Search form

Login - Register | FOLLOW US ON

Logo of Phnom Penh Post newspaper Phnom Penh Post - ការ​យក​ចលនទ្រព្យ​ជា​វត្ថុ​បញ្ចាំ ​នៅ​តែ​ពិបាក

Content image - Phnom Penh Post
បុគ្គលិក​គ្រឹះស្ថាន​មីក្រូ​ហិរញ្ញវត្ថុ​ប្រាសាក់​កំពុង​បំពេញ​ទម្រង់​ដាក់​ប្រាក់​បញ្ញើ​ដល់​អតិថិជន​។ ហុង មិនា

ការ​យក​ចលនទ្រព្យ​ជា​វត្ថុ​បញ្ចាំ ​នៅ​តែ​ពិបាក

ភ្នំពេញៈ ខណៈ​ទំហំ​កម្ចី​នៅ​គ្រឹះស្ថាន​ហិរញ្ញវត្ថុ​កម្ពុជា​បាន​កើន​ឡើង​យ៉ាងខ្លាំង​នៅ​ជាង​មួយ​ទសវត្យរ៍​ចុង​ក្រោយ​នេះ​ការ​ផ្តល់​កម្ចី​ភាគច្រើន​នៅតែ​ពឹង​លើ​អចលនទ្រព្យ​ជាវ​ត្ថុ​ធានា ដោយសារ​ថា​គ្រឹះស្ថាន​ហិរញ្ញវត្ថុ​យល់​ឃើញ​ថា​ការ​ទទួល​ចលនវត្ថុ​ជា​ទ្រព្យ​ធានា​ពិបាក​ក្នុងការ​អនុវត្ត​ដោយ​សារ​មាន​ហានិភ័យ​ខ្ពស់​។ នេះ​បើ​យោង​តាម​ការ​ឲ្យ​ដឹង​ពី​ប្រតិបត្តិ​ករ​ហិរញ្ញវត្ថុ​កម្ពុជា​។

អ្នក​ជំនាញ​ក្នុង​ឧស្សាហ​កម្ម​នេះ​បាន​ទទួល​ស្គាល់​ថា គំនិត​ផ្តួច​ផ្តើម​ថ្មី​ទាក់ទង​នឹង​ការ​ទទួល​ចលនវត្ថុ​ជា​ទ្រព្យ​ធានា​ គឺជា​យន្តការ​ថ្មី​ដែល​អាច​ជួយ​សម្រួល​ប្រជាជន​ទទួល​កម្ចី​បាន​ទូលំទូលាយ​ជាង​មុន តែ​វិធីសាស្ត្រ​នៅ​ត្រូវការ​ពេលវេលា​យូរ​ទៀត​ ដើម្បី​អាច​អនុវត្តបាន ឬ​លុះត្រា​តែ​រដ្ឋាភិបាល និង​ក្រសួង​ពាក់ព័ន្ធ​ពង្រឹង​ប្រព័ន្ធ​ចុះបញ្ជី​ចលនវត្ថុ​ឲ្យ​បាន​ត្រឹមត្រូវ តម្លាភាព និង​ទុក​ចិត្ត​បាន​ជាង​ បច្ចុប្បន្ន​។

ទោះបី​យ៉ាង​នេះ​ក្តី ប្រតិបត្តិការ​បែប​នេះ​បាន​និង​កំពុង​ត្រូវ​បាន​អនុវត្ត​រួច​ហើយ​ដោយ​ប្រតិបត្តិ​ករ​ឥណទាន​មួយ​ចំនួន ដែល​ស្រដៀង​គ្នា​នឹង​ហាង​បញ្ចាំ​ដែរ​។

លោក ហួត អៀងតុង អគ្គនាយក និង​ជា​ប្រធាន​គ្រឹះស្ថាន​មីក្រូ​ហិរញ្ញវត្ថុ ហត្ថា​កសិករ បាន​ប្រាប់​ ភ្នំពេញ ប៉ុស្តិ៍​ថា វា​នឹង​កាន់​តែ​ងាយស្រួល​សម្រាប់​អតិថិជន​ក្នុង​ការ​ទទួល​បាន​ឥណទាន ប្រសិន​បើ​គ្រឹះស្ថាន​ហិរញ្ញវត្ថុ​ទទួល​យក​ចលនវត្ថុ​ជា​ទ្រព្យ​ធានា​ដូច​ជា​រថយន្ត ម៉ូតូ គ្រឿង​យន្ត​កសិកម្ម ឬ ​ស្ដុក​ដំណាំ​កសិកម្ម​ត្រូវ​ចាត់​ថ្នាក់​ជា​ទ្រព្យ​ធានា ប៉ុន្តែ​ ស្ថានភាព​គឺ​ហានិភ័យ​ខ្ពស់​ក្នុង​ស្ថាន​ភាព​បច្ចុប្បន្ន​របស់​ប្រទេស​កម្ពុជា​។

លោក​បាន​ថ្លែង​ថា​៖ «​យើង​នៅ​តែ​មើល​ឃើញ​ថា របៀប​នេះ​គឺមាន​ហានិភ័យ​ខ្ពស់ ដោយ​សារ​យើង​នៅ​តែ​ខ្វះ​កម្មវិធី​ដែល​អាច​ទុក​ចិត្ត​បាន​ក្នុង​ការ​គ្រប់គ្រង​ចលនវត្ថុ​»​។

