.jpg)
ឈ្មោះ និងឡូហ្គោរបស់ក្រុមហ៊ុន MoneyGram នៅទីក្រុងភ្នំពេញ។ ហេង ជីវ័ន
ក្រុងប៉េកាំងៈ ក្រុមហ៊ុន Ant Financial ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Alibaba បានបង្ខំចិត្តបោះបង់កិច្ចព្រមព្រៀងតម្លៃ ១,២ ពាន់លានដុល្លារ ដើម្បីទិញយកក្រុមហ៊ុនផ្ទេរប្រាក់របស់អាមេរិក MoneyGram បន្ទាប់ពីពុំអាចស្នើសុំការអនុម័តពីក្រុមនិយតករនៅទីក្រុងវ៉ាស៊ីនតោនបាន។
ការសម្រេចរបស់គណៈកម្មាធិការវិនិយោគបរទេស (CFIUS) នឹងបង្កឲ្យមានវិបត្តិមួយចំពោះការជំរុញរបស់លោក Jack Ma ប្រធានក្រុមហ៊ុន Alibaba ចូលទៅកាន់ទីផ្សារហិរញ្ញវត្ថុធំជាងគេរបស់ពិភពលោកមួយនេះ និងដើរតាមវិធានការមួយចំនួនដើម្បីទប់ស្កាត់ការទិញយកក្រុមហ៊ុនរបស់អាមេរិកពីសំណាក់ក្រុមហ៊ុនចិន។
កាលពីថ្ងៃអង្គារក្រុមហ៊ុនទាំង ២ បានរួមគ្នាប្រកាសពីការបញ្ចប់សំណើទិញយកក្រុមហ៊ុននេះដោយលោក Alex Holmes នាយកប្រតិបត្តិក្រុមហ៊ុន MoneyGram ថ្លែងថា៖ «បរិយាកាសភូមិសាស្ត្រនយោបាយបានផ្លាស់ប្តូរខ្លាំងគិតចាប់ពីយើងបានប្រកាសពីដំបូងនូវប្រតិបត្តិការដែលបានស្នើឡើងនេះជាមួយនឹងក្រុមហ៊ុន Ant Financial កាលពីជិតមួយឆ្នាំមុន»។
លោកបានបន្តឲ្យដឹងថា៖ «បើទោះជាមានកិច្ចខិតខំប្រឹងប្រែងខ្លាំងបំផុតរបស់យើងដើម្បីសហការជាមួយនឹងរដ្ឋាភិបាលអាមេរិកក្តី ឥឡូវនេះវាបង្ហាញច្បាស់លាស់ថាគណៈកម្មាធិការ CFI-US នឹងមិនអនុម័តការច្របាច់ក្រុមហ៊ុនបញ្ចូលគ្នានេះទេ»។
កិច្ចព្រមព្រៀងដែលប្រកាសកាលពីឆ្នាំមុននេះត្រូវបានបញ្ជូនទៅគណៈកម្មាធិការ CFIUS ច្រើនដងហើយ តែមិនអាចកាត់បន្ថយក្តីបារម្ភរបស់គណៈកម្មាធិការនេះអំពីសន្តិសុខទិន្នន័យរបស់អតិថិជនអាមេរិកបាន។
ដោយត្រូវបានគ្រប់គ្រងដោយលោក Ma ក្រុមហ៊ុន Ant Financial ដែលផ្តល់សេវាទូទាត់ប្រាក់ចល័ត ផ្តល់កម្ចី និងសេវាឥណទានដល់អតិថិជនចិនភាគច្រើននោះបានពិចារណាពង្រីកអាជីវកម្មនៅបរទេសរួមជាមួយក្រុមហ៊ុន Alibaba ដែលជាគេហទំព័រធ្វើពាណិជ្ជកម្មតាមប្រព័ន្ធអ៊ីនធឺណិតធំជាងគេរបស់ចិន។
ភាគហ៊ុនក្រុមហ៊ុន MoneyGram ដែលចុះបញ្ជីនៅផ្សារហ៊ុន Nasdaq បានធ្លាក់ចុះពេលជួញដូរក្រៅម៉ោង។
លោក Doug Feagin ប្រធានក្រុមហ៊ុន Ant Financial International ឲ្យដឹងក្នុងសេចក្តីថ្លែងការណ៍មួយថាក្រុមហ៊ុនទាំង ២ នឹងនៅតែពិចារណាសហការគ្នាតាមមធ្យោបាយផ្សេងទៀតទោះជាមានឧបសគ្គនេះក្តី។
លោកថ្លែងថា៖ «ដោយសារក្រុមហ៊ុន Ant Financial នឹងមិនមានទំនាក់ទំនងក្នុងនាមជាភាពម្ចាស់កម្មសិទ្ធិផ្ទាល់ជាមួយក្រុមហ៊ុន MoneyGram យើងនឹងទន្ទឹងរង់ចាំសហការយ៉ាងជិតស្និទ្ធជាមួយក្រុមការងាររបស់ក្រុមហ៊ុន MoneyGram ដើម្បីធ្វើឲ្យកម្មវិធីទូទាត់ប្រាក់របស់យើងកាន់តែអាចប្រើប្រាស់បានថែមទៀតជាពិសេសចំពោះសហគមន៍ដែលមិនមានសេវាធនាគារ និងមិនមានសេវាកម្មធនាគារគ្រប់គ្រាន់នៅទូទាំងពិភពលោក»៕ BP
