.jpg)
ឡូហ្គោរបស់ក្រុមហ៊ុន Facebook ដែលកំពុងរងរឿងអាស្រូវលួចទិន្នន័យ។ រូបថត AFP
ក្រុងវ៉ាស៊ីនតោនៈ លោកស្រី Vera Jourova ស្នងការទទួលបន្ទុកផ្នែកយុត្តិធម៌អឺរ៉ុបបានរំឭកកាលពីថ្ងៃពុធថា រឿងអាស្រូវលួចទិន្នន័យ ដូចជាករណីក្រុមហ៊ុន Facebook ដែលបានបង្កការខូចខាតច្រើននាពេលថ្មីៗនេះនឹងក្លាយជា «ការចំណាយដ៏ច្រើន» សម្រាប់ក្រុមហ៊ុននានាចាប់ពីខែឧសភាខាងមុខនេះស្ថិតក្រោមច្បាប់របស់សហភាពអឺរ៉ុប។
លោកស្រី Jourova ដែលទទួលបន្ទុកផ្នែកការពារទិន្នន័យរបស់អ្នកប្រើប្រាស់ និងទិន្នន័យបុគ្គលនោះបានឲ្យដឹងនៅពេលបញ្ចប់ដំណើរទស្សនកិច្ចទៅកាន់ទីក្រុងវ៉ាស៊ីនតោនថា៖ «បើក្រុមហ៊ុនមួយចំនួនព្យាយាមធ្វើបែបនេះនៅអឺរ៉ុបបន្ទាប់ពីខែឧសភា ឆ្នាំ ២០១៨ ទណ្ឌកម្មដ៏តឹងរ៉ឹងនេះទំនងជាត្រូវបានអនុវត្ត»។
ក្រុមហ៊ុន Facebook ស្ថិតក្រោមការរិះគន់ខ្លាំងពីអាមេរិក និងអឺរ៉ុប បន្ទាប់ពីមានការបង្ហាញថា ក្រុមហ៊ុនវិភាគទិន្នន័យចក្រភពអង់គ្លេស Cambridge Analytica បានប្រើប្រាស់ទិន្នន័យបុគ្គលរបស់អ្នកប្រើប្រាស់ ៥០ លាននាក់របស់បណ្តាញសង្គមមួយនេះ ដើម្បីទាញយកផលប្រយោជន៍។
នៅថ្ងៃទី ២៥ ខែឧសភាខាងមុខនេះច្បាប់ការពារទិន្នន័យទូទៅ (GDPR) នឹងចូលជាធរមាននៅសហភាពអឺរ៉ុបដែលនឹងពង្រឹងការការពារព័ត៌មានលម្អិតរបស់បុគ្គលនៅសហភាពអឺរ៉ុប។
ច្បាប់នេះនឹងអនុវត្តចំពោះក្រុមហ៊ុនទាំងអស់រួមទាំងក្រុមហ៊ុននៅខាងក្រៅសហភាពអឺរ៉ុបផងដែរ។
ច្បាប់ដែលបង្កើនអំណាចដាក់ទណ្ឌកម្មនេះមិនអនុវត្តតែមួយរយៈពេលនោះទេ តែស្នងការរូបនេះបានសន្យាថា៖ «ច្បាប់ GDPR នឹងធ្វើឲ្យសហភាពអឺរ៉ុបក្លាយជាតំបន់លំហជាដែនដីដែលការបោកប្រាស់នឹងបង្កឲ្យមានការខាតបង់ប្រាក់ដ៏ច្រើន»។
ស្នងការរូបនេះពុំបានជួបពិភាក្សាជាមួយនឹងតំណាងរបស់ក្រុមហ៊ុន Facebook ទេ ជាពិសេសស្តីពីបញ្ហាលួចបង្ហាញទិន្នន័យនេះ តែលោកស្រីពិតជាបានចូលរួមក្នុងកិច្ចប្រជុំតុមូលស្តីពីប្រធានបទផ្សេងទៀតជាមួយនឹងតំណាងក្រុមហ៊ុនបណ្តាញសង្គមមួយនេះ។
លោកស្រី Jourova បានមានប្រសាសន៍បន្តថាលោកស្រីកំពុងរង់ចាំចម្លើយ «យ៉ាងអន្ទះសា»។
លោកស្រីមានប្រសាសន៍ថា៖ «តើវាអាចកើតឡើងដោយរបៀបណាដែលមនុស្សពុំមានអ្វីសោះនោះបានក្លាយជាកម្មវត្ថុនៃការប្រើប្រាស់មិនអាចទទួលយកបានបែបនេះ?»៕ BP
