ក្រុងប៉េកាំងៈ សមាគមដែករ៉ែដែក និងដែកថែបចិន (CIS-A) បានឲ្យដឹងកាលពីថ្ងៃអង្គារថា សមាគមរបស់ខ្លួនពេញចិត្តចំពោះការសម្រេចរបស់គណៈកម្មាធិការពាណិជ្ជកម្មអន្តរជាតិអាមេរិក (USITC) ដែលបានបញ្ចប់ករណីប្រឆាំងនឹងការប្រកបអាជីវកម្មផ្តាច់មុខ។
សេចក្តីថ្លែងការណ៍របស់សមាគម CISA បានធ្វើឡើងនៅថ្ងៃទី ១៩ ខែមីនា បន្ទាប់ពីគណៈកម្មាធិការ USITC បានសម្រេចបញ្ចប់ករណីស៊ើបអង្កេតលើការនាំចូលផលិតផលដែករបស់ចិនពីបទរំលោភបំពានច្បាប់ប្រឆាំងនឹងការប្រកបអាជីវកម្មផ្តាច់មុខដែលត្រូវបានចោទប្រកាន់ទៅតាមមាត្រា ៣៣៧។
គណៈកម្មាធិការ USITC បានចាប់ផ្តើមស៊ើបអង្កេតនេះ បន្ទាប់ពីទទួលបានបណ្តឹងពីឧស្សាហកម្មផលិតដែករបស់សហរដ្ឋអាមេរិកនៅឆ្នាំ ២០១៦ ដែលបានរាយការណ៍ពីករណីមិនស្មើភាពចំនួន ៣ ករណីពោលគឺជាផែនការសម្ងាត់មួយ ដើម្បីកំណត់តម្លៃ និងគ្រប់គ្រងទិន្នផល និងទំហំនាំចេញ ភាពមិនប្រក្រតី និងការប្រើប្រាស់ការសម្ងាត់ផ្នែកពាណិជ្ជកម្មរបស់ដែកសហរដ្ឋអាមេរិក ព្រមទាំងការកំណត់មិនត្រឹមត្រូវពីប្រភពដើម ឬក្រុមហ៊ុនផលិតកម្ម។
គណៈកម្មាធិការ USITC បានឲ្យដឹងថា គណៈកម្មាធិការរបស់ខ្លួនបានរកឃើញថា ឧស្សាហកម្មផលិតដែករបស់អាមេរិក បរាជ័យក្នុងការបង្ហាញហេតុផល ឬបង្ហាញពីផលប៉ះពាល់នៃការប្រកបអាជីវកម្មផ្តាច់មុខ។ សមាគម CISA បានឲ្យដឹងថា បន្ទាប់ពីទទួលបានបណ្តឹងមួយចំនួនរួចហើយ អង្គភាពរបស់ខ្លួនបានរៀបចំឲ្យក្រុមហ៊ុនដែកចិនឆ្លើយតបយ៉ាងសកម្មចំពោះបណ្តឹងទាំងនេះ និងទទួលបានជោគជ័យចំពោះការចោទប្រកាន់ទាំង ៣ ករណីនេះ បន្ទាប់ពីមានកិច្ចខិតខំប្រឹងប្រែងរយៈពេល ២០ ខែមក៕ P.Daily/BP