.jpg)
រថយន្តតាក់ស៊ីGrab ដែលដាក់បង្ហាញក្នុងអំឡុងពេលបើកដំណើរការជាផ្លូវការនៅភ្នំពេញកាលពីខែធ្នូ។ ហុង មិនា
ភ្នំពេញៈ អង្គភាពប្រឆាំងអំពើពុករលួយ (ACU) បានចុះហត្ថលេខាលើអនុស្សរណៈនៃការយោគយល់គ្នា (MoU) ថ្មីពីរជាមួយ Grab ជាក្រុមហ៊ុនហៅតាក់ស៊ីជិះឈានមុខគេ និង Tilleke & Gibbins ជាក្រុមហ៊ុនច្បាប់ក្នុងតំបន់កាលពីរសៀលថ្ងៃចន្ទ ដែលបញ្ជាក់ពីការប្ដេជ្ញាចិត្តរបស់ក្រុមហ៊ុនទាំងក្នុងការប្រឆាំងនឹងអំពើពុករលួយ ឬការសូកប៉ាន់។
លោក ឃាង សេង អនុប្រធាន ACU បានប្រកាសថា កិច្ចព្រមព្រៀងទាំងនេះបាននាំឲ្យមាន MoU ជាច្រើន ដែលអង្គភាពនេះបានចុះហត្ថលេខាសរុប៨៨ ដោយកិច្ចព្រមព្រៀងភាគច្រើនបានចុះជាមួយក្រុមហ៊ុនឯកជន។
ACU រំពឹងថា នឹងចុះហត្ថលេខាលើMoU ចំនួន ៥ បន្ថែមទៀតនៅពេលខាងមុខដ៏ខ្លីនេះ។
លោកថ្លែងដោយជំរុញឲ្យក្រុមហ៊ុនកាន់តែច្រើនចុះកិច្ចព្រមព្រៀងស្រដៀងគ្នានេះថា៖ «ច្បាស់ណាស់ក្រុមហ៊ុនទាំងនេះមានឆន្ទៈដ៏រឹងមាំក្នុងការប្រយុទ្ធប្រឆាំងនឹងអំពើពុករលួយ ហើយនៅពេលនេះក្រុមហ៊ុនទាំងនេះត្រូវបានការពារដោយច្បាប់»។
លោកបន្តថា៖ «ក្នុងពេលឆាប់ៗនេះយើងចង់បង្កើតក្លិបប្រឆាំងអំពើពុករលួយតែមួយគត់ [នៃក្រុមហ៊ុនដែលបានចុះហត្ថលេខាលើMoU ជាមួយ ACU ] ដើម្បីបង្កើនល្បឿនការទទួលយកការប្រឆាំងអំពើពុករលួយនៅក្នុងប្រទេសកម្ពុជា»។
លោក Wee Tang Yee នាយកប្រចាំប្រទេសក្រុមហ៊ុន Grab នៅកម្ពុជា និងថៃ បានថ្លែងថា MoU នេះបានបន្ថែមលើគោលនយោបាយប្រឆាំងអំពើពុករលួយដែលមានស្រាប់រួចហើយរបស់ក្រុមហ៊ុន។
លោកបន្ថែមថា ក្រុមហ៊ុន Grab រំពឹងថា នឹងចុះ MoU ផ្សេងទៀតជាមួយកម្មវិធីអភិវឌ្ឍន៍អង្គការសហប្រជាជាតិ (UNDP) នៅពេលអនាគតដ៏ខ្លីដើម្បីកាត់បន្ថយការបំភាយឧស្ម័នកាបូនឌីអ៊ុកស៊ីតនៅក្នុងប្រទេសកម្ពុជា។
ក្រុមហ៊ុន Grab បានបើកប្រតិបត្តិការនៅក្នុងប្រទេសកម្ពុជាកាលពីចុងខែធ្នូ ឆ្នាំ២០១៧។
Uber ជាដៃគូប្រកួតប្រជែងអន្តរជាតិដ៏សំខាន់របស់ក្រុមហ៊ុន Grab នៅក្នុងទីផ្សារកម្ពុជាដែលបានដំណើរការកាលពីខែកញ្ញាឆ្នាំមុន មិនទាន់បានចុះហត្ថលេខាលើ MoU ណាមួយជាមួយរដ្ឋាភិបាលកម្ពុជាក្រៅពីកិច្ចព្រមព្រៀងដំបូងរបស់ខ្លួនជាមួយក្រសួងសាធារណៈការនិងដឹកជញ្ជូននោះទេ៕LA
