Search form

Login - Register | FOLLOW US ON

Logo of Phnom Penh Post newspaper Phnom Penh Post - ក្រុម​ហ៊ុន​ជប៉ុន​វិនិយោគ​ខុនដូ​តម្លៃ​ជាង $២០០​លាន

TOYOKO INN ដែល​ជា​ការ​វិនិយោគ​អចលន​ទ្រព្យ​ដ៏​ធំ​មួយ​នៅ​កម្ពុជា​។ សប្តាហ៍​មុន​ក្រុម​ហ៊ុន Creed Group របស់​ជប៉ុន​ក៏​បើក​គម្រោង​អចលនទ្រព្យ​រាប់​លាន​ដុល្លារ​ផង​ដែរ។
TOYOKO INN ដែល​ជា​ការ​វិនិយោគ​អចលន​ទ្រព្យ​ដ៏​ធំ​មួយ​នៅ​កម្ពុជា​។ សប្តាហ៍​មុន​ក្រុម​ហ៊ុន Creed Group របស់​ជប៉ុន​ក៏​បើក​គម្រោង​អចលនទ្រព្យ​រាប់​លាន​ដុល្លារ​ផង​ដែរ។ ហេង ជីវ័ន

ក្រុម​ហ៊ុន​ជប៉ុន​វិនិយោគ​ខុនដូ​តម្លៃ​ជាង $២០០​លាន

ភ្នំពេញៈ ក្រុម​ហ៊ុន​អភិវឌ្ឍន៍​អចលនទ្រព្យ​ជប៉ុន Creed Group​ បាន​ប្រកាស​កាល​ពី​សប្តាហ៍​មុន​ថា ខ្លួន​នឹង​វិនិយោគ​ទឹក​ប្រាក់​ប្រហែល ​២៤៨​ លាន​ដុល្លារ​ក្នុង​គម្រោង​លំនៅឋាន​បី ដែល​មាន​បន្ទប់​ជាង ២​ ពាន់​នៅ​ទីក្រុង​ភ្នំពេញ​ក្នុង​ពេល​ ៣ ​ឆ្នាំ​ខាង​មុខ​។

យោង​តាម​ លោក ហេង ពណ្ណរាយ អ្នក​គ្រប់​គ្រង​ផ្នែក​អភិវឌ្ឍន៍​ពាណិជ្ជកម្ម​ប្រចាំ​ក្រុម​ហ៊ុន Creed បាន​ថ្លែង​ថា​ គម្រោង​ខុនដូ Bodaiju Residences ដែល​មាន​ទីតាំង​នៅ​ជិត​ព្រលាន​យន្ត​ហោះ​ភ្នំពេញ ជាមួយ​នឹង​ទឹក​ប្រាក់​វិនិយោគ​ចំនួន ​១៣៤​ លាន​ដុល្លារ​អាមេរិក​ និង​មាន ​៩២៨​បន្ទប់​នេះ នឹង​ជា​គម្រោង​លើក​ដំបូង​ដែល​នឹង​ត្រូវ​ចាប់​ផ្តើម​ដំណើរ​ការ​។​ ការ​សាង​សង់​គ្រោង​ចាប់​ផ្ដើម​ក្នុង​ខែ​នេះ ហើយ​នឹង​បញ្ចប់​នៅ​ខែ​ធ្នូ ​ឆ្នាំ​ ២០១៧​។

លោក​មាន​ប្រសាសន៍​ថា​៖ «​យើង​គិត​ថា​ មាន​តម្រូវ​ការ​ខ្ពស់​សម្រាប់​គម្រោង​ខុនដូ Bodaiju ​ដោយ​សារតែ​ខុន​ដូ​របស់​យើង​មិន​មែន​មាន​ទីតាំង​នៅ​ក្នុង​ទីក្រុង​»។ ​លោក​បន្ត​ថា​៖ «​ខុនដូ​របស់​យើង​មាន​ទីតាំង​នៅ​ក្រៅ​ព្រលាន​យន្ត​ហោះ​»។

លោក​ ហេង ពណ្ណរាយ បាន​ថ្លែង​ថា គម្រោង​ខុនដូ Bodaiju នឹង​ផ្តោត​លើ​អ្នក​ទិញ​អចលនទ្រព្យ​ជា​ជន​បរទេស ពោល​គឺ​ម្ចាស់​រោងចក្រ​ និង​អ្នក​គ្រប់គ្រង​រោងចក្រ​ជាន់​ខ្ពស់ ជា​ពិសេស​រោង​ចក្រ​ទាំង​នោះ​មាន​ទីតាំង​នៅ​ក្នុង​តំបន់​សេដ្ឋកិច្ច​ពិសេស​ភ្នំពេញ​ ដែល​មាន​ទីតាំង​នៅ​ជិត​នឹង​ព្រលាន​យន្ត​ហោះ​ផង​ដែរ​។

យោង​តាម​លោក ហេង ពណ្ណរាយ ខុនដូ​ដែល​មាន​មួយ​បន្ទប់ ពីរ​បន្ទប់ និង​បី​បន្ទប់​នេះ នឹង​ច្របាច់​បញ្ចូល​គ្នា​នូវ​ស្ថាបត្យកម្ម​បារាំង​ និង​ជប៉ុន​ ហើយ​តម្លៃ​លក់​សុទ្ធ​ជា​មធ្យម​សម្រាប់​គម្រោង​ខុនដូ Bodaiju នឹង​មាន​តម្លៃ​ ១ ៦០០​ ដុល្លារអា​មេរិក​ក្នុង​មួយ​ម៉ែត្រ​ការ៉េ​។

