកម្មសិទ្ធិផ្ទាល់ខ្លួន (៩,២ ភាគរយ) សេវាកម្មមិនមែនហិរញ្ញវត្ថុផ្សេងៗទៀត (៧,៣ ភាគរយ)។
របាយការណ៍នេះក៏បង្ហាញផងដែរថា ទ្រព្យសកម្មរបស់ធនាគារបានកើន ១៩,៣ ភាគរយនៅឆ្នាំ ២០១៧ ធៀបនឹងឆ្នាំ២ ០១៦ ដល់ ១១៤,៨ ពាន់ពាន់លានរៀល (ប្រហែល ២៨,៣៤ ពាន់លានដុល្លារ) ដោយសារកំណើនមូលនិធិភាគទុនិក (២២,៥ ភាគរយ) កំណើនមូលនិធិកម្ចី (៣៨,៦ ភាគរយ) និងកំណើនប្រាក់បញ្ញើពីអតិថិជន (២៣,៣ ភាគរយ)។
វិស័យមីក្រូហិរញ្ញវត្ថុបានផ្តល់ឥណទានដល់អតិថិជន ១,៧៥ លាននាក់ ដែលនាំមុខដោយវិស័យកសិកម្ម (២៦,៩ ភាគរយ) វិស័យពាណិជ្ជកម្ម (១៨,៦ ភាគរយ) ក្រុមគ្រួសារ (៣៣,២ ភាគរយ) សេវាកម្ម (១០,៣ ភាគរយ) និងដឹកជញ្ជូន (៤,៥ ភាគរយ)៕