ក្រុងឡាវេហ្កាសៈ ក្រុមហ៊ុនទើបបង្កើតថ្មីរបស់ចិន កាលពីថ្ងៃអាទិត្យបានដាក់បង្ហាញរថយន្តគំរូផ្ទាល់របស់ខ្លួន ដោយបានសន្យាផ្តល់ជូនរថយន្តវៃឆ្លាតនិងពិតប្រាកដមួយដល់ទីផ្សារពិភពលោក ចាប់តាំងពីឆ្នាំក្រោយនេះទៅ ដោយមានតម្លៃចាប់ពីប្រមាណ ៤៥ ០០០ដុល្លារ។
រថយន្តគំរូដែលដំណើរការដោយថាមពលអគ្គិសនីដែលត្រូវបានដាក់បង្ហាញដោយក្រុមហ៊ុន Byton ក្នុងពិធីពិព័រណ៍គ្រឿងអេឡិចត្រូនិកប្រើប្រាស់នាទីក្រុង Las Vegas ត្រូវបានចាត់ទុកថាជាម៉ាស៊ីនកុំព្យូទ័រមានកង់ ដែលត្រូវបានបំពាក់បច្ចេកវិទ្យាទំនើបសម្រាប់ការបង្ហាញផ្លូវ កំសាន្ត និងពិនិត្យតាមដានសុខភាពរបស់អ្នកនៅក្នុងរថយន្តនេះ។
ដោយទទួលបានការគាំទ្រពីក្រុមវិនិយោគិនជាង ២០០ លានដុល្លារ រួមទាំងក្រុមហ៊ុនបច្ចេកវិទ្យាដ៏ធំរបស់ចិន Tencent ផងដែរនោះ ក្រុមហ៊ុន Byton គឺជាក្រុមហ៊ុនមួយក្នុងចំណោមក្រុមហ៊ុនថ្មីៗ ដែលបានចូលមកប្រកួតប្រជែងនឹងក្រុមហ៊ុន Tesla ផលិតរថយន្តប្រភេទថ្មី ដែលអាចសម្របខ្លួនសម្រាប់ការបើកបរដោយខ្លួនឯងបាន និងក្រុមហ៊ុនផ្សេងៗទៀត។
លោក Daniel Kirchert ប្រធាននិងជាសហស្ថាបនិកក្រុមហ៊ុនបង្កើតថ្មីដែលមានមូលដ្ឋាននៅទីក្រុងណានជីងនេះ បានថ្លែងថា៖ «នេះគឺជាផលិតផលមួយ ដែលត្រូវបានផលិតឡើងសម្រាប់ពេលអនាគត ដែលអាចបើកបរដោយខ្លួនឯងបាន និងអាចប្រើប្រាស់រួមគ្នាបាន»។
ក្រុមហ៊ុន Byton ដែលដឹកនាំដោយអតីតមន្ត្រីប្រតិបត្តិមកពីក្រុមហ៊ុន Tesla ក្រុមហ៊ុន BMW ក្រុមហ៊ុន Apple និងក្រុមហ៊ុន Google បានឲ្យដឹងថា ក្រុមហ៊ុនរបស់ខ្លួនរំពឹងថា នឹងអាចដាក់បង្ហាញរថយន្តនាពេលអនាគតរបស់ខ្លួន នៅប្រទេសចិននៅឆ្នាំ២០១៩ និងនៅសហរដ្ឋអាមេរិក និងនៅតំបន់អឺរ៉ុបនៅឆ្នាំ ២០២០ខាងមុខនេះ។
លោក Carsten Breitfeld ប្រធាននិងជានាយកប្រតិបត្តិក្រុមហ៊ុននេះ និងជាអតីតប្រធានក្រុមហ៊ុន BMW បានឲ្យដឹងថា៖ «រថយន្តនេះ នឹងក្លាយជារថយន្តទំនើបបំផុតក្នុងទីផ្សារនៅត្រឹមឆ្នាំ ២០១៩ខាងមុខនេះ»។
រថយន្តរបស់ក្រុមហ៊ុន Byton នឹងប្រើប្រាស់បច្ចេកវិទ្យាសម្គាល់មុខ ដើម្បីដោះសោរ និងសម្របខ្លួនតាមអ្នកបើកបរ ហើយផ្តល់មធ្យោបាយផ្សេងទៀត ដើម្បីទំនាក់ទំនងទៅវិញទៅមក ដូចជាការគ្រប់គ្រងសំឡេងដោយប្រើប្រាស់ឧបករណ៍ Amazon Alexa ការស្ទាប និងកាយវិការជាដើម។
រថយន្តនេះនឹងរួមមានការភ្ជាប់សេវា 5G ទៅនឹងកុំព្យូទ័រ Cloud ហើយលើកកម្ពស់ការបំពេញមុខងាររបស់ខ្លួនដោយប្រើប្រាស់បច្ចេកវិទ្យាវៃឆ្លាតសិប្បនិម្មិត។
ក្រុមហ៊ុន Byton បានឲ្យដឹងទៀតថា រថយន្តនេះនឹងអាចបើកបរបានចម្ងាយជាង៥០០គីឡូម៉ែត្រ ក្នុងពេលបញ្ចូលថាមពលម្តង ហើយការបញ្ចូលថាមពលចំណាយពេលពី ១៥ទៅ៣០នាទី៕ AFP/BP