Search form

Login - Register | FOLLOW US ON

Logo of Phnom Penh Post newspaper Phnom Penh Post - ទំហំ​ពាណិជ្ជកម្ម​កម្ពុជា ​កើន​ដល់ ​$២២​ ពាន់​លាន​នាំ​ចេញ​កើន ​១៨%

Content image - Phnom Penh Post
ស្រឡាង​ដឹក​ទំនិញ​តាម​ទន្លេ​មេគង្គ​ឆ្ពោះ​ទៅ​កំពង់ផែ​ភ្នំពេញ​ដែល​មាន​ទីតាំង​នៅ​ស្រុក​កៀន​ស្វាយ​កន្លង​មក​។ ហេង ជីវ័ន

ទំហំ​ពាណិជ្ជកម្ម​កម្ពុជា ​កើន​ដល់ ​$២២​ ពាន់​លាន​នាំ​ចេញ​កើន ​១៨%

ភ្នំពេញៈ ​ទំហំ​ពាណិជ្ជកម្ម​កម្ពុជា​ឆ្នាំ​ ២០១៦ បាន​កើន​ឡើងដល់ ​២២ ​ពាន់​លាន​ដុល្លារ​ដោយ​កើនឡើង​ពី​ ១៩ ​ពាន់​លាន​ដុល្លារ​កាលពី​ឆ្នាំ ​២០១៥ ជាមួយ​នឹង​ឱនភាព​ពាណិជ្ជកម្ម​ ៨​ ភាគរយ​។ នេះ​បើ​យោង​តាម​ស្ថិតិ​ពាណិជ្ជកម្ម​បាន​ពី​ក្រសួង​ពាណិជ្ជកម្ម​ចេញ​ផ្សាយ​កាលពី​សប្ដាហ៍​មុន​។

ទិន្នន័យ​បាន​បង្ហាញ​ទំហំ​នៃ​ការ​នាំ​ចេញ​ សរុប​ ២០១៦ មាន​ជាង ​១០ ​ពាន់​លាន​ដុល្លារ កើន​ឡើង​ ១៨​ ភាគរយ​បើ​ធៀប​នឹង​ឆ្នាំ ​២០១៥ ដែល​មាន​ជាង ៨,៥៤ ​ពាន់​លាន​ដុល្លារ​។ តួលេខ​ដដែល​បង្ហាញ​ថា ការ នាំ​ចូល​មាន​ជាង​ ១២,៣​ ពាន់​លាន​ដុល្លារ កើន​ឡើង ​១៦ ​ភាគរយ​ពី​ជាង​ ១០ ​ពាន់​លាន​ដុល្លារ​កាលពី​ឆ្នាំ ​២០១៥​។

លោក ម៉ី កល្យាណ ទីប្រឹក្សា​ជាន់​ខ្ពស់​នៅ​ឧត្តម​ក្រុម​ប្រឹក្សា​សេដ្ឋកិច្ច​ជាតិ​បាន​ឲ្យ​ដឹង​ថា កំណើន​ពាណិជ្ជកម្ម​ជារួម​ជា​សញ្ញា​ល្អ​សម្រាប់​ កម្ពុជា ដោយ​សារ​តែ​វា​បាន​បង្ហាញ​ការ​ធ្វើ​ពិពិធ​កម្ម​ផលិតកម្ម និង​ការ​ផ្លាស់​ប្តូរ​ទីផ្សារ ទោះ​បីជា​ការ​នាំ​ចេញ​ សម្លៀក​បំពាក់​នៅ​តែ​ដើរ​តួនាទី​ដ៏​សំខាន់​នៅ​ក្នុង​ឧស្សាហកម្ម​នេះ​ក៏​ដោយ​។

​លោក​បាន​ថ្លែង​ថា​៖ «​កំណើន​ពាណិជ្ជកម្ម​ដ៏​ធំ​ទាំង​អស់​គឺជា​សញ្ញា​ល្អ និង​ស្ថិត​លើ​ដំណើរ​ផ្លូវ​ត្រឹមត្រូវ ដែលជា​និន្នាការ​ផលិតកម្ម ហើយ​ទីផ្សារ​កំពុង​ផ្លាស់​ប្តូរ និង​ការធ្វើ​ពិពិធ​កម្ម​»​។

តាម​តួលេខ ការ​នាំ​ចេញ​សំខាន់ៗ​សម្រាប់​ឧស្សាហកម្ម​ កម្ពុជា គឺ​ទៅ​ទីផ្សារ​អឺរ៉ុប ដែល​មាន​តម្លៃ ​៤​ ពាន់​លាន​ដុល្លារ និង​ទៅ​អាមេរិក​ខាងជើង​មានតម្លៃ ​២,៨​ ពាន់​លាន​ដុល្លារ​។ ប៉ុន្តែ​អត្រាកំណើន​នាំចេញ​បាន​ផ្លាស់ប្តូរ​ដ៏​ធំ​ទៅ​ប្រទេស​ចិន​បើ​គិត​ជា​ភាគរយ​រហូតដល់​ ៥០​ ភាគរយ​ក្នុងតម្លៃ​ ៦០៩ លាន​ដុល្លារ​និង​ ៤៥ ភាគរយ​ផ្លាស់ប្តូរ​ទៅ​ទីផ្សារ​ ជប៉ុន ដែលមាន​តម្លៃ​ ៨២៧ ​លាន​ដុល្លារ​។

