ក្រុងតូក្យូៈ ក្រុមហ៊ុនជប៉ុន Toshiba បានឲ្យដឹងកាលពីថ្ងៃពុធថា ក្រុមហ៊ុននឹងងាកមករកប្រាក់ចំណេញវិញក្នុងឆ្នាំសារពើពន្ធនេះ ដោយសារការលក់អាជីវកម្មផលិតបន្ទះឈីបរបស់ខ្លួនដែលមានតម្លៃរាប់ពាន់លានដុល្លារ នឹងត្រូវបញ្ចប់ ដែលនឹងជួយស្តារតារាងតុល្យការឡើងវិញ។
ក្រុមហ៊ុនដែលមានមូលដ្ឋាននៅទីក្រុងតូក្យូមួយនេះបានឲ្យដឹងថា បច្ចុប្បន្នក្រុមហ៊ុនរំពឹងពីប្រាក់ចំណេញសុទ្ធចំនួន ៥២០ពាន់លានយ៉េន (៤,៩ពាន់លានដុល្លារ) ក្នុងឆ្នាំសារពើពន្ធដែលនឹងបញ្ចប់នៅខែមីនាខាងមុខនេះ ដោយបានបញ្ចប់ការខាតបង់សរុប ៩៦៦ពាន់លានយ៉េនកាលពីឆ្នាំសារពើពន្ធមុន។
ក្រុមហ៊ុន Toshiba ដែលបានរំពឹងនាពេលថ្មីៗនេះពីការខាតបង់ប្រចាំឆ្នាំនោះ បានធ្វើបច្ចុប្បន្នភាពការព្យាករលទ្ធផលតារាងតុល្យការរបស់ខ្លួន ខណៈក្រុមហ៊ុននេះបានរាប់បញ្ចូលការធ្លាក់ចុះចំណាយលើពន្ធទាក់ទងទៅនឹងការលក់អាជីវកម្មផលិតបន្ទះឈីបដ៏មានតម្លៃទៅក្រុមហ៊ុនភាពជាដៃគូមួយដែលដឹកនាំដោយក្រុមហ៊ុន Bain Capital។
ការដំឡើងការព្យាករនេះក៏ត្រូវបានជំរុញផងដែរដោយការលក់ក្រុមហ៊ុនផលិតថាមពលនុយក្លេអ៊ែរនៅសហរដ្ឋអាមេរិកគឺក្រុមហ៊ុន Westinghouse ដែលក្រុមហ៊ុននេះបានកាត់បន្ថយប្រាក់ចំណេញរបស់ក្រុមហ៊ុន Toshiba អស់រយៈពេលជាយូរមកហើយ ដោយសារការខាតបង់ច្រើនរបស់ក្រុមហ៊ុនថាមពលមួយនេះ។
ក្នុងចំណោមកត្តាផ្សេងៗនៅពីក្រោយការដំឡើងការព្យាករនេះ ក៏មានការបោះផ្សាយភាគហ៊ុនថ្មីចំនួន ២,២៨ពាន់លានដុល្លារកាលពីឆ្នាំមុនផងដែរ ដើម្បីប្រមូលថវិកាសរុបចំនួន ៦០០ពាន់លានយន់ ដែលជាវិធានការមួយមានគោលបំណងជៀសផុតពីការលុបឈ្មោះចេញពីផ្សារហ៊ុនក្រុងតូក្យូដ៏គួរឲ្យអាម៉ាស៕ AFP/BP