ភ្នំពេញៈ ក្រុមហ៊ុនឯកជន ២ ដែលចុះបញ្ជីក្នុងផ្សារហ៊ុនកម្ពុជាកាលពីថ្ងៃម្សិលមិញបានបង្ហាញរបាយការណ៍ចំណូល និងប្រាក់ចំណេញសម្រាប់ត្រីមាសទី ៤ ឆ្នាំ ២០១៧ បន្ទាប់ពីក្រុមហ៊ុនគ្រប់គ្រងដោយរដ្ឋ ២ បានចេញពីចុងសប្តាហ៍មុន។
សម្រាប់ក្រុមហ៊ុនតំបន់សេដ្ឋកិច្ចពិសេសភ្នំពេញ (PPSEZ) កំណើននៃការទិញដី និងជួលរយៈពេលវែងរបស់ក្រុមហ៊ុននេះ បានជំរុញឲ្យចំណូលរបស់ក្រុមហ៊ុនដែលចុះបញ្ជីក្នុងផ្សារហ៊ុនកម្ពុជាមួយនេះកើនឡើងជិត ៥០ ភាគរយនៅត្រីមាសទី ៤ ឆ្នាំ ២០១៧។
របាយការណ៍បង្ហាញថា នៅត្រីមាសទី ៤ ឆ្នាំ ២០១៧ ក្រុមហ៊ុនទទួលបានប្រាក់ចំណូល ៣,៣ លានដុល្លារកើនពី ២,២ លានដុល្លារធៀបនឹងរយៈពេលដូចគ្នាក្នុងឆ្នាំ ២០១៦។ ដោយឡែកប្រាក់ចំណេញសុទ្ធក្នុងអំឡុងពេលនេះបានកើនឡើងជាង ៣៨៨ ភាគរយដល់ជាង ៩៤ ម៉ឺនដុល្លារ គឺកើនពីជាង ២១ ម៉ឺនដុល្លារក្នុងឆ្នាំ ២០១៦។ នេះបើតាមរបាយការណ៍។
លោកស្រី លឹម ឈីវហូរ ប្រធានក្រុមប្រឹក្សាភិបាល PPSEZ បានលើកឡើងនៅក្នុងសេចក្តីថ្លែងការណ៍ថា ឆ្នាំ ២០១៧ ក្លាយជាឆ្នាំដែលមានការប្រកួតប្រជែងមួយផ្សេងទៀតរបស់ក្រុមហ៊ុន។
លោកស្រីថ្លែងថា៖ «យើងកំពុងអភិវឌ្ឍតំបន់សេដ្ឋកិច្ចពិសេសថ្មីលើផ្ទៃដី ៦៦ ហិកតានៅក្រុងប៉ោយប៉ែតដែលនឹងត្រូវដំណើរការដោយក្រុមហ៊ុនបុត្រសម្ព័ន្ធរបស់យើង»។ លោកស្រីបន្តថា៖ «ក្រុងប៉ោយប៉ែតមានទីតាំងស្ថិតនៅជិតច្រកពាណិជ្ជកម្ម Leam Chabang ដែលជាច្រកពាណិជ្ជកម្មដ៏ធំសម្បូរបែប និងជាកំពង់ផែអន្តរជាតិរបស់ប្រទេសថៃផងដែរ»។
លោកស្រីបន្ថែមថា តំបន់សេដ្ឋកិច្ចពិសេសថ្មីនេះមានបំណងទាក់ទាញឧស្សាហកម្មរថយន្ត និងគ្រឿងអេឡិចត្រូនិកក្នុងការផ្លាស់ប្តូរ ឬបើកខ្សែចង្វាក់ផលិតកម្មថ្មី ដើម្បីគាំទ្រដល់ការបើករោងចក្រដំឡើងរថយន្តនៅប្រទេសថៃ។
ដោយឡែកក្រុមហ៊ុនរោងចក្រកាត់ដេរសម្លៀកបំពាក់របស់តៃវ៉ាន់តែមួយគត់ដែលចុះបញ្ជីក្នុងផ្សារហ៊ុនកម្ពុជាបង្ហាញពីការធ្លាក់ចុះប្រាក់ចំណូល ២ ភាគរយនៅឆ្នាំ ២០១៧ ធៀបនឹងឆ្នាំ ២០១៦ ខណៈប្រាក់ចំណេញធ្លាក់ចុះជិត ៩០ ភាគរយ។ នេះបើយោងតាមរបាយការណ៍ហិរញ្ញវត្ថុដែលបានចេញផ្សាយនៅលើផ្សារហ៊ុនកម្ពុជាម្សិលមិញ។
របាយការណ៍បង្ហាញថា សម្រាប់រយៈពេល ១២ ខែ គិតត្រឹមថ្ងៃទី ៣១ ខែធ្នូ ឆ្នាំ ២០១៧ ក្រុមហ៊ុន ហ្គ្រេនធ្វីន ទទួលបានចំណូលសរុបជាង ៨១ លានដុល្លារ ធ្លាក់ចុះ ២ ភាគរយធៀបនឹងឆ្នាំ ២០១៦។
ការធ្លាក់ចុះប្រាក់ចំណូលនេះបានធ្វើឲ្យប្រាក់ចំណេញសុទ្ធក្រោយបង់ពន្ធរបស់ក្រុមហ៊ុនបានធ្លាក់ចុះ ៨៧,៤៩ ភាគរយដោយទទួលបានតែជាង ៦៦ ម៉ឺនដុល្លារប៉ុណ្ណោះ។
ក្នុងត្រីមាសទី ៤ ឆ្នាំ២០១៧ ហ្គ្រេនធ្វីន ទទួលបានចំណូលសរុបជាង ១៧ លានដុល្លារធ្លាក់ចុះ ៩,៥៤ ភាគរយធៀបរយៈពេលដូចគ្នាឆ្នាំ ២០១៦។
សហគ្រាសគ្រប់គ្រងដោយរដ្ឋចំនួន ២ ទើបតែបានចេញរបាយការណ៍ហិរញ្ញវត្ថុត្រីមាសទី ៤ និងរបាយការណ៍ឆ្នាំ ២០១៧ ផងដែរ។ បច្ចុប្បន្នមានក្រុមហ៊ុនចុះបញ្ជីក្នុងផ្សារហ៊ុនចំនួន ៥ ក្នុងនោះក្រុមហ៊ុនឯកជន ២ និងសហគ្រាសគ្រប់គ្រងដោយរដ្ឋចំនួន ៣៕