របាយការណ៍​បង្ហាញ​ថា ការ​នាំ​ចេញ​របស់​កម្ពុជា​ភាគ​ច្រើន​បាន​ពី​សម្លៀកបំពាក់ វាយនភ័ណ្ឌ ស្បែកជើង និង​អង្ករ ដែល​កើន​ឡើងដល់​ ៨,៩៣​ ពាន់​លាន​ដុល្លារ​ធៀប​នឹង​ឆ្នាំ​ ២០១៥ ឬ​កើនឡើង​ ១១,១៨​ ភាគរយ​។

ការ​នាំ​ចេញ​សម្លៀក​បំពាក់​នៅ​តែ​នាំ​មុខ​គេ​មាន​តម្លៃ​ ៦,៣២​ ពាន់​លាន​ដុល្លារ ស្បែក​ជើង​មានតម្លៃ​ ៦៥៥,៧៧​ លាន​ដុល្លារ វាយនភ័ណ្ឌ​មាន​តម្លៃ​ ៨៧,៦​ លាន​ដុល្លារ និង​ទំនិញ​ផ្សេង​ទៀត​មាន​តម្លៃ​ជាង ១,៥៤​ ពាន់​លាន​ដុល្លារ​។

លោក ម៉ី កល្យាណ បាន​ឲ្យ​ដឹង​ថា​៖ «​ការ​នាំ​ចេញ​សម្លៀក​បំពាក់ គឺ​នៅ​តែ​ដើរ​តួនាទី​ដ៏​សំខាន់ ប៉ុន្តែ​វា​នឹងធ្វើ​ពិពិធ​កម្ម​តម្លៃ​បន្ថែម​ពី​តម្លៃ​ទាប​ទៅ​តម្លៃ​ខ្ពស់​»​។

លោក​បន្ដថា​៖ «​កម្ពុជា​នឹង​លែង​ពឹង​លើ​ទីផ្សារ​មួយ​ទៀត​ហើយ ដែល​មិនមែន​ទីផ្សារ​អាមេរិក និង​អឺរ៉ុប​នោះ​ទេ​»​។

លោក​ឲ្យ​ដឹង​ថា ប៉ុន្តែ ការ​នាំ​ចេញ​របស់​កម្ពុជា​ចាំបាច់​ត្រូវ​បង្កើន​ល្បឿន ដើម្បី​ឆ្លើយតប​នឹង​តម្រូវការ​ទីផ្សារ និង​នាំ​មុខ​ការ​នាំចូល​វិញ​។

លោក​ថ្លែងថា​៖«​យើង​ចាំបាច់​ត្រូវ​បង្កើនល្បឿន​ការ​អនុវត្ត​គោលនយោបាយ​អភិវឌ្ឍន៍​ឧស្សាហកម្ម ​(IDP) ​ដើម្បី​ជំរុញ​ការ​នាំ​ចេញ​ច្រើន​ជាង​ការនាំ​ចូល​។ យើង​ចាំបាច់​ត្រូវមាន​ថាមពល​ដែល​មាន​គុណភាព​ក្នុងការ​ផ្គត់ផ្គង់​ដល់​ប្រតិបត្តិការ​របស់​តំបន់​សេដ្ឋកិច្ច​ពិសេស​ (SEZ) ជា​អ្វីដែល​រដ្ឋាភិបាល​កំពុង​ព្យាយាម​ធ្វើ​នៅ​ពេល​នេះ​»​។

ផ្អែក​តាម​ទិន្ន័យ​កម្ពុជា​នៅ​តែ​ប្រទេស​ពឹង​លើ​ការ​នាំចូល​ខ្ពស់ ដែល​ធ្វើ​ឲ្យ​ឱនភាព​ពាណិជ្ជកម្ម​ធៀប​នឹង​ឆ្នាំ​ ២០១៥ ​មាន​មាន​ដល់​ជាង ​២ ​ពាន់​លាន​ដុល្លារ​។

របាយការណ៍​បាន​បង្ហាញ​ថា ទំនិញ​នាំចូល​ឈាន​មុខ​គេ​ពី​ឆ្នាំ​ ២០១៦ រួមមាន​វត្ថុធាតុ​ដើម​វាយន​ភ័ណ្ឌ តម្លៃ​ ២,២០​ ពាន់​លាន​ដុល្លារ រថយន្ត គ្រឿង​បន្លាស់ និង​ឧបករណ៍​អេឡិចត្រូនិក​មាន​តម្លៃ ១,១៤​ ពាន់​លាន​ដុល្លារ និង​ផលិតផល​ប្រើប្រាស់​ក្នុង​វិស័យ​រ៉ែ​មាន​ជាង ១,១​ ពាន់​លាន​ដុល្លារ ខណៈ​ការ​នាំចូល​អាហារ​បំប៉ន​មាន​ជាង ​៩០០ ​លាន​ដុល្លារ ។​

