Search form

Login - Register | FOLLOW US ON

Logo of Phnom Penh Post newspaper Phnom Penh Post - បន្ទប់​ពេញ​តម្លៃ​ខ្ពស់​ ខណៈ​អ្នក​ដើរ​កម្សាន្ត​កើន

ភ្ញៀវ​ទេសចរ​ជាតិ និង​អន្តរជាតិ​ដែល​ទៅ​កម្សាន្ត​នៅ​ឆ្នេរ​អូឈើទាល​ ខេត្ត​ព្រះសីហនុ​កាលពី​ដើម​ឆ្នាំ ២០១៥។
ភ្ញៀវ​ទេសចរ​ជាតិ និង​អន្តរជាតិ​ដែល​ទៅ​កម្សាន្ត​នៅ​ឆ្នេរ​អូឈើទាល​ ខេត្ត​ព្រះសីហនុ​កាលពី​ដើម​ឆ្នាំ ២០១៥។ ស៊ន សារ៉ាត

បន្ទប់​ពេញ​តម្លៃ​ខ្ពស់​ ខណៈ​អ្នក​ដើរ​កម្សាន្ត​កើន

ភ្នំពេញៈ ភ្ញៀវ​ទេសចរ​ក្នុង​ស្រុក​​កាន់តែ​ច្រើន​បាន​នាំ​គ្នា​សម្រុក​​ទៅ​កម្សាន្ត​នៅ​តាម​តំបន់​ទេសចរណ៍​សំខាន់ៗ​ក្នុង​ឱកាស​ចូល​ឆ្នាំ​សកល​ ២០១៦ ​នេះ​ដែល​បាន​ជំរុញ​ឲ្យ​​​តម្លៃ​បន្ទប់​កើន​ឡើង​។

កញ្ញា នួន លីដា អ្នក​ទទួល​ភ្ញៀវ​នៅ​សណ្ឋាគារ​ New Beach ខេត្ត​ព្រះសីហនុ​បាន​ឲ្យ​​ដឹង​ថា​បន្ទប់​ត្រូវ​បាន​កក់​អស់​​តាំងពី​មួយ​សប្ដាហ៍​មុន​។ លីដា បន្ថែម​ថា «​បន្ទប់​ត្រូវ​បាន​កក់​អស់​​តាំងពី​មួយ​អាទិត្យ​មុន​»​។

កញ្ញា​បន្ត​ថា​សណ្ឋាគារ​ New Beach មាន​ ៤០ ​បន្ទប់​ហើយ​តម្លៃ​បាន​កើនឡើង​ពី​ថ្ងៃ​ធម្មតា​ ៤០ ​ដុល្លារ​ដល់​ ៥០ ​ដុល្លារ​ក្នុង​ឱកាស​នេះ​។ កញ្ញា​លើក​ឡើង​ថា​៖ «​តម្លៃ​បន្ទប់​គឺ​ [កើន​ឡើង​] ដូច​​នឹង​ឆ្នាំ​មុន​សណ្ឋាគារ​ភាគ​ច្រើន​ពេញ​អស់​ហើយ​»។

ប្រធាន​មន្ទីរ​ទេសចរ​ខេត្ត​ព្រះសីហនុ​លោក នូ សុផល ​ឲ្យ​ដឹង​ថា​នៅពេល​នេះ​មន្ទីរ​នៅ​មិន​អាច​ប៉ាន់​ប្រមាណ​ពី​ចំនួន​ភ្ញៀវ​ដែល​មក​លេង​តំបន់​ឆ្នេរ​ខេត្ត​ព្រះសីហនុ​នៅ​ឡើយ​ទេ​ដោយសារ​រង់ចាំ​ការ​បូក​សរុប​នៅ​ថ្ងៃ​ស្អែក (​ថ្ងៃ​នេះ)​។
ប៉ុន្តែ​លោក​អះអាង​ថា​មិន​មាន​បន្ទប់​សល់​សម្រាប់​ថ្ងៃ​ឆ្លង​ឆ្នាំ​នេះ​ទេ។

មិន​ខុស​ពី​ខេត្ត​ព្រះសីហនុ​ទេ​បន្ទប់​ខេត្ត​សៀមរាប​ក៏​ពេញ​អស់​ដែរ​។

សណ្ឋាគារ​ស្ទឹង​សៀមរាប​ដែល​មាន​ ៧៦ ​បន្ទប់​​ត្រូវ​កក់​អស់​សម្រាប់​ថ្ងៃ​ទី​​ ៣១ ចាប់​តាំងពី​ ២ សប្ដាហ៍​មុន​។ លោក សរ សុភ័ក្ត ប្រធាន​ផ្នែក​លក់ និង​ទីផ្សារ​ថ្លែង​ថា​ភ្ញៀវ​បរទេស​មាន​​ជិត​ ៩០ ​ភាគរយ​ហើយ​តម្លៃ​ធម្មតា​ចន្លោះ​ពី​ ៥០ ​ដល់​ ៦០ ​ដុល្លារ​អាមេរិក​ប៉ុន្តែ​សម្រាប់​ថ្ងៃ​ឆ្លង​ឆ្នាំ​តម្លៃ​បន្ទប់​បាន​កើនឡើង​ចាប់ពី​ ៨០ ដល់ ៩០ ​ដុល្លារ​។

