Search form

Login - Register | FOLLOW US ON

Logo of Phnom Penh Post newspaper Phnom Penh Post - ចរាចរណ៍​ទំនិញ​តាម​កំពង់ផែ​ បាន​កើនឡើង​តិចតួច

Content image - Phnom Penh Post
ទិដ្ឋភាព​កំពង់ផែ​ក្រុង​ព្រះសីហនុ​នាពេល​កន្លង​មក។ ហេង ជីវ័ន

ចរាចរណ៍​ទំនិញ​តាម​កំពង់ផែ​ បាន​កើនឡើង​តិចតួច

ភ្នំពេញៈ ចរាចរណ៍​ទំនិញ​ឆ្លង​កាត់​តាម​កំពង់ផែ​សំខាន់​ពីរ​របស់​កម្ពុជា​ឆ្នាំ ២០១៦ មាន​កំណើន​តិចតួច ទោះបី​កម្ពុជា​មាន​លទ្ធភាព​នាំ​ចេញ​កាន់តែ​ច្រើន​ក៏ដោយ។ នេះ​បើ​តាម​របាយការណ៍។

ខណៈ​កំពង់ផែ​ទាំង​ពីរ​តែង​ទទួល​កំណើន​ចរាចរណ៍​ទំនិញ​សរុប​ជាង ១០ ភាគរយ​ប្រចាំ​ឆ្នាំ​កាលពី​ឆ្នាំ ២០១៥ អត្រា​កំណើន​របស់​កំពង់ផែ​នីមួយៗ​កាលពី​ឆ្នាំ​មុន​សម្រេច​បាន​ក្រោម ៥ ភាគរយ។

តួលេខ​ពី​កំពង់ផែ​ស្វយ័ត​ក្រុង​ព្រះសីហនុ (SAP) ដែល​ភ្នំពេញ​ប៉ុស្ដិ៍​បាន​ទទួល​កាលពី​ថ្ងៃ​ម្សិលមិញ​បាន​បង្ហាញ​ថា​ទំនិញ​នាំ​ចូល-នាំ​ចេញ​សរុប​តាម​កំពង់ផែ​មាន​សរុប ៤០០ ១៨៧ TEU កាលពី​ឆ្នាំ ២០១៦ កើនឡើង​ត្រឹម​តែ ២,១៤ ភាគរយ​ធៀប​នឹង​ឆ្នាំ ២០១៥។ ដោយឡែក​តួលេខ​ពី​កំពង់ផែ​ស្វយ័ត​ក្រុង​ភ្នំពេញ (PPAP) បាន​បង្ហាញ​ថា​មាន​ចំនួន ១៥១ ៧៨១ TEU កើនឡើង​តែ ៤,៨ ភាគរយ​ប៉ុណ្ណោះ​ធៀប​នឹង​ឆ្នាំ ២០១៥។

លោក លូ គឹមឈន់ អគ្គនាយក SAP បាន​ឲ្យ​ដឹង​កាលពី​ម្សិលមិញ​ថា​កំណើន​យឺត​នា​ពេល​នេះ​មិន​បង្ក​ជា​ក្តីបារម្ភ​ដល់​ស្ថានភាព​សេដ្ឋកិច្ច​នោះ​ទេ ដោយ​លោក​អះអាង​ថា​អត្រា​កំណើន​នេះ​គឺ​ដូច​គ្នា​នឹង​ប្រតិបត្តិការ​កំពង់ផែ​អន្តរជាតិ​ផ្សេង​ទៀត​នៅ​ក្នុង​ប្រទេស​អភិវឌ្ឍន៍​ដែរ។

លោក​ពន្យល់​ថា​កំណើន​យឺត​កាល​ពី​ឆ្នាំ ២០១៦ ក៏ដោយសារ​កំពង់ផែ​បាន​ទទួល​កំណើន​ខ្ពស់​ខ្លាំង​កាលពី​ឆ្នាំ​ ២០១៥ ដែល​មាន​កំណើន​រហូត​ដល់ ១៨ ភាគរយ​ហើយ​ចំនួន​ដ៏ធំ​ស្រាប់​នេះ​បាន​បន្ទាប​អត្រា​កំណើន​នៅ​ឆ្នាំ ២០១៦។

