Search form

Login - Register | FOLLOW US ON

Logo of Phnom Penh Post newspaper Phnom Penh Post - ក្រសួង​បន្ត​ស្នើ​ចិន​ ឲ្យ​បង្កើន​ការ​នាំ​អង្ករ​ពី​កម្ពុជា

Content image - Phnom Penh Post
កម្មករ​កំពុង​លី​ការុង​អង្ករ​ដាក់​គរ​លើ​គ្នា​នៅ​ក្នុង​រោង​ម៉ាស៊ីន​កិន​ស្រូវ​របស់​ក្រុម​ហ៊ុន​ខ្មែរ​ហ្វូត​កន្លង​មក។ ហេង ជីវ័ន

ក្រសួង​បន្ត​ស្នើ​ចិន​ ឲ្យ​បង្កើន​ការ​នាំ​អង្ករ​ពី​កម្ពុជា

ភ្នំពេញៈ បន្ទាប់ពី​កម្ពុជា​នាំចេញ​អង្ករ​ទៅ​ចិន​ចាប់​ផ្ដើម​ធ្លាក់​ចុះ​ចាប់​តាំង​ពី​ខែ មីនា ខណៈ​ម្ចាស់​រោង​ម៉ាស៊ីន​កិន​ស្រូវ​សន្មត ថា ដោយ​សារ​ការ​រឹត​បន្តឹង​កាន់​តែ​ខ្លាំង​លើ​អនាម័យ និង​ភូតគាម​អនាម័យ (SPS) នឹងមាន​រោង​ម៉ាស៊ីន​កិន​ស្រូវ​តែ ២៦​ ប៉ុណ្ណោះ​មាន​សិទ្ធិ​នាំ​ចេញ ក្រសួង​កសិកម្ម​បាន​ប្រកាស​នៅ​សប្ដាហ៍​នេះ​ថា ខ្លួន​កំពុង​បន្ត​បញ្ចុះ​បញ្ចូល​ចិន​ឲ្យ​ទទួល​យក​ការ​នាំ​ចូល​អង្ករ​ពី​កម្ពុជា​បន្ថែម​ទៀត​។

នាយក​ដ្ឋាន​កសិកម្ម​នៃ​ក្រសួង​កសិកម្ម​គឺជា​អ្នក​អនុវត្ត​អនុស្សរណៈ​នៃ​ការ​យោគ​យល់ ​(MoU) ជាមួយ​រដ្ឋបាល​នៃ​ការ​ត្រួត​ពិនិត្យ​គុណភាព អធិការកិច្ច និង​ចតាឡីស័ក របស់​ប្រទេស​ចិន ( AQSIQ) ក្នុង​ការ​ធានា​ឲ្យ​រោង​ម៉ាស៊ីន​កិន​ស្រូវ​កម្ពុជា​ទទួល​សិទ្ធិ​នាំចេញ​តាម​ស្ដង់ដារ​អនាម័យ និង​ភូតគាម​អនាម័យ​របស់​ប្រទេស​ចិន​។​

យោង​តាម​សេចក្ដី​ប្រកាស​របស់​ក្រសួង​ដែល​បាន​ចេញ​កាល​ពី​ថ្ងៃទី​១៩ ខែមេសា ក្រសួង​ផ្ញើ​លិខិត​លើក​ទី​ ២ តាម​រយៈ​អ៊ីមែល​ដើម្បី​បញ្ចុះ​បញ្ចូល AQSIA ឲ្យ​អនុញ្ញាត​ដល់​រោង​ម៉ាស៊ីន​កិន​ស្រូវ​កម្ពុជា កាន់​តែ​ច្រើន​ដើម្បី​មាន​សិទ្ធិ​នាំ​ចេញ​អង្ករ​ទៅ​ទីផ្សារ​ចិន​បន្ថែម​លើ រោង​ម៉ាស៊ីន​កិន​ស្រូវ​២៦​។

ការ​ដាក់​លិខិត​លើក​ទី​ពីរ​នេះ​ធ្វើឡើង​ បន្ទាប់ពី​ក្រសួង​បាន​ផ្ញើលិខិត​លើក​ទី​ ១ ចាប់​តាំង​ពី​ថ្ងៃទី ​២៧ ខែ​ មីនា ប៉ុន្តែ​មិនមាន​ការ​ឆ្លើយ​តប​ពី AQSIQ​។

