ក្រុងវ៉ាស៊ីនតោនៈ ក្រុមហ៊ុនផលិតបន្ទះឈីបអាមេរិក Qualcomm កាលពីថ្ងៃអង្គារបានដំឡើងការដេញថ្លៃរបស់ខ្លួនទិញយកក្រុមហ៊ុន NXP ដែលជាគូប្រជែងនៅប្រទេសហូឡង់ដល់តម្លៃប្រមាណ ៤៣ ពាន់លានដុល្លារ ខណៈក្រុមហ៊ុនដែលមានមូលដ្ឋាននៅរដ្ឋកាលីហ្វ័រនីញ៉ាមួយនេះ បានងាកចេញពីការផ្តល់តម្លៃទិញយកក្រុមហ៊ុនខ្លួនដោយក្រុមហ៊ុន Broadcom របស់ប្រទេសសិង្ហបុរី។
តម្លៃដេញថ្លៃថ្មីនេះមានតម្លៃ ១២៧,៥០ ដុល្លារក្នុងមួយហ៊ុន និងមានគោលបំណងបំពេញចិត្តភាគហ៊ុនិករបស់ក្រុមហ៊ុន NXP ដែលបានបង្ហាញពីក្តីបារម្ភថា ការផ្តល់តម្លៃរបស់ក្រុមហ៊ុន Qualcomm មានតម្លៃទាបពេក។
តាមរយៈការងាកមកបង្កើតភាពជាដៃគូកាន់តែជិតស្និទ្ធជាមួយនឹងក្រុមហ៊ុន NXP ក្រុមហ៊ុន Qualcomm អាចកាន់តែបង្កភាពលំបាកដល់ក្រុមហ៊ុន Broadcom ដែលបានផ្តល់តម្លៃទិញយកក្រុមហ៊ុននេះក្នុងតម្លៃខ្ពស់បំផុត ១២១ ពាន់លានដុល្លារនោះ បើទោះជាមានការប្រឆាំងពីក្រុមប្រឹក្សាភិបាលរបស់ក្រុមហ៊ុន Qualcomm ក្តី។
ក្រុមហ៊ុន Qualcomm បានចាត់ទុកថាការផ្តល់តម្លៃនេះគឺជា «កិច្ចព្រមព្រៀងច្បាស់លាស់មួយដែលត្រូវបានកែប្រែ» ជាមួយក្រុមហ៊ុន NXP។ បូករួមបំណុលរបស់ក្រុមហ៊ុន NXP តម្លៃនៃកិច្ចព្រមព្រៀងនេះមានចំនួនជាង ៥០ ពាន់លានដុល្លារ។
ការទិញយកក្រុមហ៊ុន NXP បន្ថែមនេះនឹងផ្តល់ផលិតផលច្រើនប្រភេទបន្ថែមទៀត ដូចជាឧបករណ៍សេនស័រ និងឧបករណ៍ដំណើរការទិន្នន័យខ្នាតតូចសម្រាប់បំពាក់ក្នុងគ្រឿងអេឡិចត្រូនិកដែលត្រូវបានតភ្ជាប់ទៅនឹងកុំព្យូទ័រ ដល់ក្រុមហ៊ុន Qualcomm ដែលជាក្រុមហ៊ុនផលិតបន្ទះឈីបដ៏ធំមួយសម្រាប់បំពាក់ក្នុងទូរស័ព្ទទំនើប។
ដោយសំដៅលើបច្ចេកវិទ្យាឥតខ្សែ 4G ដែលនឹងត្រូវបានប្រើប្រាស់នៅទូទាំងពិភពលោកនោះលោក Paul Jacobs ប្រធានក្រុមហ៊ុន Qualcomm បានឲ្យដឹងថា៖ «ក្រុមហ៊ុន NXP គឺជាការទិញយកបែបយុទ្ធសាស្ត្រប្រកបដោយភាពទាក់ទាញមួយចំពោះក្រុមហ៊ុន Qualcomm ដែលនឹងបង្កើនតម្លៃនៃបច្ចេកវិទ្យា 5G នាំមុខគេរបស់យើង»។
លោក Jacobs បានមានប្រសាសន៍ថា៖ «យើងក៏ជឿជាក់ផងដែរថា កិច្ចព្រមព្រៀងដែលត្រូវបានវាយតម្លៃឡើងវិញនេះនឹងផ្តល់ភាពប្រាកដប្រជាទាំងចំពោះភាគហ៊ុនិករបស់ក្រុមហ៊ុន Qualcomm និងភាគហ៊ុនិករបស់ក្រុមហ៊ុន NXP»៕ BP