ភ្នំពេញៈ គោលនយោបាយថ្មីរបស់រដ្ឋាភិបាលដែលតម្រូវឲ្យនិយោជកបង្កើនការចំណាយទៅឲ្យបេឡាជាតិរបបសន្តិសុខសង្គម (NSSF) សម្រាប់និយោជិត បានចូលជាធរមានថ្មីៗនេះហើយ ខណៈមន្ដ្រីបានសរសើរដល់កិច្ចខិតខំប្រឹងប្រែងទាំងនេះថាជាការជំរុញឲ្យមានការគ្របដណ្តប់សេវាថែទាំសុខភាពកាន់តែច្រើននោះ អ្នកក្នុងវិស័យធុរកិច្ចបានឲ្យដឹងថា គោលនយោបាយថ្មីទាំងនេះទំនងជានឹងជំរុញឲ្យក្រុមហ៊ុននៅឆ្ងាយពីការផ្ដល់ផែនការធានារ៉ាប់រងសុខភាពឯកជនដែលមានគុណភាពខ្ពស់ជាងនេះ។
យោងតាមប្រកាស និងអនុក្រឹត្យដែលបានចេញផ្សាយដោយក្រសួងការងារកាលពីឆ្នាំមុន គិតត្រឹមថ្ងៃទី១ ខែមករា ឆ្នាំ២០១៨ ក្រុមហ៊ុនទាំងអស់ដែលជួលបុគ្គលិកម្នាក់ ឬច្រើនជាងម្នាក់ នៅពេលនេះត្រូវតម្រូវឲ្យបង់ប្រាក់ ៣,៤ ភាគរយនៃប្រាក់ខែមធ្យមរបស់និយោជិតនីមួយៗ ឬអតិបរមាប្រហែល ៨,៥០ ដុល្លារក្នុងបុគ្គលិកម្នាក់ក្នុងមួយខែទៅឲ្យ NSSF ដើម្បីផ្ដល់ការថែទាំសុខភាពដល់បុគ្គលិកដែលមានរបួស។
កន្លងមក និយោជកត្រូវបានតម្រូវឲ្យបង់ប្រាក់ត្រឹមតែ ១,៣ភាគរយនៃប្រាក់ខែប្រចាំខែជាមធ្យមរបស់និយោជិតទៅឲ្យ NSSF ខណៈដែលនិយោជិតត្រូវបង់ប្រាក់ ១,៣ភាគរយផ្សេងទៀតពីប្រាក់ខែរបស់ពួកគេ។ សម្រាប់ម្ចាស់រោងចក្រកាត់ដេរ នេះមានន័យថា នៅពេលនេះការបង់ប្រាក់នេះមានចំនួនជិត៧០ដុល្លារក្នុងបុគ្គលិកម្នាក់ក្នុងមួយឆ្នាំបន្ទាប់ពីការដំឡើងប្រាក់ឈ្នួលអប្បបរមាដល់១៧០ដុល្លារក្នុងមួយខែ ដែលពីមុនពួកគេតម្រូវឲ្យបង់ប្រាក់ប្រហែល ២៦ដុល្លារប៉ុណ្ណោះក្នុងមួយឆ្នាំ។
លោក អាត់ ធន ប្រធានសហភាពការងារកម្ពុជាបានសរសើរគោលនយោបាយថ្មីនេះថា ជាមធ្យោបាយនៃការជំរុញគុណភាពជីវិតសម្រាប់កម្មកររោងចក្រកាត់ដេរ។
លោកថ្លែងថា៖ «នេះនឹងជួយដល់កម្មកររោងចក្រកាត់ដេរឲ្យសន្សំប្រាក់សម្រាប់ការចំណាយផ្សេងទៀត»។ លោកបន្តថា៖ «ប៉ុន្តែទោះបីជានិយោជកចំណាយតិចលើប្រតិបត្តិការក្នុងប្រទេសកម្ពុជាជាងទីកន្លែងផ្សេងទៀត [ក្នុងតំបន់] ក៏ដោយ ក៏និយោជកមួយចំនួនមិនសប្បាយចិត្តជាមួយនឹងការបង្កើនការចំណាយនេះដែរ»។
យោងតាមលោក ហេង សួរ អ្នកនាំពាក្យក្រសួងការងារ គម្រោងថែទាំសុខភាពថ្មីនេះនឹងមិនដាក់បន្ទុកហិរញ្ញវត្ថុខ្លាំងដល់និយោជកនោះទេ។
លោកមានប្រសាសន៍ថា៖ «គោលនយោបាយនេះនឹងមិនបង្អាក់ក្រុមវិនិយោគិននៅពេលអនាគតមិនឲ្យចូលមកប្រទេសកម្ពុជាទេ ដោយសារតែរដ្ឋាភិបាលបានលើកលែងឲ្យក្រុមហ៊ុនទាំងនេះនូវកម្រៃលើសេវាគ្រប់គ្រងការនាំចេញ និងពន្ធកាត់ទុកដើម្បីកាត់បន្ថយការចំណាយដល់និយោជក»។ លោកបន្តថា៖ «នៅពេលនេះ និយោជិតទទួលបានការលើកទឹកចិត្តកាន់តែច្រើន ហើយធ្វើការងារកាន់តែមានប្រសិទ្ធភាព»។
