Search form

Login - Register | FOLLOW US ON

Logo of Phnom Penh Post newspaper Phnom Penh Post - ការ​អភិវឌ្ឍ​ធនធាន​មនុស្ស​របស់​កម្ពុជា​ នៅ​តែ​ទាប

Content image - Phnom Penh Post
សកម្មភាព​គ្រូ​កំពុង​បង្រៀន​សិស្ស​នៅ​សាលា​ច្បាប់ ក្នុង​ទីក្រុង​ភ្នំពេញ នា​ពេល​កន្លង​មក។ រូបថត ភ្នំពេញ ប៉ុស្តិ៍

ការ​អភិវឌ្ឍ​ធនធាន​មនុស្ស​របស់​កម្ពុជា​ នៅ​តែ​ទាប

ភ្នំពេញៈ របាយការណ៍​ថ្មី​មួយ​ដែល​ចេញ​ដោយ​វេទិកា​សេដ្ឋកិច្ច​ពិភពលោក ​(WEF) នៅ​តែ​បន្ត​ផ្ដល់​ពិន្ទុ​កម្រិត​ទាប​ដល់​កម្ពុជា​ទៅ​លើ​ការ​អប់រំ និង​ការ​បណ្ដុះ​បណ្ដាល​ពលរដ្ឋ​របស់​ខ្លួន ក្នុង​ការ​អភិវឌ្ឍ​កម្លាំង​ពលកម្ម​ប្រកប​ដោយ​សមត្ថភាព​ប្រកួត​ប្រជែង និង​ការ​ប្រើប្រាស់​ជំនាញ​ប្រកប​ដោយ​ផលិតភាព ដោយ​ផ្ដល់​ចំណាត់​ថ្នាក់​អន់​បំផុត​នៅ ​អាស៊ាន​។

កម្ពុជា​ជាប់​ចំណាត់​ថ្នាក់​ទី​៩២​ក្នុង​ចំណោម​ប្រទេស​ ១៣០ ទាក់ទង​នឹង​ការ​អភិវឌ្ឍ​ធនធាន​មនុស្ស កើន​ឡើង​ពី​ចំណាត់​ថ្នាក់​ទី​ ១០០ កាលពី​ឆ្នាំមុន ដែល​បង្ហាញ​ថា ប្រទេស​នេះ​បាន​កែលម្អ​ជាស​កល ប៉ុន្តែ​បាន​ធ្លាក់​ចុះ​នៅ​ពី​ក្រោយ​ប្រទេស​ដៃគូ​ក្នុង​តំបន់​របស់​ខ្លួន​។ នេះ​បើ​យោង​តាម​របាយការណ៍​ធន​ធាន​មនុស្ស​ឆ្នាំ​ ២០១៧​។

កម្ពុជា​ មាន​ចំណាត់​ថ្នាក់​នាំ​មុខ​សាធារណរដ្ឋ Dominican ដែល​មាន​ចំណាត់​ថ្នាក់​ទី​ ៩៣ និង​នៅ​ពី​ក្រោយ​ប្រទេស Botswana ដែល​មាន​ចំណាត់​ថ្នាក់​ទី​ ៩១​។

ទន្ទឹម​នឹង​ប្រទេស​មីយ៉ាន់ម៉ា ដែល​បាន​ទទួល​ចំណាត់​ថ្នាក់​ទី​១០៩ កាលពី​ឆ្នាំ​២០១៦ បាន​ហក់​មក​នៅ​ចំណាត់​ថ្នាក់​ទី​ ៩០​ នៅ​ឆ្នាំ​នេះ ខណៈ​ប្រទេស​ឡាវ បាន​ធ្វើ​ឲ្យ​មាន​វឌ្ឍនភាព​ដ៏​សំខាន់​ផង​ដែរ​ទី ​១០៦ ដល់ទី​ ៨៤​។

អ្នក​និពន្ធ​របាយការណ៍​នេះ​បាន​កត់​សម្គាល់​ថា​៖ «​របៀប​ដែល​បណ្ដា​ប្រទេស​ជាច្រើន​អភិវឌ្ឍ​ធនធាន​មនុស្ស​របស់​ពួក​គេ​អាច​ជា​ការ​កំណត់​ដ៏​សំខាន់​សម្រាប់​ភាព​ជោគជ័យ​រយៈពេល​វែង​របស់​ខ្លួន​ច្រើន​ជាង​កត្តា​ផ្សេងៗ​ទៀត​»​។

អ្នក​និពន្ធ​របាយការណ៍​នេះ​បន្ត​ថា​៖ «[​ធនធាន​មនុស្ស​] អាច​ត្រូវ​បាន​លើក​កម្ពស់​គ្រប់​ពេល ដែល​រីកចម្រើន​តាម​រយៈ​ការ​ប្រើ​ប្រាស់ និង​អន់ថយ​ដោយ​ការ​មិន​ប្រើប្រាស់ នៅ​ក្នុង​ឆាក​ជីវិត​របស់​មនុស្ស​»​។