លោក​បន្ត​ថា​៖ «​វា​មិន​ខុស​គ្នា​នឹង​​ឆ្នាំ​​មុន​នោះ​ទេ​ប៉ុន្តែ​ខុស​ត្រង់​ថា​​មាន​សណ្ឋាគារ​ច្រើន​ជាង​ពី​មុន​ប៉ុន្តែ​បន្ទប់​គឺ​នៅ​តែ​ពេញ​ហើយ​ខ្ញុំ​បាន​ឮ​ថា​ស្ទើរតែ​សណ្ឋាគារ​ទាំងអស់​នៅក្នុង​ខេត្ត​សៀមរាប​ត្រូវ​ពេញ​អស់​ផង​ដែរ​»​។

បើ​ទោះបី​យ៉ាង​នេះ​ក្តី​លោក ឆឺយ ឆន ប្រធាន​នាយកដ្ឋាន​មន្ទីរ​ទេសចរណ៍​ខេត្ត​បាន​ឲ្យ​ដឹង​ថា​ការ​កើន​ឡើង​តម្លៃ​នេះ​ស្ថិត​ក្នុង​កម្រិត​ដែល​អាច​ទទួល​យក​បាន​សម្រាប់​ភ្ញៀវ​ទេសចរ​។ លោក​បន្ត​ថា ​នៅ​ឆ្នាំ​នេះ ​គេ​សង្កេត​ឃើញ​សន្ទុះ​ទេសចរ​ក្នុង​ស្រុក​មាន​ខ្ពស់​ជាង​ទេសចរ​បរទេស​ខណៈ​ទេសចរ​បរទេស​ហាក់​​មាន​តិច​បើ​ធៀប​នឹង​ឆ្នាំ​មុន​។

ភ្ញៀវ​ទេសចរ​ទៅ​លេង​ប្រាសាទ​អង្គរវត្ត​កាលពី​ពាក់​កណ្តាល​ឆ្នាំ ២០១៥។
ភ្ញៀវ​ទេសចរ​ទៅ​លេង​ប្រាសាទ​អង្គរវត្ត​កាលពី​ពាក់​កណ្តាល​ឆ្នាំ ២០១៥។ ប៉ុស្តិ៍

លោក​ថ្លែង​ថា​៖ «​ភ្ញៀវទេសចរ​ក្នុង​ស្រុក​នឹង​កើន​ឡើង​ជាង​ឆ្នាំ​មុន​ប៉ុន្តែ​ទេសចរ​បរទេស​​មិន​​កើនឡើង​ច្រើន​នោះ​ទេ»​​។ លោក​បន្ត​ថា​៖ «​សណ្ឋាគារ​នៅ​តាម​បណ្ដោយ​វិថី​ធំៗ​ពេញ​អស់​ហើយ​ប៉ុន្តែ​សណ្ឋាគារ​មួយ​ចំនួន​នៅ​តាម​​ដង​ផ្លូវ​តូចៗ​​មិន​ទាន់​ពេញ​នៅ​ឡើយ​»​។ ​លោក​បញ្ជាក់​ថា​ខេត្ត​សៀមរាប​នឹង​​មិន​មាន​បញ្ហា​លើ​​​ការ​ផ្គត់ផ្គង់​បន្ទប់​ទេ​​។ លោក​បន្ត​ថា​៖ «​តម្លៃ​​មិន​ខ្ពស់​ខ្លាំង​នោះ​ទេ​វា​ស្ថិត​ក្នុង​កម្រិត​អាច​ទទួល​យក​បាន​ប៉ុន្តែ​មិន​កើន​ឡើង​ពីរ​ដង​ទេ​»​។

