Search form

Login - Register | FOLLOW US ON

Logo of Phnom Penh Post newspaper Phnom Penh Post - ក្រសួង​នឹង​អនុវត្ត​នយោបាយ​កសិកម្ម​ឆាប់ៗ

ការ​ប្រមូល​ផល​របស់​កសិករ​នៅ​ខេត្ត​បាត់ដំបង​នា​ពេល​កន្លង​មក។ ក្រសួង​នឹង​ដាក់​ឲ្យ​អនុវត្ត​គោល​នយោបាយ​ពង្រីក​កសិកម្ម​ដើម្បី​បង្កើន​ផលិតភាព​របស់​កសិករ។
ការ​ប្រមូល​ផល​របស់​កសិករ​នៅ​ខេត្ត​បាត់ដំបង​នា​ពេល​កន្លង​មក។ ក្រសួង​នឹង​ដាក់​ឲ្យ​អនុវត្ត​គោល​នយោបាយ​ពង្រីក​កសិកម្ម​ដើម្បី​បង្កើន​ផលិតភាព​របស់​កសិករ។ ហេង ជីវ័ន

ក្រសួង​នឹង​អនុវត្ត​នយោបាយ​កសិកម្ម​ឆាប់ៗ

ភ្នំពេញៈ មន្ដ្រី​ជាន់​ខ្ពស់​ថ្លែង​ថា​ ក្រសួង​កសិកម្ម រុក្ខាប្រមាញ់ និង​នេសាទ​នឹង​ចាប់​ផ្ដើម​ដំណើរ​ការ​គោល​នយោបាយ​ពង្រីក​កសិកម្ម​សំដៅ​បង្កើត​ចំណេះ​ដឹង​ថ្មី ព័ត៌មាន​ និង​បច្ចេកវិទ្យា​កាន់​តែ​ច្រើន​ឲ្យ​បាន​ដល់​កសិករ និង​សហគមន៍។

ថ្លែង​ក្នុង​កិច្ច​ប្រជុំ​ប្រចាំ​ឆ្នាំ​កាល​ពីថ្ងៃ​ពុធ លោក​ អ៊ុក​ រ៉ាប៊ុន​ រដ្ឋ​មន្ដ្រី​ក្រសួង​កសិកម្ម រុក្ខាប្រមាញ់ ​និង​នេសាទ ឲ្យ​ដឹង​ថា គោលនយោបាយ​នេះ​ត្រូវ​បាន​ចាត់​ទុក​ជា​សមិទ្ធផល​ថ្មី​សម្រាប់​ក្រសួង​កសិកម្ម​សំដៅ​បង្កើន​ការ​យល់​ដឹង​អំពី​បច្ចេកវិទ្យា​ថ្មី​ដល់​កសិករ​ និង​សហគមន៍​ដើម្បី​សម្រេច​បាន​ការ​បង្កើន​ផលិតភាព​។ លោក​ថ្លែង​ថា​៖ «គោលនយោបាយ​នេះ​នឹង​ត្រូវ​ដាក់​ឲ្យ​ដំណើរ​ការ​ក្នុង​ពេល​ឆាប់ៗ។ វា​សំដៅ​បង្កើន​ការ​យល់​ដឹង​អំពី​បច្ចេកវិទ្យា​ថ្មី​ស្ដី​ពី​បច្ចេកទេស​ធ្វើ​កសិកម្ម​ដល់​កសិករ​នៅ​ក្នុង​វិសាលភាព​កាន់​តែ​ធំ​ជាង​មុន​តាម​រយៈ​ការ​ពង្រីក​កសិកម្ម​ចាប់​ពី​វិស័យ​សាធារណៈ ​វិស័យ​ឯកជន និង​ដៃ​គូ​អភិវឌ្ឍន៍​»។

