ក្រុងបាងកកៈ រដ្ឋាភិបាលថៃគ្រោងនឹងពិភាក្សាអំពីការបង្កើនល្បឿនវិនិយោគនាពេលអនាគតក្នុងគម្រោងច្រករបៀងសេដ្ឋកិច្ចភាគខាងកើត (EEC) របស់ខ្លួនស្របតាមកិច្ចផ្តួចផ្តើមខ្សែក្រវាត់ និងផ្លូវរបស់ប្រទេសចិន។ នេះបើយោងតាមការឲ្យដឹងពីលោក Uttama Savanayana រដ្ឋមន្ត្រីក្រសួងឧស្សាហកម្មថៃ។
លោកឧបនាយករដ្ឋមន្ត្រីថៃ Somkid Jatusripitak បានជួបប្រជុំជាមួយនឹងមេដឹកនាំជាន់ខ្ពស់នៃក្រសួងឧស្សាហកម្មកាលពីម្សិលមិញស្តីពីវិធីទាក់ទាញការវិនិយោគថ្មីមកទីតាំងយុទ្ធសាស្ត្ររបស់គម្រោងអភិវឌ្ឍន៍ EEC នេះ។
លោក Uttama បានថ្លែងថារដ្ឋាភិបាលចង់ជំរុញគម្រោងអភិវឌ្ឍន៍ EEC ក្នុងនាមជាឧបករណ៍គាំទ្រដល់គម្រោងអភិវឌ្ឍន៍របស់ប្រទេសចិន។
លោកមានប្រសាសន៍ថា៖ «យើងជឿជាក់ថាគម្រោងទាំង ២ នឹងផ្តល់សក្តានុពលច្រើនសម្រាប់ប្រទេសចិន និងថៃដោយគម្រោងអភិវឌ្ឍន៍ EEC នឹងដើរតួនាទីជាស្ពានមួយដើម្បីទាក់ទាញវិនិយោគិនចិនក្នុងពេលអនាគតដ៏ខ្លីខាងមុខ»។
លោក Uttama មានប្រសាសន៍បន្តថាក្រសួងមានទំនុកចិត្តថាការអនុវត្តច្បាប់ EEC Act នឹងចាប់ផ្តើមក្នុងខែនេះដោយបានជួយធានាដល់វិនិយោគិនថា រដ្ឋាភិបាលមានផែនទីបង្ហាញផ្លូវច្បាស់លាស់សម្រាប់ការអភិវឌ្ឍ។
លោកបានឲ្យដឹងថាច្បាប់នេះកំពុងពិភាក្សាដោយគណៈរដ្ឋមន្ត្រីថៃ តែថាការពិចារណាត្រូវបានពន្យារពេលមួយឆ្នាំហើយដោយសាររដ្ឋាភិបាលជឿជាក់ថា វាមិនមានផលប៉ះពាល់ដល់ទំនុកចិត្តវិនិយោគិន។
រដ្ឋាភិបាលថៃមានបំណងជំរុញសេដ្ឋកិច្ចរបស់ថៃឆ្ពោះទៅរកវិស័យឧស្សាហកម្ម ៤.០ ដែលមានគោលបំណងធ្វើបច្ចុប្បន្នភាពវិស័យឧស្សាហកម្មតាមរយៈការប្រើប្រាស់បច្ចេកវិទ្យាទំនើប៕ BP