លោក ពណ្ណរាយ បាន​ថ្លែង​ថា គម្រោង​ពីរ​ផ្សេង​ទៀត​គឺ​គម្រោង Arata Garden Residences និង​គម្រោង Maha Sem Sok នឹង​ចំណាយ​ប្រាក់​ប្រហែល ​១១៤ ​លាន​ដុល្លារ​អាមេរិក​ និង​មាន​ទីតាំង​នៅ​កាន់​តែ​ជិត​ទីក្រុង​ជាង ប៉ុន្តែ​នៅ​តែ​នៅ​ជាយ​ក្រុង​ភ្នំពេញ​ដដែល។ ​ការ​អភិវឌ្ឍ​ទាំង​នេះ​នឹង​ជា​គម្រោង​លំនៅឋាន​ដែល​មាន​តម្លៃ​សមរម្យ​ផ្តោត​អ្នក​ទិញ​ជនជាតិ​កម្ពុជា​មាន​ប្រាក់​ចំណូល​គ្រប់​លំដាប់​ថ្នាក់។​

លោក​បន្ថែម​ថា​ ព័ត៌មាន​បន្ថែម​នឹង​មាន​នៅ​ខែ​ក្រោយ។

លោក អ៊ឹម ឈុនលឹម រដ្ឋ​មន្ដ្រី​ក្រសួង​រៀបចំ​ដែន​ដី នគរូបនីយកម្ម​ និង​សំណង់​បាន​ថ្លែង​នៅ​ក្នុង​សេចក្ដី​ប្រកាស​ព័ត៌មាន​បន្ទាប់​ពី​សេចក្តី​ប្រកាស​របស់​ក្រុមហ៊ុន​ កាល​ពី​ថ្ងៃ​ ព្រហស្បតិ៍ ​ថា​៖ «​កំណើន​វិនិយោគិន​ឯក​ជន​ជប៉ុន [​ក្នុង​ប្រទេស​កម្ពុជា] កំពុង​ឆ្លុះ​បញ្ចាំង​ពី​ទំនុក​ចិត្ត​ចំពោះ​គោល​នយោបាយ​បើក​ចំហ​សេដ្ឋកិច្ច ស្ថិរភាព​នយោបាយ និង​កំណើន​សេដ្ឋកិច្ច​រយៈ​ពេល​វែង​របស់​កម្ពុជា​ ដែល​ទំនាក់​ទំនង​សេដ្ឋកិច្ច​ក្នុង​តំបន់​អាស៊ាន នឹង​មាន​ការ​រីក​ចម្រើន​ទៅ​មុខ​ដោយ​រលូន​ នៅ​ពេល​សមាហរណ​កម្ម​សេដ្ឋ​កិច្ច​អាស៊ាន​កើត​មាន​ឡើង​នៅ​ចុង​ឆ្នាំ​នេះ»។

លោក សឹង ប៊ុណ្ណា នាយក​ក្រុម​ហ៊ុន ប៊ុណ្ណា រៀល​ធីគ្រុប បាន​ស្វាគមន៍​ដល់​ការ​បន្ថែម​ក្រុម​ហ៊ុន​អភិវឌ្ឍន៍​អចលនទ្រព្យ​ក្នុង​ទីផ្សារ ប៉ុន្តែ​លោក​បាន​ព្រមាន​ថា ក្រុម​ហ៊ុន​អចលនទ្រព្យ​ នានា​ត្រូវ​វាយ​តម្លៃ​ទីផ្សារ​ដោយ​ប្រុង​ប្រយ័ត្ន​ដើម្បី​ធានា​ឲ្យ​ប្រាកដ​ថា តម្រូវ​ការ​ពិត​ជា​មាន​មែន។

ក្រុម​ហ៊ុន​អភិវឌ្ឍន៍​អចលនទ្រព្យ​ចាំបាច់​ត្រូវ​ដឹង​ពី​ទំហំ​និង​លទ្ធ​ភាព​ទីផ្សារ​ក្នុង​ស្រុក​របស់​ពួក​គេ​ និង​វាយ​តម្លៃ​ថា​តើ​ពួក​គេ​អាច​ទាក់​ទាញ​វិនិយោគិន​បរទេស​បាន​ដែរ ឬ​យ៉ាង​ណា?

លោក​បាន​លើក​ឡើង​ថា​៖ «​ដូច្នេះ​ប្រសិន​បើ​ក្រុម​ហ៊ុន​អភិវឌ្ឍ​អាច​លក់​យ៉ាង​ហោច​ណាស់ ៥០​ ភាគ​រយ​នៃ​ការ​ចំណាយ​ការ​អភិវឌ្ឍ​លំនៅឋាន​របស់​ខ្លួន​ទៅ​ឲ្យ​វិនិយោគិន​បរទេស​ នៅ​ពេល​នោះ​ខ្ញុំ​គិត​ថា​ ពួក​គេ​នឹង​មាន​តម្រូវ​ការ​ថ្មី​ ដែល​មាន​ន័យ​ថា​វា​នឹង​ល្អ​ប្រសើរ​»​។

លោក​មាន​ប្រសាសន៍​បន្ត​ថា​៖ «​ក្រុមហ៊ុន​អភិវឌ្ឍន៍​ជាច្រើន​ ពួក​គេ​ចូល​មក និង​រៀបចំ​ផែន​ការ​ថា កម្ពុជា​មាន​តម្រូវ​ការ​អចលនទ្រព្យ​ច្រើន​ ប៉ុន្តែ​ ទីផ្សារ​ក្នុង​ស្រុក​នៅ​ពេល​នេះ​គឺ​ពេញ​ហើយ​។ បច្ចុប្បន្ន ​ទីផ្សារ​មាន​ទំហំ​តូច​ណាស់​»៕ LA

0

Comments

Please, login or register to post a comment

ព័ត៌មានពាក់ព័ន្ធ