លោក​បន្ត​ថា​៖ «​ចលនវត្ថុ​ងាយ​ស្រួល​ក្នុង​ការ​ទិញ និង​លក់​នៅ​លើ​ទីផ្សារ​»​។

យោង​តាម​លោក អៀង​តុង ការ​ប្រើ​ប្រាស់​ចលនវត្ថុ​ដូច​ជា​រថយន្ត ឬ​ម៉ូតូ ដើម្បី​ទទួល​បាន​កម្ចី​អាច​រក​បាន​នៅ​ហាង​បញ្ចាំ ដែល​អ្នក​យក​កម្ចី​អាច​ទទួល​បាន​ប្រាក់​ភ្លាមៗ ប៉ុន្តែ​រយៈពេល​ខ្លី ហើយ​អត្រា​ការ​ប្រាក់​ខ្ពស់​ជាង​គ្រឹះស្ថាន​ហិរញ្ញវត្ថុ​។

លោក​បន្ថែម​ថា វា​ត្រូវការ​ពេលវេលា​យូរ​ក្នុង​ការ​អនុវត្ត​យុទ្ធសាស្ដ្រ​នេះ​នៅ​ក្នុង​គ្រឹះស្ថាន​ហិរញ្ញវត្ថុ ខណៈ​រដ្ឋាភិបាល និង​ស្ថាប័ន​ជាប់​ពាក់ព័ន្ធ​អាច​អភិវឌ្ឍ​កម្មវិធី​ដ៏​ទូលំទូលាយ​ដើម្បី​ធានា​ឲ្យ​ប្រាកដ​ថា ហានិភ័យ​អាច​ត្រូវ​បាន​កាត់​បន្ថយ​។

យោង​តាម​របាយ​ការណ៍​ត្រួត​ពិនិត្យ​ប្រចាំ​ឆ្នាំ​របស់​ធនាគារ​ជាតិ​នៃ​កម្ពុជា (NBC) កម្ចី​នៅ​ក្នុង​ឧស្សាហកម្ម​ធនាគារ​នៅ​កម្ពុជា​បាន​កើន​ឡើង​ដល់ ​១៤ ​ពាន់​លាន​ដុល្លារ ​កាលពី​ចុងឆ្នាំ​ ២០១៦ ខណៈ​ផលបត្រ​កម្ចី​រួម​របស់​គ្រឹះស្ថាន​មីក្រូ​ហិរញ្ញវត្ថុ​ទាំងអស់​បាន​កើន​ឡើង​ដល់​ ៣,១៦ ​ពាន់​លាន​ដុល្លារ ​កាលពី​ចុង​ឆ្នាំ ​២០១៦​។

​លោក ប៊ុន មនី ទីប្រឹក្សា​សមាគម​មីក្រូ​ហិរញ្ញវត្ថុ​កម្ពុជា​បាន​ឲ្យ​ដឹង​ថា គំនិត​ផ្ដួច​ផ្ដើម​ក្នុងការ​ទទួលយក​ស្ដុក​ដំណាំ​កសិកម្ម​ដូចជា​ស្ដុក​អង្ករ ឬ​ ស្ដុក​ដំណាំ​កសិកម្ម​ផ្សេង​ទៀត​ជា​ទ្រព្យ​ធានា​ត្រូវបាន​ស្វាគមន៍​យ៉ាងខ្លាំង ដោយ​សារ​តែ​វា​អាច​កាត់បន្ថយ​ឧបសគ្គ​ដែល​អ្នក​ខ្ចីប្រាក់​របស់​កម្ពុជា​ប្រឈម​។

លោក​បន្ថែម​ថា យុទ្ធសាស្ដ្រ​ថ្មី​នេះ​នឹង​ជា​អត្ថប្រយោជន៍​ដ៏​សំខាន់​សម្រាប់​សហគ្រាស​ធុន​តូច និង​មធ្យម ដែល​ត្រូវការ​ដំណើរការ​លឿន​នៃ​ការ​ទទួល​បាន​មូលធន​ដើម្បី​ពង្រីក និង​វិនិយោគ​។

លោក​បន្ថែម​ថា ដើម្បី​ជំរុញ​ចលនវត្ថុ​ត្រូវ​បាន​​ប្រើប្រាស់​ជា​ទ្រព្យ​ធានា អ្នក​ខ្ចី​ចាំបាច់​ត្រូវ​បង្ហាញ​ភាពស្មោះត្រង់ និង​ភាព​ស្អាតស្អំ​របស់​ពួកគេ នៅក្នុង​ការងារ​នេះ​។

​លោក​ថ្លែងថា​៖ «​អ្នកយក​កម្ចី​ចាំបាច់​ត្រូវមាន​ភាពស្មោះត្រង់ ហើយ​ធានា​ឲ្យ​ប្រាកដថា ទ្រព្យ​ទាំងនោះ​មិន​ត្រូវបាន​ប្រើប្រាស់​ដើម្បី​ទទួល​បាន​កម្ចី​ពី​គ្រឹះស្ថាន​ផ្សេង​»​។

លោក​បន្តថា​៖ «​ម្ចាស់ ​SME ចាំបាច់​ត្រូវ​បង្ហាញ​តម្លាភាព​របស់​ពួកគេ​តាមរយៈ​ការបង្ហាញ​របាយការណ៍​ហិរញ្ញវត្ថុ​ស្អាតស្អំ​ដល់​គ្រឹះស្ថាន​ហិរញ្ញវត្ថុ​ផងដែរ​»៕ LA

0

Comments

Please, login or register to post a comment