លោក​បញ្ជាក់​ថា​មាន​សញ្ញា​ដ៏ល្អ​ដែល​ថា​សមត្ថភាព​នាំ​ចេញ​របស់​កម្ពុជា​កំពុង​កើនឡើង ហើយ​វា​ឆ្លុះ​បញ្ចាំង​ពី​ការ​ផលិត​ខ្លាំង​ជាង​មុន​នៅ​ក្នុង​ប្រទេស​នេះ។

លោក​បន្ត​ថា៖ «កាលពី​ឆ្នាំ​មុនៗ យើង​តែង​សង្កេត​ឃើញ​ថា​ការ​នាំ​ចូល​មាន​ចំនួន​ច្រើន​ជាង​ការ​នាំ​ចេញ​ឆ្ងាយ​ណាស់។ ប៉ុន្តែ​នៅ​ពេល​នេះ​យើង​មើល​ឃើញ​ថា​ការ​នាំ​ចេញ​ទំនិញ​គឺ​កើនឡើង​ច្រើន​ហើយ​បរិមាណ​ស្ទើរតែ​លើស​ការ​នាំ​ចូល​ដែល​កត្តា​នេះ​បង្ហាញ​ថា​ផលិតកម្ម​ក្នុង​ស្រុក​យើង​មាន​សមត្ថភាព​ជាង​មុន»។

ក្នុង​ចំណោម​ការ​ចរាចរ​ទំនិញ​ចេញ-ចូល​សរុប​តាម SAP កាលពី​ឆ្នាំ​មុន​ចំនួន​ទំនិញ​នាំ​ចេញ​មាន​ចំនួន ២០១ ៦៧៨ TEU កើនឡើង ៣ ភាគរយ​ធៀប​នឹង​ឆ្នាំ ២០១៥ ខណៈ​ការ​នាំ​ចូល​ទំនិញ​មាន​ចំនួន ១៩៨ ៥០៩ TEU កើនឡើង​តែ ១,៣ ភាគរយ​ប៉ុណ្ណោះ។ សម្រាប់ PPAP ការ​នាំ​ចេញ​ទំនិញ​មាន​ចំនួន​សរុប ៧៦ ៨០៦ TEU កើនឡើង ៧,៥ ភាគរយ​ធៀប​នឹង​ឆ្នាំ ២០១៥ ខណៈ​ចំនួន​ទំនិញ​នាំ​ចូល​កើនឡើង​ត្រឹម​តែ ០,៨ ភាគរយ​ប៉ុណ្ណោះ។

តាម​ទិន្នន័យ​របស់​កំពង់ផែ​ទាំង​ពីរ​កម្ពុជា​បាន​នាំ​ចូល​ភាគច្រើន​សម្ភារ​សំណង់ សម្លៀកបំពាក់​ថ្មី អាហារ និង​ភេសជ្ជៈ ខណៈ​ប្រទេស​នេះ​នាំ​ចេញ​សម្ភារ​រួមមាន សម្លៀកបំពាក់ និង​ស្បែកជើង អង្ករ និង​ផលិតផល​កសិកម្ម​ផ្សេង​ទៀត។

លោក គង់ ភោគ សហស្ថាបនិក និង​ប្រធាន​វិទ្យាស្ថាន​កម្ពុជា​សម្រាប់​ការ​សិក្សា​យុទ្ធសាស្រ្ត (CISS) បាន​ឲ្យ​ដឹង​កាលពី​ម្សិលមិញ​ថា​មាន​កត្តា​សំខាន់ៗ​ជាច្រើន​ដែល​អាច​ធ្វើ​ឲ្យ​ការ​នាំ​ចូល​ទំនិញ​តាម​កំពង់ផែ​បាន​ថយ​ចុះ​ដែល​ទាមទារ​ឲ្យ​មាន​ការ​សិក្សា​ជាមុន​ដើម្បី​ផ្តល់​ការ​វិភាគ​បាន​ត្រឹមត្រូវ។

យ៉ាង​ណា​ក៏ដោយ លោក​បាន​លើក​ឡើង​ថា​ការ​បង្កើន​ការ​នាំចេញ​របស់​កម្ពុជា​ទៅ​ក្រៅ​ប្រទេស​គឺជា​ការ​ល្អ។ លោក​ថ្លែង​ថា៖ «រោងចក្រ​មកពី​ប្រទេស​ចិន និង​ជប៉ុន​បាន​កើនឡើង​គួរ​ឲ្យ​កត់សម្គាល់​នៅ​ក្នុង​ប្រទេស​របស់​យើង​ហើយ​ផលិតផល​ទាំង​នេះ​អាច​បង្កើន​ទំហំ​នាំ​ចេញ​របស់​ផលិតផល​កម្ពុជា»។