ការ​បង្កើន​លទ្ធភាព​ទទួល​បាន​ចំណេះ​ដឹង​កសិកម្ម​ថ្មី ព័ត៌មាន និង​បច្ចេក​វិទ្យា​សម្រាប់​កសិករ និង​សហគមន៍​ធ្វើ​កសិកម្ម​ត្រូវ​បាន​កំណត់​ទិស​ដៅ​ក្នុង​ការ​បង្កើន​ផលិតភាព​កសិកម្ម​ ការ​ធ្វើ​ពិពិធកម្ម ​ពាណិជ្ជកម្ម និង​ការ​គ្រប់​គ្រង​ធន​ធាន​ធម្មជាតិ​ប្រកប​ដោយ​និរន្តរភាព​។ ​នេះ​បើ​តាម​លោក ​ម៉ាក់ ​សឿន ប្រធាន​នាយកដ្ឋាន​ពង្រីក​កសិកម្ម​។ លោក​បន្ត​ថា​៖ «​ទស្សន​វិស័យ​នៃ​គោលនយោបាយ​នេះ​គឺ​ដើម្បី​ពង្រីក​ និង​កែ​លម្អ​ប្រសិទ្ធភាព​នៃ​ការ​ពង្រីក​កសិកម្ម​ដល់​កសិករ​»។

យោង​តាម​លោក​ម៉ាក់​ សឿន​ ឧបករណ៍​ជា​យុទ្ធសាស្ដ្រ ៥ ត្រូវ​បាន​ដាក់​ចេញ​ដើម្បី​សម្រេច​បាន​ទិសដៅ​នៃ​គោលនយោបាយ​នេះ។

លោក​លើក​ឡើង​ថា​៖ «​ដំបូង​ យើង​ស្វែងរក​ការ​ពង្រឹង​ក្របខ័ណ្ឌ​ច្បាប់​ និង​បទប្បញ្ញត្តិ​លើ​ការ​ពង្រីក​កសិកម្ម​។ ទី២ ការ​ពង្រឹង​សមត្ថភាព​របស់​មន្ដ្រី​ និង​ភ្នាក់​ងារ​ពង្រីក​កសិកម្ម។

ទី៣​ការ​កែ​លម្អ​បច្ចេកទេស​ធ្វើ​កសិកម្ម​ដែល​មាន​តម្លៃ​សមរម្យ​ និង​ជាក់ស្ដែង​សម្រាប់​កសិករ​។ ​ទី៤ ​កែលម្អ​ព័ត៌មាន និង​សារ​លិខិត​ដែល​ត្រូវ​បាន​ផ្ញើ​ចេញ​ទៅ​ដល់​កសិករ​ និង​ចុង​ក្រោយ​គឺជា​យុទ្ធសាស្រ្ដ​នៅ​ក្នុង​ការ​បញ្ជូន​ព័ត៌មាន​ទាំង​នោះ​ទៅ​កសិករ​»​។

ការងារ​នេះ​នឹង​ទាក់ទង​នឹង​ការ​បណ្ដុះ​បណ្ដាល​នៅ​នឹង​កន្លែង​ដល់​កសិករ​ ហើយ​ប្រព័ន្ធ​ផ្សព្វផ្សាយ​ដ៏​ធំ ​និង​បច្ចេកវិទ្យា​នឹង​ត្រូវ​បាន​ប្រើប្រាស់​ក្នុង​ការ​បញ្ជូន​ព័ត៌មាន​ឲ្យ​កសិករ។

លោក ម៉ាក់ សឿន ​ថ្លែង​ថា​ដើម្បី​បំពេញ​គម្លាត​នេះ​ គេ​ត្រូវ​ការ​អ្នក​ឯកទេស​ពង្រីក​កសិកម្ម​យ៉ាង​ហោច​ណាស់​ជាង ២០០០ នាក់ ហើយ​យ៉ាង​ហោច​ណាស់​ត្រូវ​មាន​ភ្នាក់ងារ​ពង្រីក​កសិកម្ម​ពីរ​រូប​សម្រាប់​ឃុំ​មួយ​។

