.jpg)
ឡូហ្គោរបស់ក្រុមហ៊ុនផលិតដែកធំបំផុតរបស់កូរ៉េ Posco នៅការិយាល័យកណ្តាលនាក្រុងសេអ៊ូល។ AFP
ក្រុងហ្សឺណែវៈ ប្រទេសកូរ៉េខាងត្បូងបានដាក់ពាក្យប្តឹងដ៏ធំមួយទៅកាន់អង្គការពាណិជ្ជកម្មពិភពលោក (WTO) ដើម្បីតវ៉ាចំពោះការប្រើប្រាស់ពន្ធប្រឆាំងនឹងការឧបត្ថម្ភធន និងការលក់បង្ខូចតម្លៃទីផ្សាររបស់សហរដ្ឋអាមេរិក ដោយបានលើកឡើងពីការប្រើប្រាស់ពន្ធទាំងនោះមកលើផលិតផលដែក និងឧបករណ៍បំលែងចរន្តអគ្គិសនី។ នេះបើតាមឯកសាររបស់អង្គការ WTO ដែលបានបង្ហាញកាលពីថ្ងៃអង្គារ។
សហរដ្ឋអាមេរិកមានរយៈពេល ៦០ ថ្ងៃដើម្បីដោះស្រាយបញ្ហានេះ បន្ទាប់មកប្រទេសកូរ៉េខាងត្បូងអាចស្នើឲ្យអង្គការ WTO ចាត់វិធានការ។
បណ្តឹងនេះសំដៅលើច្បាប់ពាណិជ្ជកម្មរបស់អាមេរិកដែលកើតមាននៅក្នុងរដ្ឋបាលរបស់លោកប្រធានាធិបតី ដូណាល់ ត្រាំ តែបណ្តឹងនេះនឹងបន្ថែមលើជម្លោះដែលបានកើតឡើងដោយសារគោលនយោបាយរបស់លោក ត្រាំ ស្តីពីការអនុវត្តគោលនយោបាយ «អាមេរិកជាអាទិភាព» ដែលមនុស្សជាច្រើនមើលឃើញថាមានលក្ខណៈគាំពារនិយម។
រដ្ឋាភិបាលក្រុងវ៉ាស៊ីនតោនកំពុងតស៊ូរួចទៅហើយជាមួយនឹងបណ្តឹងនៅអង្គការ WTO របស់ប្រទេសកាណាដា ដែលតវ៉ាពីមូលដ្ឋាននៃច្បាប់ពាណិជ្ជកម្មរបស់អាមេរិក និងកំពុងប្រឆាំងនឹងការទាមទាររបស់ប្រទេសចិនឲ្យប្រទេសផ្សេងទៀតចាត់ទុកថាប្រទេសខ្លួនជា «សេដ្ឋកិច្ចទីផ្សារ» ដែលជាឋានៈមួយដែលអាចរារាំងអាមេរិកចំពោះការការពារខ្លួនប្រឆាំងនឹងក្រុងប៉េកាំង។
ទន្ទឹមនឹងនោះដែរលោក ត្រាំ បានរុញច្រានដំណើរការស្វែងរកដំណោះស្រាយជម្លោះនៅអង្គការ WTO ឲ្យធ្លាក់ចូលក្នុងវិបត្តិ តាមរយៈការរារាំងការតែងតាំងចៅក្រមឧទ្ធរណ៍ថ្មី ដែលគំរាមកំហែងដល់ការផ្អាកការងាររបស់ប្រព័ន្ធមួយដែលបានធ្វើជាមជ្ឈិតករពាណិជ្ជកម្មពិភពលោកអស់រយៈពេលជិត ២៥ ឆ្នាំមកហើយនោះ។
ប្រទេសកូរ៉េខាងត្បូងបានដាក់បណ្តឹងរបស់ខ្លួនកាលពីថ្ងៃទី ១៤ ខែកុម្ភៈ តវ៉ាពីអត្រាពន្ធប្រឆាំងនឹងការលក់បង្ខូចតម្លៃទីផ្សាររហូតដល់ ៦០,៨១ ភាគរយដែលបានហូតលើផលិតផលដែក និងឧបករណ៍បំប្លែងចរន្តអគ្គិសនីរបស់ប្រទេសកូរ៉េខាងត្បូងកាលពីខែឧសភា ឆ្នាំ ២០១៦។
ក្រសួងពាណិជ្ជកម្មរបស់ប្រទេសនេះបានឲ្យដឹងកាលពីសប្តាហ៍មុនថា ការប្រើប្រាស់ច្បាប់ «Adverse Facts Avai-lable» (AFA) បានផ្តល់លទ្ធភាពឲ្យសហរដ្ឋអាមេរិកហូតពន្ធប្រឆាំងនឹងការលក់បង្ខូចតម្លៃទីផ្សារខ្ពស់ដោយមិនស្មើភាព ដោយគ្មានទិន្នន័យផ្ទៀងផ្ទាត់ច្បាស់លាស់ចំពោះការអនុវត្តច្បាប់នេះ។
កាលពីខែឧសភាឆ្នាំមុនក្នុងជម្លោះរបស់ខ្លួនជាមួយប្រទេសចិន ចៅក្រមឧទ្ធរណ៍របស់អង្គការ WTO បានសម្រេចថា ការប្រើប្រាស់ច្បាប់ AFA នៅក្នុងជម្លោះមួយអាចមានបញ្ហា ខណៈដែលពុំមានភ័ស្តុតាងគ្រប់គ្រាន់ដើម្បីតវ៉ាក្នុងករណីរបស់ប្រទេសចិន។
បណ្តឹងរបស់ប្រទេសកូរ៉េខាងត្បូងពុំបានបញ្ជាក់ច្បាស់ពីជម្លោះពាណិជ្ជកម្មនាពេលថ្មីៗនេះជុំវិញករណីហូតពន្ធ «ការពារខ្លួន» របស់សហរដ្ឋអាមេរិកលើផ្ទាំងកញ្ចក់ស្រូបកាំរស្មីពន្លឺព្រះអាទិត្យ និងម៉ាស៊ីនបោកគក់សម្លៀកបំពាក់នោះទេ។ រដ្ឋាភិបាលក្រុងសេអ៊ូលបានទាមទារឲ្យរដ្ឋាភិបាលក្រុងវ៉ាស៊ីនតោនផ្តល់សំណងជំងឺចិត្តចំពោះករណីនោះពោលគឺជាការទាមទារមួយដែលអាចរងនូវផលប៉ះពាល់ បើវាក្លាយជាជម្លោះមួយនោះ។
សហភាពអឺរ៉ុប ចិន កោះតៃវ៉ាន់ និងជប៉ុន ក៏បានទាមទារសំណងជំងឺចិត្តជុំវិញអត្រាពន្ធការពារខ្លួនរបស់អាមេរិកនេះផងដែរ៕ BP
