ក្រុងសេអ៊ូលៈ ប្រទេសកូរ៉េខាងត្បូងបានចុះហត្ថលេខាលើកិច្ចព្រមព្រៀងពាណិជ្ជកម្មសេរីមួយជាមួយប្រទេសនៅតំបន់អាមេរិកកណ្តាលចំនួន ៥ កាលពីថ្ងៃពុធ បើទោះបីជារដ្ឋាភិបាលក្រុងសេអ៊ូល និងរដ្ឋាភិបាលក្រុងវ៉ាស៊ីនតោនឈ្លោះគ្នាដោយសារកិច្ចព្រមព្រៀងពាណិជ្ជកម្មសេរីដែលមានស្រាប់របស់ខ្លួនក្តី។
អ្នកនាំពាក្យរបស់ក្រសួងរដ្ឋាភិបាលក្រុងសេអ៊ូលបានឲ្យដឹងថាលោក Kim Hyun-chong រដ្ឋមន្ត្រីក្រសួងពាណិជ្ជកម្មកូរ៉េខាងត្បូងបានចុះហត្ថលេខាលើកិច្ចព្រមព្រៀងនេះជាមួយនឹងរដ្ឋមន្ត្រីក្រសួងសេដ្ឋកិច្ចមកពីប្រទេសកូស្តារីកា អែលសាល់វ៉ាឌ័រ ហុងឌូរ៉ាស នីការ៉ាហ្គា និងប៉ាណាម៉ា។
អ្នកនាំពាក្យរូបនេះបានបន្តឲ្យដឹងផងដែរថា កិច្ចព្រមព្រៀងដែលនឹងចូលជាធរមាននៅតាមប្រទេសនីមួយៗ នៅពេលដែលប្រទេសនោះធ្វើសច្ចាប័ននេះ ក៏នឹងផ្តល់ឲ្យប្រទេសដែលមានសេដ្ឋកិច្ចធំជាងគេទី ១១ របស់ពិភពលោកមួយនេះនូវ «ផ្លូវទី ៣» ទៅកាន់សហរដ្ឋអាមេរិកក្នុងគ្រាដែលមានកិច្ចគាំពារនិយមផ្នែកពាណិជ្ជកម្មកាន់តែខ្លាំងនៅទីក្រុងវ៉ាស៊ីនតោន។
ប្រទេសកូរ៉េខាងត្បូង និងសហរដ្ឋអាមេរិកមានកិច្ចព្រមព្រៀងរបស់ខ្លួនផ្ទាល់ដែលមានឈ្មោះថា កិច្ចព្រមព្រៀង KORUS តែបានចាប់ផ្តើមកិច្ចពិភាក្សាស្តីពីការចរចាឡើងវិញចំពោះកិច្ចព្រមព្រៀងនេះតាមការទាមទាររបស់រដ្ឋាភិបាលក្រុងវ៉ាស៊ីនតោន។
លោកប្រធានាធិបតីអាមេរិក ដូណាល់ ត្រាំ បានប្រកាសម្តងហើយម្តងទៀតថា កិច្ចព្រមព្រៀងនេះគឺជា «កិច្ចព្រមព្រៀងមិនល្អមួយ» និងជា «គ្រោះមហន្តរាយ» មួយហើយសម្ព័ន្ធមិត្តទាំង ២ បានស្ថិតក្នុងជម្លោះមួយដោយសារការហូតពន្ធលើដែក ម៉ាស៊ីនបោកសម្លៀកបំពាក់ និងផលិតផលផ្សេងទៀតដែលរដ្ឋាភិបាលក្រុងវ៉ាស៊ីនតោនបានអនុវត្តក្នុងពេលប៉ុន្មានសប្តាហ៍ចុងក្រោយនេះ។
សេចក្តីថ្លែងការណ៍របស់ក្រសួងពាណិជ្ជកម្មកូរ៉េខាងត្បូងបានបង្ហាញថា សេដ្ឋកិច្ចរបស់ប្រទេសកូរ៉េខាងត្បូងពឹងផ្អែកខ្លាំងលើពាណិជ្ជកម្មអន្តរជាតិ ហើយកិច្ចព្រមព្រៀងជាមួយប្រទេសនៅតំបន់អាមេរិកកណ្តាលនេះនឹងជួយប្រទេសនេះនាំចេញផលិតផលកាន់តែច្រើនដូចជា រថយន្ត រ៉ែដែក និងដែកថែប សម្ភារប្រើប្រាស់ក្នុងផ្ទះ និងវាយនភ័ណ្ឌទៅកាន់តំបន់នេះ។
យោងតាមតួលេខដែលទទួលបានពីអង្គភាពពាណិជ្ជកម្មកូរ៉េខាងត្បូង KITA បានឲ្យដឹងថា កាលពីឆ្នាំមុនកូរ៉េខាងត្បូងមានអតិរេកជិត ១,៩ ពាន់លានដុល្លារជាមួយប្រទេសទាំង ៥ នៅតំបន់អាមេរិកកណ្តាលដោយការនាំចេញមានទំហំ ២,២ ពាន់លានដុល្លារ និងការនាំចូលមានទំហំ ៣៣៣ លានដុល្លារ។
កិច្ចព្រមព្រៀងនេះបានធ្វើឡើង បន្ទាប់ពីកិច្ចពិភាក្សាអស់រយៈពេល ៣២ ខែ ដើម្បីបន្ធូរបន្ថយអត្រាពន្ធ និងកាត់បន្ថយរបាំងពាណិជ្ជកម្មជាមួយនឹងប្រទេសនៅតំបន់អាមេរិកកណ្តាលចំនួន ៦ តែនៅពេលនេះប្រទេសក្វាតេម៉ាឡាបានសម្រេចមិនចូលរួមក្នុងកិច្ចព្រមព្រៀងនេះ៕ BP