Search form

Login - Register | FOLLOW US ON

Logo of Phnom Penh Post newspaper Phnom Penh Post - ការ​ផ្សព្វផ្សាយ​ពាណិជ្ជកម្ម​ ស្រាបៀរ​មាន​កំណើន​លឿន

Content image - Phnom Penh Post
បុគ្គលិក​កំពុង​ធ្វើ​ការ​នៅ​ក្នុង​រោង​ចក្រ​ផលិត​ស្រាបៀរ​កម្ពុជា​កន្លង​មក​។ ហេង ជីវ័ន

ការ​ផ្សព្វផ្សាយ​ពាណិជ្ជកម្ម​ ស្រាបៀរ​មាន​កំណើន​លឿន

ភ្នំពេញៈ ការ​ផ្សព្វផ្សាយ​ពាណិជ្ជកម្ម​ស្រាបៀវ​នៅ​កម្ពុជា​មាន​កំណើន​លឿន​បំផុត​ក្នុង​ចំណោម​ឧស្សាហកម្ម​ផ្សព្វផ្សាយ​ពាណិជ្ជកម្ម ដែល​អ្នក​ស្រាវជ្រាវ​អាជីវកម្ម និង​អ្នករកស៊ី​នៅក្នុង​ឧស្សាហ​កម្មនេះ​ឲ្យ​ដឹងថា ថវិកា​ផ្សព្វផ្សាយ​ពាណិជ្ជកម្ម​ដោយ​ក្រុមហ៊ុនស្រា​បៀរ​នានា​បាន​កើនឡើង​ពីរ​ខ្ទង់​ប្រចាំ​ឆ្នាំ​។

យោង​តាម​ទិន្នន័យ​បាន​ពី​ក្រុមហ៊ុន Indochina Research Ltd ការផ្សព្វផ្សាយ​ពាណិជ្ជកម្ម​ស្រា​បៀរ​តាម​ទូរទស្សន៍ និង​កាសែត ដែល​មិន​បាន​រួម​បញ្ចូល​ការចំណាយ​លើ​ប្រភេទ​សកម្មភាព​នានា​ដូចជា​ការ​ប្រគំ​តន្ដ្រី និង​សកម្មភាព​ផ្សព្វផ្សាយ​ផ្សេងទៀត បាន​កើន​ឡើងដល់​៣,៣​លាន​ដុល្លារ​កាលពី​ឆ្នាំ​២០១៦ កើនឡើង ​១៩​ ភាគរយ​ធៀប​នឹង​ឆ្នាំ​ ២០១៥​។​

បើទោះបី​យ៉ាងនេះ​ក្តី នាយក​ទីផ្សារ​នៅ​ទូរទស្សន៍​ឈានមុខ​គេ​មួយ​នៅ​កម្ពុជា បាន​ឲ្យ​ដឹងថា ថវិកា​សរុប​ដែល​ចំណាយ​ដោយ​ក្រុមហ៊ុន​ស្រា​បៀរ​លើ​ការផ្សព្វផ្សាយ​កើនឡើង​ដល់​ជិត​២០​លាន​ដុល្លារ​ក្នុង​មួយឆ្នាំ​(​គ្រប់​សកម្មភាព​នៃ​ការ​ផ្សព្វផ្សាយ​ទាំងអស់ រួមមាន​ទាំង​ការ​ប្រគំ​តន្ដ្រី​)​។​

​លោក Xavier Depouilly អ្នក​គ្រប់ គ្រង​ទូទៅ​ទទួល​បន្ទុក​ទីផ្សារ​ប្រទេស​វៀតណាម និង​កម្ពុជា​នៅ​ក្រុមហ៊ុន​ស្រាវជ្រាវ​ទីផ្សារ Indochina Research បាន​ឲ្យ​ដឹងថា ទិន្នន័យ​របស់ IndoChina Research ផ្តោត​តែ​លើ​ពាណិជ្ជកម្ម​ប៉ុណ្ណោះ​។ លោក​បន្តថា​៖ «​ពិត​ហើយ​ថវិកា​ភាគច្រើន ត្រូវបាន​ចំណាយ​លើ «​សកម្មភាព​តាម​ប៉ុស្ដិ៍​ទូរទស្សន៍ និង​ព្រឹត្តិការណ៍​នានា​»​។

លោក​ថ្លែងថា​៖ «​ក្រៅពី​តម្លៃ​ជារួម ការ​ចំណាយ និង​របាយការណ៍​ស្ប៉ត ផ្តោតលើ​កិច្ចខិតខំ​ប្រឹងប្រែង​ផ្សព្វផ្សាយ​តាម​ប្រព័ន្ធ​ព័ត៌មាន​»​។

លោក​បន្ថែមថា យីហោ​ផ្សាយពាណិជ្ជកម្ម​ភាគច្រើន​កាលពី​ឆ្នាំ​២០១៦ គឺ​ស្រា​បៀរ Ganzberg ( ៥៧ ១១៧ ស្ប៉ត​) តំណាង​ឲ្យ​ចំណែក ២៨​ភាគរយ​តាម​ទូរទស្សន៍ បន្ទាប់​មក​ស្រា​បៀរ​កម្ពុជា ៣៤ ៩៤៧​ស្ប៉ត និង​ស្រា​បៀរ​អង្គរ ២៦ ៤៤៨​ស្ប៉ត​។​