ទោះបីជា​មិន​មាន​ការ​ឆ្លើយ​តប​ពី AQSIQ ក៏ដោយ ហើយ​ខណៈ​ការ​នាំ​ចេញ​ទៅ​ប្រទេស​ចិន​ដែល​ចាប់​ផ្ដើម​ធ្លាក់​ចុះ​ចាប់​តាំង​ពី​ខែ​មីនា លោក ហ៊ាន វណ្ណហន អនុ​រដ្ឋលេខាធិការ​នៅ​ក្រសួង​កសិកម្ម បាន​ឲ្យ​ដឹង​ក្នុង​ទំព័រ​ហ្វេស​ប៊ុក ​របស់​លោក​ដោយ​បង្ហាញ​ពី​កិច្ច​ខិតខំ​ប្រឹងប្រែង​របស់​ក្រសួង​ក្នុង​ការ​អន្តរាគមន៍​រក​ទីផ្សារ​អង្ករ​ថា ក្រសួង​កំពុង​ទាក់ទង​ប្រទេស​ចិន​ឲ្យ​អនុញ្ញាត​ដល់​រោង​ម៉ាស៊ីន​កិន​ស្រូវ​កាន់​តែ​ច្រើន​ដើម្បី​នាំ​ចេញ​អង្ករ​។

លោក​ថ្លែង​ថា​៖ «​អគ្គនាយកដ្ឋាន​កសិកម្ម សន្យា​ថា​នឹង​បន្ត​អន្តរាគមន៍ ដើម្បី​ទទួល​ការ​ឯកភាព​ពី​ភាគី​ចិន ដើម្បី​ឲ្យ​មាន​ការ​ចូលរួម ពី​[​អ្នក​នាំ​ចេញ​ទាំង​អស់​] ក្នុង​សកម្មភាព​នាំ​ចេញ​អង្ករ​កម្ពុជា ដែល​ជា​ចលករ​ដ៏​ចាំបាច់ មិន​អាច​ខ្វះ​បាន​ក្នុង​ការ​សម្រេច​ជោគជ័យ នៃ​គោល​នយោបាយ​នាំ​ចេញ​អង្ករ​របស់​រាជរដ្ឋាភិបាល​កម្ពុជា​»​។

ស្ថានភាព​នៃ​ការ​នាំ​ចេញ​អង្ករ​របស់​កម្ពុជា​នៅ​តែ​ស្ថិត​ក្នុង​បញ្ហា​ប្រឈម ដែល​ជំរុញ​ឲ្យ​ទស្សន​វិស័យ​សម្រាប់​ឆ្នាំ​ ២០១៧​ ស្ថិត​ក្នុង​សភាព​មិន​ច្បាស់​លាស់ ខណៈ​បណ្តា​ប្រទេស​ដែល​ជា​ទីផ្សារ​ធំៗ​របស់​កម្ពុជា​ បាន​ចាប់​ផ្តើម​រឹត​បន្តឹង​ទៅ​លើ​គុណភាព​កាន់​តែ​ខ្លាំង​ដូច​អឺរ៉ុប និង​ចិន​ជា​ដើម​។

របាយ​ការណ៍​នាំ​ចេញ​អង្ករ​របស់​លេខាធិការដ្ឋាន​ច្រក​ចេញ​ចូល​តែ​មួយ​សម្រាប់​បំពេញ​បែប​បទ​នាំ​ចេញ​អង្ករ បាន​បង្ហាញ​ថា កម្ពុជា​បាន​នាំ​ចេញ​អង្ករ​សរុប​ចំនួន ១៦,៦ ម៉ឺន​តោន​ចាប់ពី​ខែ​មករា ដល់​ខែ​មីនា ឆ្នាំ ២០១៧ កើន​ឡើង​ជិត​ ៣​ ភាគរយ​ពី​ ១៦,២ ម៉ឺន​តោន​ក្នុង​រយៈពេល​ដូច​គ្នា​ឆ្នាំ ២០១៦​។

របាយការណ៍​ដដែល​បង្ហាញ​ថា ការ​នាំ​ចេញ​នៅ​ខែ​មីនា​ឆ្នាំ​នេះ​បាន​ធ្លាក់​ចុះ ​១៦ ភាគរយ​ធៀប​នឹង​ខែមីនា​ឆ្នាំ​មុន ខណៈ​ការ​នាំ​ចេញ​នៅ​ខែ​មករា​កើន​ឡើង ១១ ភាគរយ និង​ខែកុម្ភៈ​កើន​ឡើង ១៧ ភាគរយ ដែល​អ្នក​នៅ​ក្នុង​ឧស្សាហកម្ម​នេះ​ទទូច​ម្តង​ហើយ​ម្តង​ទៀត​ឲ្យ​អាជ្ញាធរ​ពាក់ព័ន្ធ​ត្រូវ​ដោះស្រាយ​បញ្ហា​នេះ​បន្ទាន់​ដោយ​មិន​ត្រូវ​ព្រងើយ​កន្តើយ​នោះ​ទេ បើ​មិន​អ៊ីចឹង​ទេ​ការ​នាំ​ចេញ​អង្ករ​របស់​កម្ពុជា​នឹង​បន្ត​ធ្លាក់ចុះ​ទៀត​៕ LA

0

Comments

Please, login or register to post a comment