អង្ករ​ក៏​ស្ថិត​ក្នុង​ទំនិញ​នាំ​ចេញ​ឈាន​មុខ​គេ​របស់​កម្ពុជា​ផង​ដែរ​ កាលពី​ឆ្នាំ​ ២០១៦ ប៉ុន្តែ​អ្នក​នៅក្នុង​ឧស្សាហកម្ម​នេះ​អះអាងថា តួលេខ​មិនមែន​មានន័យ​វិជ្ជមាន​ទាំងអស់​នោះទេ​។​

​លោក ហ៊ុន ឡាក់ អនុប្រធាន​សហព័ន្ធ​ស្រូវ​អង្ករ​កម្ពុជា​បាន​ឲ្យ​ដឹងថា កំណើន​មិនមែន​មាន​ន័យ​ថា ក្រុមហ៊ុន​ទទួល​បាន​ប្រាក់​ចំណេញ​ទាំងអស់​នោះ​ទេ​។

លោក​បាន​ថ្លែងថា​៖ «​បើ​យើង​សម្លឹងមើល​តួលេខ​នេះ វា​វិជ្ជមាន ដោយ​សារ​យើង​ពង្រីក​ទីផ្សារ​ថ្មីៗ​ជាច្រើន ដូចជា ប្រទេស​ចិន ជាទី​ផ្សារ​ធំជាងគេ​នៅ​លើ​ពិភពលោក ប៉ុន្តែ​វា​មិន​មាន​ន័យ​ថា យើង​ជា​វិស័យ​ឯកជន​រកប្រាក់​ចំណេញ​បាន​ច្រើន​នោះទេ តម្លៃ​ផលិត​គឺ​នៅ​តែ​ជា​បញ្ហា និង​រារាំង​ដល់​ពួក​យើង​»​។

លោក​ឲ្យ​ដឹង​ថា កម្ពុជា ជា​ប្រភព​វត្ថុ​ធាតុដើម​ដ៏​សំខាន់ ប៉ុន្តែ​តម្លៃ​ផលិត​គឺ​នៅ​តែ​ជា​បញ្ហា​ប្រឈម​ក្នុងការ​ប្រកួត​ប្រជែង​ជាមួយ​ទីផ្សារ​អន្តរជាតិ ពិសេស​ទីផ្សារ​ប្រទេស​ជិត​ខាង​។​

លោក​បន្តថា​៖«​ទំហំ​នៃ​ការ​នាំ​ចេញ​របស់​យើង​កំពុង​កើន​ឡើង ដោយ​សារ​យើង​ពឹង​លើ​ទីផ្សារ​អឺរ៉ុប ប៉ុន្តែ​ទីផ្សារ​នេះ​នឹង​មិនមាន​ស្ថិរភាព​សម្រាប់​យើង​នោះទេ យើង​ចាំបាច់​ត្រូវ​បង្កើន​គុណ ភាព​របស់​យើង និង​កាត់បន្ថយ​តម្លៃ​ផលិត ដើម្បី​ទទួលបាន​ទីផ្សារ​ពិសេស​»​។​

របាយការណ៍​បង្ហាញ​ថា ការ​នាំ​ចេញ​អង្ករ​របស់​កម្ពុជា​កាល​ពី​ឆ្នាំ​ ២០១៦ មាន​តម្លៃ​ ៣២១,៨៨​ លាន​ដុល្លារ​។​

លោក​ងួន ម៉េង​តិច អគ្គនាយក​សភាពាណិជ្ជកម្ម​កម្ពុជា បាន​ឲ្យ​ដឹង​ថា ទំហំ​នាំចេញ​អាច​នឹងមាន​ច្រើនជាង​តម្លៃពិត ដោយសារ​ការនាំចេញរ​ត់​ពន្ធ​នៅតែមាន​។

លោក​ថ្លែង​ថា​៖«​តួលេខ​តម្លៃ​នាំចេញ​អាច​ច្រើនជាង​ចំនួន​ពិត ដោយ​សារ​ការរត់ពន្ធ​នៅតែ​មិនអាច​គ្រប់គ្រង​បាន​»​។

ទោះ​យ៉ាងនេះ​ក្តី​លោក​អះអាងថា ការ​នាំ​ចេញ​នឹងមាន​តុល្យភាព​ក្នុង​រយៈពេល ​៥ ឬ​ ១០ ​ឆ្នាំក្រោយ ដោយ​សារ​កម្ពុជា​នៅតែ​ត្រូវការ​នាំចូល​សម្ភារ​សម្រាប់​វិស័យ​សំណង់ និង​ប្រតិបត្តិការ​ពាណិជ្ជកម្ម​៕ LA

0

Comments

Please, login or register to post a comment