​មាន​ក្រុមហ៊ុន​ស្រា​បៀរ​ឈាន​មុខ​គេ​៣​នៅ​ប្រទេស​កម្ពុជា រួមមាន​ក្រុមហ៊ុន Cambodia Brewery Ltd (CBL) ក្រុមហ៊ុន Cambrew និង​ក្រុមហ៊ុន Khmer Beverage​។

ក្រុមហ៊ុន Khmer Beverage គឺជា​ក្រុមហ៊ុន​ផលិត​ស្រាបៀរ​កម្ពុ​ជា ខណៈ​ដែល​ក្រុមហ៊ុន Cambrew ផលិត​ស្រា​បៀរ​អង្គរ ស្រា​បៀរ បាយ័ន ស្រា​បៀរ Black Panther និង​ស្រា​បៀរ Klang​។ ក្រុមហ៊ុន CBL ផលិត​ស្រា​បៀរ ថៃ​ហ្គ័រ ស្រា​បៀរ ABC ស្រា​បៀរ អាន់​ឆ័​រ ស្រា​បៀរ ក្រោ​ន និង​ថ្មីៗ​នេះ​ក្រុមហ៊ុន​បាន​បន្ថែម​ផលិត​ស្រា​បៀរ Heineken​។​

​តាម​របាយកាណ៍​សិក្សា​របស់​ស្រា​បៀរ Heineken ប្រជាជន​កម្ពុជា​ផឹកស្រា​បៀរ​ប្រហែល​៦,១​លាន​ហិកតូ​លីត្រ​ក្នុង​មួយ​ឆ្នាំ​ឬ​៣៨,៦​លីត្រ ក្នុង​មនុស្ស​ម្នាក់​។

លោក​ឆែ លីម​ស្រេង អ្នក​គ្រប់គ្រង ទីផ្សារ​នៅ​ក្នុង​ប៉ុស្ដិ៍​ទូរទស្សន៍​ឈាន មុខ​គេ​មួយ​នៅ​កម្ពុជា បាន​ឲ្យ​ដឹង​ថា ការ​ផ្សព្វ​ផ្សាយ​ពាណិជ្ជកម្ម​ស្រា​បៀរ​នៅ​ពេល​នេះ​កំពុង​នាំមុខ​ផលិតផល​នានា​នៅ​ក្នុង​វិស័យ​ផ្សព្វផ្សាយ​ពាណិជ្ជកម្ម​កម្ពុ​ជា ដោយ​មក​ជំនួស​ការ​ផ្សព្វផ្សាយ​ពាណិជ្ជកម្ម​របស់​ក្រុមហ៊ុន​ទូរគមនាគមន៍​។ ការ​ផ្សព្វផ្សាយ​របស់​ផលិតផល​ភេសជ្ជៈ​ប៉ូវ​កម្លាំង និង​ភេសជ្ជៈ​ផ្សេង​ទៀត ឈរ​នៅ​លំដាប់​ទី​ពីរ​។

លោក​បន្ត​ថា​៖ «​ទាក់ទង​នឹង​ទីផ្សារ​ស្រា​បៀរ បើ​មិន​មាន​ការ​ផ្សព្វផ្សាយ​ពាណិជ្ជកម្ម​ទេ ក្រុមហ៊ុន​នឹង​ពិបាក​លក់​ផលិតផល​របស់​ពួក​គេ​»​។ លោក​បន្ថែម​ថា ក្រុមហ៊ុន​ស្រា​បៀរ​ធំៗ​តែង​តែ​បង្កើន​ថវិកា​ផ្សព្វផ្សាយ​ពាណិជ្ជកម្ម​របស់​ពួក​គេ​ជា​រៀង​រាល់​ឆ្នាំ ដើម្បី​រក្សា​ចំណាត់​ថ្នាក់​របស់​ខ្លួន​ជា​ក្រុមហ៊ុន​ផ្គត់ផ្គង់​សំខាន់​។

លោក​បញ្ជាក់​ថា​៖ «​ក្រុមហ៊ុន​កាន់​តែ​ច្រើន​ចំណាយ​លើ​ការ​ផ្សព្វ​ផ្សាយ​ពាណិជ្ជកម្ម វា​ឆ្លុះ​បញ្ចាំង​ថា ពួក​គេ​លក់​បាន​កាន់​តែ​ច្រើន​»​។

លោក អ៊ឹម សុធារិទ្ធិ នាយក​ទំនាក់​ទំនង​ក្រុមហ៊ុន Khmer Brewery Limited បាន​ឲ្យ​ដឹង​កាលពី​ម្សិលមិញ​ថា ថវិកា​ចំណាយ​លើ​ការ​ផ្សព្វ​ផ្សាយ​ពាណិជ្ជកម្ម​ស្រា​បៀរ​នៅ​ក្នុង​ក្រុមហ៊ុន​របស់​លោក​បាន​កើន​ឡើង​ជា​រៀង​រាល់​ឆ្នាំ​។

លោក​ថ្លែងថា​៖ «​គ្រាន់​តែ​ថវិកា​ចំណាយ​សម្រាប់​ការ​ទទួល​ខុស​ត្រូវ​សង្គម​តែ​មួយ យើង​ចំណាយ​ជិត​១​លាន​ដុល្លារ​ក្នុង​មួយ​ឆ្នាំ​»​។ លោក​បន្ថែម​ថា ថវិកា​ផ្សព្វផ្សាយ​ស្រា​បៀរ​សរុប​អាច​ខ្ពស់​ជាង​អ្វី​ដែល​របាយ​ការណ៍​ស្រាវជ្រាវ​រក​ឃើញ​៕ LA

0

Comments

Please, login or register to post a comment