យោង​តាម​​ប្រធាន​មន្ទីរ​ទេសចរ​ណ៍​ខេត្ត​បាន​ឲ្យ​ដឹង​ថា​មាន​ភ្ញៀវ​ទេសចរ​សរុប​ទាំង​ជាតិ​ និង​អន្តរជាតិ​ដែល​មក​ទស្សនា​ខេត្ត​សៀមរាប​ក្នុង​រយៈពេល​ ១១ ខែ​ឆ្នាំ​ ២០១៥ មាន​ចំនួន​ ៤ ៦១១ ៧៤២ នាក់​​កើន​ឡើង​ ០,៥៥ ភាគរយ​បើ​ធៀប​រយៈពេល​ដូច​គ្នា​កាលពី​ឆ្នាំ​ទៅ។ ក្នុង​នោះ​ទេសចរ​ក្នុង​ស្រុក​កើនឡើង​ ៩ ​ភាគរយ​ពី ២ ៤៨៥ ០៦០ នាក់ ដល់ ២ ៧១០ ០៩៦ នាក់​ខណៈ​ទេសចរ​បរទេស​ធ្លាក់​ចុះ​ ៩,៤៩ ​ភាគរយ​ពី​ ២ ១០១ ១២១ នាក់​មក​នៅ​ ១ ៩០១ ៦៤៦ ​នាក់។

លោក ឆឺយ ឆន បាន​លើក​ឡើង​ថា​ភ្ញៀវ​ទេសចរ​បរទេស​បាន​ធ្លាក់​ចុះ​ដោយសារ​តែ​ផលប៉ះពាល់​មក​ពី​បញ្ហា​នៃ​ការ​វាយប្រហារ​នៅ​ទីក្រុង​ប៉ារីស​ និង​បញ្ហា​សេដ្ឋកិច្ច​នៅ​ក្នុង​​ប្រទេស​រុស្ស៊ី​ដែល​បង្ក​​ឲ្យ​វិនិយោគិន​មួយ​ចំនួន​ភ័យ​ខ្លាច​មិន​ហ៊ាន​ធ្វើ​ដំណើរ​។

ដោយ​ខេត្ត​កែប​ក៏​នឹង​មើល​ឃើញ​កំណើន​ភ្ញៀវ​ទេសចរ​​ក្នុង​ស្រុក​ដែរ​ខណៈ​អាជ្ញាធរ​ខេត្ត​បាន​បង្កើត​ព្រឹត្តិការ​រយៈពេល​​ ៣ ថ្ងៃ​ដើម្បី​ស្វាគមន៍​ភ្ញៀវ​ទេសចរ​។

លោក សំ ចិន្តា ប្រធាន​មន្ទីរទេសចរណ៍​ខេត្ត​កែប​បាន​ថ្លែង​ថា​ប្រជាជន​ក្នុង​ស្រុក​កាន់តែ​ច្រើន​នឹង​មក​​ទស្សនា​ខេត្ត​កែប​ដោយសារ​តែ​មាន​ព្រឹត្តិការណ៍​ជាច្រើន​ដូចជា​​ការ​តាំង​ពិព័រណ៍​ការ​ប្រគំតន្ដ្រី​ និង​ល្បែង​ប្រពៃណី​រយៈពេល​​ ៣ ថ្ងៃ​។

លោក​បន្ត​ថា​៖ «​ទាក់ទង​នឹង​ការ​កក់​បន្ទប់​មក​ដល់​ពេល​នេះ​គឺ​ល្អ​ប៉ុន្តែ​សម្រាប់​ថ្ងៃ​ស្អែក​ [ព្រហស្បតិ៍​នេះ​] អាច​ខ្វះខាត [ប៉ុន្តែ​] តម្លៃ​​ក៏​មិន​កើន​ឡើង​ច្រើន​ដែរ​​»​។

លោក​បន្ថែម​​ថា​៖ «​សម្រាប់​រដូវ​ធម្មតា​ ការ​ផ្គត់ផ្គង់​សណ្ឋាគារ​ និង​ភោជនីយដ្ឋាន​គឺ​មិន​មាន​បញ្ហា​ទេ​ប៉ុន្តែ​មាន​ការ​ខ្វះខាត​នៅក្នុង​ព្រឹត្តិការណ៍​ធំៗ​ប៉ុន្តែ​ភ្ញៀវទេសចរ​មួយ​ចំនួន​អាច​ស្នាក់នៅ​ខេត្ត​កំពត​ ឬ​ខេត្ត​ព្រះសីហនុ​បាន​»​។

លោក​បន្ត​ថា​៖ «​ខណៈ​ប្រជាជន​កាន់តែ​ច្រើន​ឡើងៗ​ចូល​មក​ខេត្ត​កែប​យើង​កំពុង​ស្វែងរក​មើល​​ការ​ផ្គត់ផ្គង់​បន្ថែម​ទៀត​ដោយ​ការ​បង្កើត​សេវា​កម្សាន្ត​សណ្ឋាគារ ហេដ្ឋារចនា​សម្ព័ន្ធ អគ្គិសនី និង​ការ​ផ្គត់ផ្គង់​ទឹកសា្អត​»​។