របាយ​ការណ៍​ដែល​ចេញ​ផ្សាយ​ប្រចាំ​ឆ្នាំ​បាន​ផ្ដល់​ចំណាត់ថ្នាក់​ដល់​ប្រទេស​ជាច្រើន​ទៅ​លើ​របៀប​ដែល​ប្រទេស​ទាំង​នេះ​កំពុង​អភិវឌ្ឍ​ល្អ​បំផុត និង​ការ​ប្រើប្រាស់​ធនធាន​មនុស្ស​សម្រាប់​តម្រូវ​ការ​សេដ្ឋកិច្ច​ដែល​មាន​ការ​ប្រកួត​ប្រជែង​ជាស​កល ដែល​កំពុង​បង្កើន​ការ​ភ្ជាប់​ទំនាក់​ទំនង​។

តាម​របាយ​ការណ៍​នេះ​ «​បដិវត្តន៍​ឧស្សាហកម្ម​ទី​ ៤» កំពុង​ប៉ះពាល់​ដល់​គ្រប់​ឧស្សាហកម្ម​ទាំង​អស់ ដែល​ផ្លាស់​ប្តូរ​ការ​ផលិត និង​ការ​ប្រើ​ប្រាស់​កម្លាំង ខណៈ​វា​កំពុង​ជំរុញ​បណ្ដា​ប្រទេស​ជា​ច្រើន​ក្នុង​ការ​ធ្វើ​ឲ្យ​ប្រសើរ​នៃ​ធនធាន​មនុស្ស​របស់​ខ្លួន​។

លោក Klaus Schwab ស្ថាបនិក និង​ជា​ប្រធាន​ប្រតិបត្តិ​ WEF បាន​ឲ្យ​ដឹង​ថា​៖ «​ប៉ុន្តែ​ជារឿយៗ សក្ដានុពល​ធនធាន​មនុស្ស​មិន​ត្រូវ​បាន​គេ​ដឹង​នោះ បាន​រារាំង​ដោយ​មិន​ស្មើភាព​គ្នា ឬ​ជំនឿ​មិន​ពិត និង​ហួស​សម័យ​ពី​សំណាក់​អ្នក​ធ្វើ​គោល​នយោបាយ ដែល​ការ​វិនិយោគ​នៅក្នុង​ផ្នែក​តូចៗ​នៃ​កម្លាំង​ពលកម្ម​ជំនាញ​កម្រិត​ខ្ពស់​តែ​មួយ​អាច​ជំរុញ​កំណើន​រួម​ប្រកប​ដោយ​ស្ថិរភាព​»​។

របាយ​ការណ៍​ឆ្នាំ​នេះ​ត្រូវ​បាន​រៀបចំ​ឡើង​លើ​សូចនាករ ​២១​ គត់ និង​ចំណុច​ទិន្នន័យ​ផ្សេង​គ្នា​ចំនួន​ ៤៤ ដែល​វាស់វែង​ការ​អប់រំ និង​កម្រិត​ជំនាញ​ការងារ ព្រម​ទាំង​ការ​ចូលរួម​ផ្នែក​សេដ្ឋកិច្ច​។

ចំណាត់​ថ្នាក់​របស់​កម្ពុជា​បាន​កើន​ឡើង​ ៨​ កម្រិត ធៀប​នឹង​ឆ្នាំ​មុន ប៉ុន្តែ​នៅ​តែ​ជាប់​ចំណាត់ថ្នាក់​អន់​បំផុត​នៅ​ក្នុង​តំបន់​នេះ​។ ចំណាត់​ថ្នាក់​ទាប​ជា​បន្ត​របស់​កម្ពុជា​ឆ្លុះ​បញ្ចាំង​ពី​ការ​ខ្វះខាត​ខាង​សមត្ថភាព​របស់​ប្រទេស​នេះ​ក្នុង​ការ​មាន​ប្រព័ន្ធ​អប់រំ​គួរ​ឲ្យ​ជឿ​ទុក​ចិត្ត ជាមួយ​នឹង​ការ​អនុវត្ត​អន់​បំផុត​។

ផ្អែក​លើ​ផ្នែក​វិជ្ជមាន ប្រទេស​កម្ពុជា​អនុវត្ត​ល្អ​ប្រសើរ​លើ​ការ​ចូលរួម​កម្លាំង​ពលកម្ម គម្លាត​យេនឌ័រ​ផ្នែក​ការងារ និង​ភាព​គ្មាន​ការងារ​ធ្វើ ដែល​ទទួល​បាន​ចំណាត់​ថ្នាក់​ជា​រួម​ល្អ​បំផុត​ទី​៤​លើ​ពិភពលោក​៕ LA

0

Comments

Please, login or register to post a comment