លោក​បាន​បន្ត​ឲ្យ​ដឹង​ទៀត​ថា៖ «ផលិតកម្ម​នៅ​តាម​ប្រទេស​ជិត​ខាង​យើង​ដូចជា ថៃ និង​វៀតណាម​ជាដើម​ក៏​កំពុង​អភិវឌ្ឍ​ដែរ​ហើយ​ទំនិញ​ពី​ប្រទេស​ទាំង​នេះ​អាច​ដឹក​ជញ្ជូន​មក​ប្រទេស​យើង​តាម​ផ្លូវគោក​ជំនួស​ឲ្យ​តាម​កំពង់ផែ»។

លោក ស៊ិន ចន្ធី ប្រធាន​សមាគម​ក្រុមហ៊ុន​ដឹក​ជញ្ជូន​ទំនិញ​កម្ពុជា (CAMFFA) បាន​ឲ្យ​ដឹង​កាលពី​ម្សិលមិញ​ថា​សមាជិក​នៅក្នុង CAMFFA កាលពី​ឆ្នាំ​មុន​ផ្ដល់​សេវា​បញ្ជូន​ទំនិញ​សម្រាប់​ការ​នាំ​ចេញ​ច្រើន​ជាង​ការ​នាំ​ចូល​ភាគច្រើន​ផលិតផល​សម្លៀកបំពាក់ និង​ស្បែកជើង។ ខណៈ​លោក ចន្ធី បាន​អង្កេត​ឃើញ​ពី​តម្រូវការ​យឺត​នៃ​សេវា​បញ្ជូន​ទំនិញ​កាលពី​ដើម​ឆ្នាំ​នេះ លោក​រំពឹង​ថា​តម្រូវការ​នឹង​ចាប់​ផ្ដើម​កើនឡើង​ពី​ខែ​មេសា​ទៅ។ លោក​បន្ត​ថា៖ «យើង​មិន​ឃើញ​សញ្ញា​អវិជ្ជមាន​ណា​មួយ​នោះ​ទេ ដូច្នេះ​យើង​រំពឹង​ថា​តម្រូវការ​សេវា​បញ្ជូន​ទំនិញ​សម្រាប់​ការ​នាំ​ចេញ និង​នាំ​ចូល​ក្នុង​ឆ្នាំ ២០១៧ នឹង​កើនឡើង​ច្រើន​ក្នុង​ឆ្នាំ ២០១៧»។

PPAP បាន​ចុះ​បញ្ជី​ក្នុង​ផ្សារហ៊ុន​កម្ពុជា​កាលពី​ខែ​ធ្នូ​ឆ្នាំ ២០១៥ ហើយ​បើ​យោង​តាម​របាយការណ៍​ហិរញ្ញវត្ថុ​របស់​ក្រុមហ៊ុន​ចេញ​ផ្សាយ​កាលពី​ម្សិលមិញ​ក្រុមហ៊ុន​បាន​ទទួល​ប្រាក់​ចំណេញ​សុទ្ធ (ប្រាក់​ចំណេញ​បន្ទាប់ពី​កាត់​ពន្ធ​រួច) ៤,០៨ លាន​ដុល្លារ​កើនឡើង ២៨ ភាគរយ​កាលពី​ឆ្នាំ ២០១៥។

SAP ដែល​ជា​ក្រុមហ៊ុន​កំពង់ផែ​ធំ​ជាង​គេ​របស់​កម្ពុជា​នៅ​មិន​ទាន់​ចុះ​បញ្ជី​ក្នុង​ផ្សារហ៊ុន​កម្ពុជា​នៅ​ឡើយ​ទេ តែ​បើ​យោង​តាម​តំណាង​ក្រុមហ៊ុន​កាលពី​ម្សិលមិញ​ក្រុមហ៊ុន SAP គ្រោង​នឹង​ចុះ​បញ្ជី​នៅ​ផ្សារហ៊ុន​កម្ពុជា​នៅ​ក្នុង​អំឡុង​ឆមាស​ទី​មួយ​ឆ្នាំ ២០១៧ នេះ៕ LA

0

Comments

Please, login or register to post a comment