យោង​តាម​លោក​ ចិន្តា​ រយៈពេល​មួយ​ឆ្នាំ​នេះ​ខេត្ត​រំពឹង​ថា​នឹង​មាន​ភ្ញៀវ​ទេសចរ​ជាង​ ១ ​លាន​នាក់​គឺ​កើនឡើង​ពី​ ៧៦០ ០០០ នាក់​ធៀប​នឹង​ឆ្នាំ​មុន​។

លោក លូ ម៉េង ប្រធាន​សមាគម​សណ្ឋាគារ​​កម្ពុជា​​លើក​ឡើង​​ថា​ខណៈ​ដែល​ផ្លូវ​ថ្នល់​កាន់តែ​ល្អ​ប្រសើរ​ប្រជាជន​ក្នុង​ស្រុក​ជាច្រើន​អាច​ធ្វើ​ដំណើរ​​ក្នុង​ស្រុក​ជាពិសេស​តំបន់​ឆ្នេរ​ និង​ខេត្ត​សៀមរាប​។ លោក​ថ្លែង​ថា​ទោះបី​ជា​ចំនួន​ភ្ញៀវ​ទេសចរ​​កើនឡើង​ក៏ដោយ​នឹង​មិន​មាន​បញ្ហា​សម្រាប់​ការ​ស្នាក់នៅ​នោះ​ទេ​ទោះបី​ជា​តម្លៃ​កើនឡើង​បន្តិច​ក៏​ដោយ​។

លោក​បន្ត​ថា​៖ «​តម្លៃ​​បាន​កើនឡើង​បន្តិច​សម្រាប់​សណ្ឋាគារ​ថ្នាក់​​ផ្កាយ​ ២ និង​ក្រោម​នេះ​ប៉ុន្តែ​វា​មិន​គ្រាន់​តែ​នៅ​ក្នុង​ប្រទេស​កម្ពុជា​ដែល​ប្រទេស​ផ្សេង​ទៀត​​បាន​កំណត់​តម្លៃ​តាម​រដូវ​»​។

ប៉ុន្តែ​លោក​បន្ត​ថា​៖ «​យើង​មិន​ចង់​ឲ្យ​ពួកគេ​បង្កើន​តម្លៃ​ច្រើន​ពេក​ទេ​អ្វី​ដែល​​សំខាន់​គឺ​សេវា​ប្រសិន​បើ​ពួកគេ​បង្កើន​តម្លៃ​ពួកគេ​គួរតែ​កែលម្អ​សេវា​ផង​ដែរ​»​។

លោក​បាន​បន្ត​ថា​ការ​ផ្គត់ផ្គង់​បន្ទប់​ស្នាក់នៅ​ថ្មី​នឹង​បន្ត​កើនឡើង​ដោយសារ​តម្រូវការ​កាន់តែ​ធំ​ឡើងៗ​។ លោក​បន្ថែម​ថា៖ «មាន​សណ្ឋាគារ​កាន់តែ​ច្រើន​ត្រូវ​បាន​សាងសង់​រហូត​ដល់​ឆ្នាំ​ ២០១៨​ ដែល​​សកម្មភាព​នៃ​ការ​សាងសង់​កើនឡើង​ ៣ ​ដង​ធៀប​នឹង​រយៈពេល​ ៣ ​ឆ្នាំ​មុន​»។

លោក អាង គឹមអៀង ប្រធាន​សមាគម​ភ្នាក់ងារ​ទេសចរណ៍​កម្ពុជា​ថ្លែង​ថា​ការ​កើន​ឡើង​ភ្ញៀវទេសចរ​បាន​បង្ហាញ​ពី​​កម្រិត​នៃ​ការ​រស់នៅ​កាន់តែ​ប្រសើរ​ហើយ​ប្រជាជន​បាន​ត្រឡប់​ទៅ​រស់​នៅក្នុង​ភាព​សុខដុម​ជាមួយ​កូនៗ​ និង​មិត្តភក្ដិ​របស់​ពួកគេ​ហើយ​វា​គឺជា​សញ្ញា​ដ៏​ល្អ​សម្រាប់​សេដ្ឋកិច្ច​របស់​ប្រទេស​កម្ពុជា​។

លោក​ថ្លែង​ថា​៖ «​ការ​កើន​ឡើង​ភ្ញៀវទេសចរ​ក្នុង​ស្រុក​ជា​សញ្ញា​បង្ហាញ​ពី​ជីវភាព​ធូរធារ​ដែល​ប្រជាជន​បាន​ងាក​ទៅ​ធ្វើ​ដំណើរ​ និង​កម្សាន្ត​ជាមួយ​កូនៗ និង​មិត្តភក្ដិ​កាន់តែ​ច្រើន​»៕LA

0

Comments

Please, login or register to post a comment

ព័ត៌មានពាក់ព័ន្ធ