លោក​បញ្ជាក់​ថា​៖ «​បច្ចុប្បន្ន​មាន​មន្ដ្រី​ពង្រីក​កសិកម្ម​ប្រហែល ៧០ នាក់​ប៉ុណ្ណោះ​នៅ​កម្រិត​ជាតិ​ និង​តិច​ជាង ១០០០ នាក់​នៅ​កម្រិត​ក្រោម​ជាតិ ​ដែល​មិន​គ្រប់គ្រាន់​នោះ​ទេ។ ​អ៊ីចឹង​ហើយ​តាម​រយៈ​គោល​នយោបាយ​នេះ​ យើង​សង្ឃឹម​ថា នឹង​ទទួល​បាន​ការ​សហការ​ជាមួយ​ភ្នាក់ងារ​ពង្រីក​កសិកម្ម​មក​ពី​វិស័យ​ឯកជន​ អង្គការ​ក្រៅ​រដ្ឋាភិបាល​ដើ​ម្បី​ធ្វើ​ការងារ​ជាមួយ​គ្នា​ក្នុង​ការ​ធ្វើ​ឲ្យ​ព័ត៌មាន​ទៅ​ដល់​កសិករ​»​។

គោល​នយោបាយ​នេះ​ត្រូវ​បាន​រំពឹង​ថា​នឹង​ចាប់​ផ្ដើម​ដំណើរ​ការ​នៅ​រយៈ​ពេល​ពីរ​ខែ​ក្រោយ​។​ នេះ​បើ​តាម​លោក ​អ៊ាង សុផល្លែត​អ្នក​នាំ​ពាក្យ​ក្រសួង​កសិកម្ម​។

លោក​បន្ត​ថា​៖ «​គោល​នយោបាយ​នេះ​គឺជា​ផែនការ​ដើម្បី​សម្រេច​បាន​ផែន​ការ​អភិវឌ្ឍន៍​វិស័យ​កសិកម្ម​របស់​រដ្ឋាភិបាល​នៅ​ក្នុង​យុទ្ធសាស្ដ្រ​ចតុកោណ។ ​បើ​គ្មាន​គោលនយោបាយ​នេះ​ វា​គឺ​ដូច​ជា​យើង​ចេះ​តែ​ដើរ​ទៅ​មុខ ប៉ុន្តែ​គ្មាន​ទិស​ដៅ​ច្បាស់លាស់​។ គោលនយោបាយ​នេះ​នឹង​ផ្ដល់​គំនិត​កាន់​តែ​ប្រសើរ​សម្រាប់​វិស័យ​ឯក​ជន​ និង​ម្ចាស់​ជំនួយ​ដើម្បី​ជួយ​ដល់​យើង​ដើរ​ឆ្ពោះ​ទៅ​រក​ទិស​ដៅ​»​។

លោក ចាន់ សុផល​ នាយក​មជ្ឈមណ្ឌល​សិក្សា​គោលនយោបាយ យល់​ស្រប​នឹង​ការ​ដាក់​ចេញ​គោល​នយោបាយ​ពង្រីក​កសិកម្ម​នេះ​ ប៉ុន្តែ​លោក​ថ្លែង​ថា​ ការ​អនុវត្ត​គោល​នយោបាយ​នេះ​ប្រកប​ដោយ​ជោគជ័យ​គឺ​អាស្រ័យ​លើ​ធន​ធាន​ដែល​មាន។

លោក​បន្ត​ថា​៖ «​គោលនយោបាយ​ពង្រីក​កសិកម្ម​ដំបូង​របស់​ប្រទេស​កម្ពុជា​ត្រូវ​បាន​គេ​រំពឹង​ថា​នឹង​បង្កើន​លទ្ធភាព​របស់​កសិករ​ក្នុង​ការ​ទទួល​បាន​បច្ចេកវិទ្យា​និង​បង្កើន​ផលិតភាព​របស់​ខ្លួន​។

​គោល​នយោបាយ​នេះ​សង្ឃឹម​ថា​នឹង​លើក​កម្ពស់​គុណភាព​និង​ប្រសិទ្ធ​ភាព​របស់​រដ្ឋាភិបាល និង​សេវា​ពង្រីក​មិន​មែន​រដ្ឋាភិបាល​។​ ការ​អនុវត្ត​ប្រកប​ដោយ​ជោគ​ជ័យ​របស់​​គោល​នយោបាយ​នេះ​នឹង​អាស្រ័យ​លើ​ធនធាន​ដែល​បាន​ផ្ដល់​ដោយ​រដ្ឋាភិបាល​ និង​វិស័យ​មិន​មែន​រដ្ឋាភិបាល​»៕ PB

0

Comments

Please, login or register to post a comment