លោកបន្ថែមថា រដ្ឋាភិបាលធម្មតាបានប្រមូលប្រាក់បាន ២០លានដុល្លារប្រចាំឆ្នាំពីពន្ធកាត់ទុក និង ២០លានដុល្លារផ្សេងទៀតពីកម្រៃសេវាគ្រប់គ្រងការនាំចេញ។
បើទោះជាកិច្ចខិតខំប្រឹងប្រែងទាំងនេះអាចធានាថា ឧស្សាហកម្មកាត់ដេរមិនមានអារម្មណ៍ថា ត្រូវបានដកយកពន្ធច្រើនពេកដោយគោលនយោបាយថ្មីទាំងនេះក្តី ក៏ ក្រុមហ៊ុនមួយចំនួនកំពុងយល់ឃើញថា ជាសម្ពាធឲ្យគោរពតាមបទប្បញ្ញត្តិទាំងនេះទៅវិញ។ នេះបើយោងតាមលោក Stephen Higgins ដៃគូគ្រប់គ្រងក្រុមហ៊ុន Mekong Strategic Partners។
លោកថ្លែងថា៖ «ភាគច្រើននៃនិយោជកដែលមានអាជីវកម្មកម្រិតមធ្យមដល់ខ្នាតធំផ្តល់សេវាសុខភាពដល់បុគ្គលិករបស់ពួកគេរួចហើយ ដែលអាចឲ្យបុគ្គលិកទាំងនោះទទួលបានលទ្ធភាពព្យាបាលជំងឺនៅគ្លីនិក និងមន្ទីរពេទ្យបាន»។
លោកបន្តថា៖«មានហានិភ័យមួយដែលថា មួយចំនួននៃនិយោជកទាំងនេះនឹងឈប់ផ្តល់សេវាថែទាំសុខភាពឯកជនដែលមានស្រាប់របស់ពួកគេ ហើយគ្រាន់តែបង់ប្រាក់ ឲ្យ NSSF ជាការស្រេច ដែលប្រសើរជាងបង់ប្រាក់សម្រាប់គោលនយោបាយថែទាំសុខភាព២ផ្សេងគ្នាដែលទំនងជានឹងបណ្ដាលឲ្យបុគ្គលិករបស់ពួកគេទទួលរងស្ថានភាពកាន់តែអាក្រក់ឡើង»។
លោក Anthony Galliano អគ្គនាយកក្រុមហ៊ុន Cambodian Investment Management បានឲ្យដឹងថា គោលនយោបាយថ្មីនេះទំនងជានឹងបណ្ដាលឲ្យឧស្សាហកម្មធានារ៉ាប់រងនៅក្នុងប្រទេសកម្ពុជាទទួលរងប៉ះពាល់។
លោកថ្លែងថា៖ «យើងបានមើលឃើញរួចហើយនូវនិន្នាការវិវត្តន៍ដែលនិយោជកមួយចំនួនដែលបានផ្ដល់ការធានារ៉ាប់រងគ្រោះថ្នាក់ផ្ទាល់ខ្លួនដល់បុគ្គលិករបស់ពួកគេបានបដិសេធបន្តសេវានេះ ដោយលើកឡើងពីការចំណាយប្រចាំខែដល់ NSSF»។
លោកបន្តថា៖ «ហានិភ័យនោះគឺថា និយោជកនឹងជំនួសផែនការសម្រាប់ក្រុមហ៊ុនធានារ៉ាប់រងដែលមានគុណភាពខ្ពស់ជាមួយការចំណាយកាន់តែតិចតាមរយៈ NSSF»។
លោកបន្ថែមថា ក្រុមហ៊ុនដែលមានកម្លាំងពលកម្មច្រើន ដែលមិនគោរពតាមបទប្បញ្ញត្តិរបស់ NSSF កាលពីពេលកន្លងមកនឹងទទួលរងផលប៉ះពាល់ខ្លាំងបំផុត»។
លោកថ្លែងថា៖«គួរឲ្យភ្ញាក់ផ្អើល ទោះបីជាការចុះឈ្មោះ និងការបង់ប្រាក់ឲ្យ NSSF ត្រូវបានកំហិតក៏ដោយ ក៏ខ្ញុំមិនបានមើលឃើញក្រុមហ៊ុនខា្នតតូច និងមធ្យមប្រញាប់ប្រញាល់អនុលោមតាមនោះដែរ ដែលរំពឹងថា នឹងមានការពន្យារពេលវេលាកំណត់»៕ LA