.jpg)
អតិថិជនកំពុងដកប្រាក់ពីម៉ាស៊ីន អេធីអឹម របស់ធនាគារ អេស៊ីលីដា ក្នុងទីក្រុងភ្នំពេញនាពេលកន្លងមក។ ហុង មិនា
ភ្នំពេញៈ ការិយាល័យឥណទានកម្ពុជា (CBC) កាលពីម្សិលមិញបានចេញផ្សាយរបាយការណ៍ត្រីមាសទី ៤ ឆ្នាំ ២០១៧ ដែលបានបង្ហាញកំណើនដ៏រឹងមាំក្នុងការដាក់ពាក្យសុំឥណទាន ពិសេសផ្នែកកាតឥណទាន និងកម្ចីទិញផ្ទះ។
ការិយាល័យនេះបានរាយការណ៍ពីកំណើន ១៩ ភាគរយក្នុងការដាក់ពាក្យសុំឥណទានធៀបនឹងត្រីមាសទី ៣ កាលពីឆ្នាំមុនលើសអត្រាកំណើនត្រីមាសទី ៣ ដែលមានកំណើន ១០ ភាគរយ។
ការដាក់ពាក្យសុំឥណទានថ្មីបានកើនឡើងលឿនបំផុតនៅក្នុងតំបន់ខ្ពង់រាប ដែលជាធម្មតាផ្ដល់ចំណាត់ថ្នាក់ជាតំបន់ក្រីក្របំផុតរបស់ប្រទេសកម្ពុជាដែលរួមមានខេត្តក្រចេះ មណ្ឌលគិរី រតនគិរី ស្ទឹងត្រែង និងព្រះវិហារ។ កំណើននៅតំបន់នោះភាគច្រើនត្រូវបានជំរុញដោយការដាក់ពាក្យសុំកម្ចីទិញផ្ទះ ដែលបានកើនឡើង ២៧១ ភាគរយធៀបនឹងកំណើន ៦២ ភាគរយនៅក្នុងការដាក់ពាក្យសុំកម្ចីទិញផ្ទះទូទាំងប្រទេស។
កំណើនកាតឥណទានមានភាពរឹងមាំបំផុតនៅទីក្រុងភ្នំពេញ និងខេត្តមួយចំនួន។ កម្ចីកាតឥណទានដែលនៅតែមានចំនួនតិចជាង ១ ភាគរយនៃឥណទានសរុបដែលបានចេញនៅក្នុងប្រទេសនេះបានកើនឡើង ១០៩ ភាគរយកាលពីត្រីមាសមុនដោយភាគច្រើននៃកំណើននោះចេញមកពីទីក្រុង។
ចំណែកឥណទាននៅសល់ត្រូវបានបំបែកភាគច្រើនស្មើគ្នារវាងកម្ចីបុគ្គល និងកម្ចីទិញផ្ទះ។ នេះបើយោងតាមរបាយការណ៍។
របាយការណ៍ឲ្យដឹងថាអត្រាកម្ចីមិនដំណើរការ (NPL ) មានអត្រា ១,៥ ភាគរយធ្លាក់ចុះពីត្រីមាសទី ៣ ទោះបីជាតុល្យភាពសរុបនៃកម្ចីបានកើនឡើង ៤៤ ភាគរយដល់ ៤,៥៤ ពាន់លានដុល្លារក៏ដោយ។
យោងតាមតួលេខបានពីធនាគារជាតិនៃកម្ពុជា (NBC) ដែលបានចេញផ្សាយកាលពីខែមុនអត្រា NPL ជាពិសេសសម្រាប់គ្រឹះស្ថានមីក្រូហិរញ្ញវត្ថុមានកាន់តែខ្ពស់ដែលកើនឡើង ២ ភាគរយកាលពីឆ្នាំមុនជិត ២ ដងនៃអត្រាធៀបនឹងឆ្នាំ ២០១៦ ប៉ុន្តែនៅតែស្ថិតក្នុងលំដាប់ធម្មតា។
CBC ប្រមូលទិន្នន័យកម្ចីពីធនាគារពាណិជ្ជ និងគ្រឹះស្ថានមីក្រូហិរញ្ញវត្ថុទាំងអស់ដែលបានចុះបញ្ជីជាមួយធនាគារជាតិនៃកម្ពុជា។ នេះបើយោងតាមលោក សំ ឧត្តម អ្នកគ្រប់គ្រងផ្នែកទីផ្សារនៅ CBC៕LA
